JOB Laibu (The Book of Job) 11 - Ngawm Bible

Zophar in:

^1-2 Hi bangthong ot hi akua bekin don tukma hung maw! Awn tam tih thongin, thianco haw tuk maw i heng?

³ Job, don thei tuk ngawlin ngaisung cim? Na pualthau otin, vatmit thei tuk pohin, ngaisung cim?

⁴ Ka otmi le ka ngaihsutmi hi a man hi. Pathian mai ah thiang ing, ti ci.

⁵ Pathian in, a don bok ahin, deih na veng!

⁶ Cihnak phun tampi a um lam, Mihing huak i theihzawh ngawlmi, thil tampi a um lam, na lakah a phuang tabang ahin, Thungai in titale Pathian in, na thuak tuk zah sangin dem deuhin nang bawlsia hi!

⁷ Pathian a thawmngeng dan hi a ngamngi thei zo ni cim? Ihempoh tithei in, a huham a ngeng dan hi suum teh thei ni cim?

⁸ A huham cu van sangin sang saw hi, nang ikaw na tih theih? Mithi khua Sheol sangin thuk saw hi. Nang in itin thei nge cim?

⁹ Pathian i thawmngeng dan cu leihum pumpi sangin ngeng saw in, tuipi thuanthum sangin zal saw hi.

¹⁰ Pathian in manin, thawngah a khia ahin, thukhennak zungah a hawhpih tale, akua kaw a kham thei tuk?

¹¹ Mipha ngawl a kuate hum tih cu Pathian in thei khawng hi. Nadeh pha ngawlte vang mu khawng hi.

¹² Misilte cipleh thei haw ni maw? Hampalak a laakte cu a bemzet sa in suak awng ni maw?

¹³ Job, na lungmu komno in koih inna, na baan phalh inna, Pathian lam hekin hi.

¹⁴ Na inn a, phatngawlnak le na khut a sualnakte cu vawk khawngin hi.

¹⁵ Mitmai sia ngawlin um inna, ngalphazet le khohkhah zetin nungin hi.

¹⁶ Na cim le khamnak cu pai pepel tuk a, a luang vawkmi tui na muhleh ngawl toh bangin, phawkleh tukma toh ci.

¹⁷ Na nunnak cu, sun ni al sangin al saw tuk hi. Thimzet na tihmi na nunnak cu zing khuavak bangin vak tuk hi.

¹⁸ Lungmuang zetin le nunnop zetin um tuk ci. Pathian in hup tukin, colhnak pia tuk hi.

¹⁹ Zau hiahhuahin, lau mi imah nei tukma ci. Mi tampi ten bopnak ngen haw tuk hi.

²⁰ Mipha ngawlte cu lungsia in, khua cuan haw tuk a, luatnak lampi mu haw tukma hi. A nungdawlbel a haihawh cu muansannak a neihcalam haw mi na hi tuk hi.