JOB Laibu (The Book of Job) 13 - Ngawm Bible

^1-2 Na otmi hempoh uh cu ka mit a, ka muhsa mi le ka beng tuah ka zaksa mi ngeh hi. Ka theihsa khawng hi in; Nangmu theihzah cu thei bok ing. Nangmuh sangin niam saw cuang mang.

³ Mahnaven nohte tuah thu eldun ma hung; Ihempoh tithei Pathian tuah eldun ung hi. Ka thu cu Pathian tuah eldun nuam ing.

⁴ Na thu theih ngawl dan uh hi zolthu ngeh khuh uh ci. Kuamah a damtik thei ngawl sibawi bang uh ci.

⁵ Awn ngawlno in um saw unna, miten micip sa haw tuk hi.

⁶ Ka otmi ngai hih unna, ka thu hawhdan ngaisung bok un.

⁷ Ita zolthu bebek son uh cim? Na zolthu son uhmi hi Pathian ca in nemcuam tuk sa uh cim?

⁸ Pathian lamtang tum ngai uh cim? Thukhennak munah a lamah tangin, ka thu el tum uh cim?

⁹ Pathian in, na cungcang uh a dongkan ngangai ahin, thilpha pa khatno bek na hum uhah mu ni maw? Mihing na zol theih uh bangin Pathian zol theih tum uh cim?

¹⁰ Mi deidat kuhnak na nei uh ahi tale, Amah in phuang tuk a, nun hilh tuk hi.

¹¹ A huhamin noh thinsutikin, a lauhuainak na hum uhah cak tukma maw?

¹² Na thu tehkipnak uhte cu vut bang; na thu el thiamnak uhte cu tunglei bang hi.

¹³ Cingdenno in, na um hih un, awn bok tung; A pian babangin piang tapoh hen!

¹⁴ Lauthawngnak munah heng ing. Ka nunnak pammai lehma toh ing.

¹⁵ Muansannak nei lehma toh ing; Pathian in kei cu thatleh leleng tuk hi. Mahnaven ka thu le la cu a mai cikcekah hunpih tung.

¹⁶ Ka ngalphatnakin hup theikha tuk; itahim titale mi pha ngawlin Pathian tawk ngam awng haw ma hi.

¹⁷ Ka hilh ciangmi thu hi ngai un, ka thu hilhmi hi na beng sung uhah tum hen.

¹⁸ Ka thu le late cu ngaisung khawng zo ing a, thiancotik tuk hi, Itahim titale ka thu hi dik hi tih cu thei ing.

¹⁹ Maw Pathian aw, hungin kei sual nawn ngangai tuk cim? Mah ahi tale kei cu mengdenin thi saw tung hi.

²⁰ Thil pa nih nget nuam nei ing. Na lungkim inna, na lak pen ngelh tuk mang.

²¹ Kei na bawlsiatnak cu cawl toh inna, na lauhuainak tuah ka thinsutik toh pahsun.

²² Maw Pathian aw, nang awn masa inna, donleh tung. Mahma tale kei awn masa nangin hu don pah ni ci.

²³ Ka mawhnak le daan ka palcatnak izah um kaw? Ka sualnak le ka tingsapnakte hu hilh tehin?

²⁴ Ita na mai sel kam? Ita ngal bangin kei zo nge cim?

²⁵ A thinsu hen ti cim? Kei cu imah ma sing; thingceh ngawm hi poh ma ing maw? Cangkung ko pa khat a do li tuah bangve ci!

²⁶ A mawi ngawl zetmi sualnakte kei nawn li si. Ka khangno laihin ka bawlmi sualnak tenkhialtik hi.

²⁷ Thik taicin tuah ka ke kenin, ka ke kal zo cangcian ci. Ka ke ngiah tian dongkan khawng ci.

²⁸ Mah hangin thingmuat bangin tu ing a, A ngotmi puan bangin balkek khawng ing.