JEREMIAH 7 - Ngawm Bible

Jeremiah In Biakinn Sungah Thuhilh

^1-3 Topa in, Judah mitei Pathian a biaknak haw Biakinn kongka ah keimah hawhtik hi. Mahlai ah dingin Cungnungbel Topa, Israel i Pathian in, a thuthantik hi. A mu lakah, na nungcang uh khel unna, na thil tihdan uh vang khel khawng unna, hi munah ngeipi umtik tung hi.

⁴ ‘Himdam leng tuk hung. Hi cu Topa i Biakinn hi, hi cu Topa i Biakinn hi, hi cu Topa i Biakinn hi,’ ti in, a zolnak haw awnkam cu ngai kha toh pahsuh un.

⁵ “Na nungcang uh cu khel unna, na thil tihdan uh vang khel khawng un. Pa khat le pa khat dikcangnakno in phialdun un hi.

⁶ Ngamdangmi nu le pa nei ngawl meivongte zawnsak viang pahsuh un. Hi ngam sungah sualnak nei ngawl tei thisan luangtik toh pahsuh un. Khawhuai dang biak vang cawl toh un hi. Itakaw titale mahte cu nangmuh siatsuahtu hi haw tuk hi.

⁷ Na nungcang uh na khel uh tale, na pu le pa tei lakah kumkhua ca in ka piaksa mi, hi ngam sungah ngeipi umtik tung.

⁸ “Ngai sung hem un! Zolnak awnkam humah na upnak uh koih uh ci.

⁹ Nguca in, mithat uh ci, nupa sualnak vang bawl uh ci, zolthuson uh ci, Baal pathian lakah biakpiaknak pia inna, theih awng ngawl uhmi pathian bia uh ci.

¹⁰ Hi thil ka huatbel hi bawl uh ci a, mah nungten ka umnak mun, ka Biakinn sungah hungin, ‘Kohte cu himdam ung,’ ti lalaih uh ci.

¹¹ Ka Biakinn hi nguca tei ngelhnak mun hengin maw na ngaihsut uh? Na thil bawl uhmi mu khawng zo ing.

¹² Keimah in biaknak tukin ka ten masabel mi Shiloh ah hawh unna, ka mi Israel a sualnak haw hangin mah khua cu iti bangin bawl ing tih zo hem un.

¹³ Sualnak sial celhngawl bawl zo toh uh ci, atu le tu thuhilh li zo naveng ngai kha nuam ngawlin, ka sam hei ten don nuam ma uh ci.

¹⁴ Shiloh hum a, ka bawl bangin na muanzet uhmi ka Biakinn humah bawlbok tung hi. Na pu le pate uh le nangmu humah ka piaksa mi mun Shiloh a, ka bawl bang cikcekin bawl tung hi.

¹⁵ Na sangngam uh Israel ka hawlvawk bangin nohte vang ka mitmuhnak pen hawlvawk bok tung. Keimah, Topa in hilh zo ing.”

Topa i Thu Ngai Haw Ma

¹⁶ Topa in, “Jeremiah, hi tei ca in thungen nuam pahsuh un; imah ngen pahsun, don cuang tuk mang hi.

¹⁷ Judah ngam khuasung le Jerusalem lampite ah a bawl haw mi mu ma cim maw?

¹⁸ Naupang ten thingcom haw a, pano upa ten mei tuah numei ten vanhum kumpinu tin, a sam haw mi a pathian haw ca in, cangho bawl tukin maida cop haw hi. Khuazing dadang ca in sabittui sungin ka thinnatnak tukin bawl haw hi.

¹⁹ A nattik ngangai haw mi cu keimah ing maw i kaw? Hi kha ma, amuh le muh zahcak piadun hi saw haw hi.

²⁰ Mah hangin Cungnungbel Keimah, Topa in, ka thinuknak cu hi Biakinn humah buak tung. Mihing hum le nganhing hum hei ah hihen, thingkung le an kung humah hei hihen, buak tung, ka thinuknak cu kuamah i cuhmit theih ngawlmi mei bang tuk hi.

²¹ “Ka mite, biakpiaknak khenkhat cu biaklandawh humah a bo veu in haal uh ci, a khen cu nangmu ca in eih theih hi ti uh ci; mahnaven Keimah, Topa i hilhmi cu a venghawngin ei thei tuk uh ci ti ing.

²² Izipt ngam pen na pu le pa uhte ka puitul laihin, halkang biakpiaknak le biakpiaknak a dadang bawl tuk thu imah pia mang hi.

²³ Mahnaven thukham pa khat pia ing. Ka thu ngai un, tin thupia ing. Ka thu na ngai uh tale keimah hi na Pathian uh hi tung a, nohte cu ka mihing hi tuk uh ci. Mah i humah ka thupiak bangin nung unna, nangmu ca ihempoh tuangtung tuk tin, cel zetin hilh ing.

²⁴ Mahnaven ka thuzui ngawlin imah simsial ma uh ci. A lungmu sesuak le thinkhoh i deihnak bangin ihempoh dekin, phatlam zuan ngawlin sia dedeuh haw hi.

²⁵ Izipt ngam pen na pu le pa uhte a tul haw ni pepan tuni tian, a catngawlin nangmu lakah ka nadektu profet hah leleng ing.

²⁶ Pa khatno hei in, a thu ngai ngawlin le imah simsial nuam ma uh ci. Na pu le pa uhte sangin lungmu khoh le dodaltu hi saw lamsang uh ci.

²⁷ “Mah hangin Jeremiah, hi thu hempoh hi ka mihing tei lakah hilh tuk navecin, kuamah in ngai kha haw tukma. Na sam li hei, don kha haw tukma hi.

²⁸ Topa a Pathian haw i thu ngai ngawltu miphun a hih haw khi hilhin hi. Hilhhawl dantatnak hei amu ca phukthong poh hi. Muantak hihnak cu amu lakah nungleh ma toh; a son hei son kha haw ma toh,” ti hi.

Hinnom Munlawnah Sual Haw

²⁹ Jerusalem mite, mithi ngai in kap un hi. Na sam uh met unna, vawk un. Mithi vuinak la mualhumah sa un. Itahim titale keimah na Topa uh ka thinukin, ka mihingte nunghek zo toh ing.

³⁰ Judah miten thilpha ngawl bawl zo haw hi. Ka huatbelmi milimte ka Biakinn sungte ah koihin, ka Biakinn nawngkaitik haw zo hi.

³¹ A canu le capate mei alh sungah vawkin biakpiaknakah a piak theihnak haw tukin Tofeth tihmi biaklandawh cu Ben Hinnom munlawnah tiang haw hi. Hiti bang bawl tukin ka thupiakmi hi kha ma hi. Ka lungmu hei in ka ngaihsut awng ngawlmi hi.

³² Mah hangin hunte cu heng pepel tuk a, Tofeth ahimata Hinnom munlawn tileh ngawltohin, mithahnak munlawn tih hileh tuk hi. Mahlai ah mithi vui haw tuk, itakaw titale mundangah mithi vuinak um tukma.

³³ Miluang cu vano le ngamsa tei ca in, an hi haw tuk a, vano le ngamsa a hawlvawktu kuamah um haw tukma hi.

³⁴ Hi ngam cu ngamko in cang tuk hi. Judah ngam a, khuasung le Jerusalem lampi ah lungdam thatuinak thawmnging le mo lawi ni lungdam lasaknak thawmnging cu botik khawng tung hi.