JOB Laibu (The Book of Job) 10 - Ngawm Bible

¹ Nun hi ciatzet toh ing. A kha zetmi ka phuknak hi ngai tehin! Khaw-ngai zetin hilh tung.

² Maw Pathian aw, mi mawh ci ti phal hih pahsun; iti bang sualnak kaw kei na not, hilh hemin!

³ Hehpihnak nei ngawlin kei na nepsuk lih hi mawi ti cim maw? Na khutzung tuah na bawlmi nauneh hi poitik ma cim maw? Mipha ngawl tei tuptahmi nuihsan thong hi pha hi ti cim maw?

⁴ Mihing tei muhnak bangin thilte hi mu bok cim?

⁵ Ka nunnak uh a com bangin na nunnak poh com bok maw?

⁶ Ita ka sualnak bebek zei in, ka mawhnak a neubelno hei khei tul khawng cim?

⁷ Mawhnak ka neih ngawl hi thei leng ci, mahnaven kuamah in, na khutsung pepan suak thei haw tukma tihvang thei leng ci.

⁸ Na khut tuah kei bawlin semsuah ci. Atu-in mah na khutin keimah siatsuahleh ci.

⁹ Tunglei tuah kei na bawl hi phawkngil thong pahsun. Leivul suakleh tukin ngawivamleh tuk cim?

¹⁰ Ka pian theihnak tukin ka pa i humah zaangtha pia in, ka nu i pum sungah khangtik ci.

¹¹ Ka pumpi cu nguh le tha ngui tuah bawl ci, ka nguh cu taksa le vun tuah tuam ci.

¹² Nunnak pia in itnak vang neitik ci. Na cinkhawi hangin nung poh ing.

¹³ Mahnaven na lungmu sungah na koih kuhmi, Na ngaihsutnak sungah na koih kuhmi cu thei ngah zo toh ing.

¹⁴ Ituk ten sual tuk nentim tin pang leleng ci; Ka sualnakte cu demno hei ngaihdam tum vingviang ma ci.

¹⁵ Mawhnak ka neih bek ten, mi haksa le mi lungbingin suak ing. Thudik ka bawl hei in paallop tawk cuang mang. Lungmu aicang le zakca in um ing.

¹⁶ Lawhtinnak demno ka neih ten, kiosa bangin kei zei paih ci. Keimah liamsuah nuamin, na lamdang bawl lehcet ci.

¹⁷ Ka thutheitu nei leleng ci; ka hum a, na thinuknak cu tam dedeuh; Ka humah na huham hengin, a thuah a thuahin nuai dem ci.

¹⁸ Maw Pathian aw, ita ka nu i pum sung pen tultik kha nge cim? Kua ma muh man laih ngawlin ka thih saw tuk tak.

¹⁹ Ka nu i pum sung pen khanah ka hawhvawk saw ta ahin, pha saw deuh ngangai tuk naven, a piang awng ngawl bangin hi.

²⁰ Ka nunnak hi bo awn toh hi ma maw? Keimahno umtik poh un! Hun dawmno ka neihcalam cu nop zetin mang tung.

²¹ Hawh pal tung, “Kihleh ngawl tohnak ngamah,” lungsiatnak ngam le khuathimnak ngamah hawh tung.

²² Thimnak, thihnak nilim le buainak tuah a dim mi, Vaknak nangawn hei a thim lelengmi ngam a thimmi ngamah hawh tung.