JEREMIAH 9 - Ngawm Bible

¹ Ka lu hi, tuinak bang ahi ahin, ka mit hi hitui ciktui tulnak bang ahi ahin deih sing! Sun le zanin kap tung, a thah sa haw ka mitei ca in kap tung.

² Phillawnah ngiahbuk nei ahin awi sing? Ka mihingte zamsanin um tuk naveng! A venghawng haw in muantak um haw ma, Mi suam mangmi ngeh haw hi.

³ A lei haw tale zolthu son tukin mansa leleng, Thudik hi ngawl, zolthu saw in, a ngam haw uk. Topa in, “Ka mihing ten, thil sual pa khat nung pa khat bawl haw hi. A Pathian haw in ngaisung kha haw ma,” ti hi.

⁴ Akua hei in, a ngualcam cu ngalling zetin, a phial kul, A unaute hei muan theih haw ma. Itakaw titale unau hempoh ten Jakob bangin mizol mang haw hi. Akua na bangin a ngualcam sonsia khawng haw hi.

⁵ A venghawng haw in, a ngualcam pui sual tek haw a, kuamah in thuman sonleh haw ma toh. A lei haw cu zolthuson hilhin, thil sual a bawl haw hei tawp haw ma.

⁶ Siatnak pa khat nung pa khat bawl haw hi. Mi a zolnak haw cu tawp haw ma. Topa in, “Ka miten nunghek zo haw,” tin ti.

⁷ Mah hangin Cungnungbel Topa in, “Ka mihingte hi thik tui bangin huan tui in, khingkhai tung. Ka mihing ten thilpha ngawl bawl zo haw hi. Itin kaw ka tih cuang tuk hi.

⁸ A lei haw cu thihnak thalcang bang. Zolthu bebek son hi. A innnel tei lakah awn pha awn haw naven, a ngangai titale thangsiah haw hi.

⁹ Hitih bang a bawl haw hangin, bawlsia tuk mang maw? Hitih bang miphun tei humah phula tuk mang maw? Keimah, Topa in awn zo ing,” tin ti hi.

¹⁰ Keimah in, “Mual le luam ca in, mithi ngai in kap tung; Lenkolh ca in tau tung, Itahim titale ko khawng zo haw; Mahlai ah kuamah hawhleh haw ma toh. Khui ngung thawmnging hei thang lehma toh. Vano le ngamsate hei tai khawng haw in, taivawk khawng zo haw toh,” tin ti ing.

¹¹ Topa in, “Jerusalem cu khualopin bawl tung, Cingne tei umnak munin; Judah khuapi cu phillawnin suak haw tuk hi. Kuamah i um nuam ngawlnak munah,” tin ti hi.

¹² Donleh ing a, “Topa, itakaw hi ngam hi kua mah zin nuam ngawlmi ah suakin, siatsuah khawngmi le phillawn ngamko bangin a can? Micip akua bekin hi bang thu a theitum um haw maw? Akua in kaw hi bang thu a theitum tuk? Midang a hilh theihnak tuk akua i lak bekah hilhciang awng a cim maw? tin dong ing.”

¹³ Topa in, “Ka mihing ten ka piaksa ka thuhilh mite a zamsan haw hangin hitih bang a cannak haw hi. Ka thu ngai ngawlin ka hilhmi hei zui haw ma.

¹⁴ A lungmu haw khoh mah takin a pupa tei zilh bang bokin Baal milim saw bia haw pohpah.

¹⁵ Mah hangin Cungnungbel Topa Israel i Pathian keimah in ka bawl tukmi hi ngai hemin hi. Ka mihing tei eih tukin a kha mi thingkung pia in, a in haw tukin thihsi pia tung.

¹⁶ Amuh le a pupa haw ten hei hihen a theih awng haw ngawlmi, miphun tei lakah lengkektik khawng tung a, siatsuah khawng a hih laklawh amuh dotu tukin ngalkaptik tung,” ti hi.

Jerusalem Ten Bopnak Ngen

¹⁷ Cungnungbel Topa in, “Thil a piangmi hi ngaisung hem un! Mithi ngaitute sam hem un! Mithi vuinak la a satu numeite sam hem un!” tin ti.

¹⁸ Mipi ten, “Hilh unna, manlangin hung haw henna, keimu ca in mithi vuinak la saksak haw hen. Ka hitui uh bung luluihin, ka kahnak uh ka mit uh bum khawng tianin,” ti haw hi.

¹⁹ Zion kahnak thawm hi ngai hem un! “Lalthong khawng zo hung hi. Zakca zetin um zo hung, a ngam uh taisan nung. A inn uhte phiat khawng hi zo toh,” tin ti haw hi.

²⁰ Keimah in, noh numeite, Topa i awnkam ngai hem un! A hilhmi hi phano in ngai hem un! Na canu uhte mithi ngaihdan hilh un hi. Na ngualcam uhte mithi vuinak la sakdan hilh un hi.

²¹ Thihnak hi a tukvelh uh pen tumin, a kumpi inn uh tian heng zo hi. Khuasung lampi ah naupangte a that tukin le tawhdun khawmnak dawlah tangvalte pailaltik tukin heng zo hi.

²² “Lo sung a, thehmi ekdawm bangin; Miluangte cu mun hempoh ah thehkeh haw hi. Ankung cawmtu ten cangatin, a zam tahaw mi, kuamah i cop nuam ngawl a zalh phengphungmi cang bangin zam haw hi. Hi bangin hilh tukin, Topa in hah hi,” ti ing.

²³ Topa in, “Micip ten a cihnak haw ultung pih pahsuh hen, Mi ngil ten a ngilnak haw tuangkhawng pih pahsuh hen; Mihau ten a hauhnak haw tuangkhawng pahsuh hen;

²⁴ Kua hei hihen tuangkhawn a nuam tale, keimah a theihnak le keimah a theihciannakah tuangkhawng saw hen. Itahim titale ka itnak cu tawp tih nei ngawlin, A dikmi le a manmi bawl leleng ing. Hitih bangte hi ka lungdamtiktu haw hi. Keimah, Topa in hilh zo toh ing,” ti hi.

^25-26 Topa in, “Ka dantatnak tuk hun a hen ten; Izipt mi, Judah mi, Edom mi, Ammon mi, Moab mi le sam comno in, a mettu phillawn ngam a umte siatsuahnak hun heng tuk hi. Hite hi vunceptan haw naven vunceptan nungcang bangin ka thukham cu zui haw ma. Himi ten hihen, Israel miten hihen, kuamah in ka thukham zui haw ma hi,” tin ti hi.