JEREMIAH 48 - Ngawm Bible

Moab Ngam Siatlalnak Tuk

¹ Cungnungbel Topa in, Moab ngam cungcang cu hi bangin hilh hi: Nebo khua mite cu hehpih huai haw hi! A khuapi haw lalthong zo! Kiriathaim khua cu lonsak hi zo. A ngal kulhtiante siatsuah hi zo! A mihingte cu mualpho in um haw hi.

² Moab ngam sunloihnak cu bo zo hi. Ngal ten Heshbon khua la haw, Moab hinnam siatsuah khawng tukin tuangtim haw! Madmen khua cu veng diudeu tuk hi. Ngalkap ten cil khawng haw tuk hi.

³ Horonaim mite cu, ‘Siatsuahnak! Thisan luannak!’ tin au haw hi!

⁴ “Moab cu sia khawng zo, Naupang tei kah aw cu ngai hem un!

⁵ A taunak haw thawmnging cu ngai hem un. Lampi zui in saklam pen Luhith tian thang hi. Khaw-ngaih thasiatnak thawm cu ngai hem un. Hanglam pen Horonaim tian thang hi.

⁶ ‘Manlangin suakca tukin tai un!’ ‘Phillawn ngamlak a, laak bangin tai un,’ tin ti haw hi.

⁷ “Maob, na ngilnak le na hauhnak muang ci; Mahnaven atu-in nehmi hi tuk ci. Na pathian Khemosh cu a bawite le a thiampi tuah saltannak munah hawh bok tuk hi.

⁸ Khua pa khatno hei sialal ngawlin suakca tukma hi. Munlawn le lawnlai tianin sia khawng tuk hi. Keimah, Topa in hilh zo ing.

⁹ Maob ca tukin suangphut unna, khawmano in, siatsuah khawng hi tuk hi. A khua cu calubuak bangin suak tuk hi. Kuamah umleh haw tukma toh.”

¹⁰ A lungmu sung ngangai tuah Topa i na a dek ngawltute cu tamsiat hi haw hen! Namsau a mang ngawltu le mi a that ngawltu cu tamsiat hi haw hen!

Moab Khua Mite Siatsuahnak

¹¹ Topa in, Moab cu himno le mengdenin um leng hi. Ngalmatmi hi awng haw ma. Moab cu beel pa khat pen a dang pa khatah tot lihmi sabittui bang kha ma hi. Kua ma khalh ngawlmi a tawntilin koihmi sabittui bang hi. A ngim hei sia awng ma, a uk lelengmi sabittui bang hi.

¹² Mahnaven atu-in mi hah tung a, Moab cu a bua lei haw mi sabittui bangin bua lei hun heng tuk hi. A sabittui bua lei haw tuk a, beel cu zan dikdekin sukeh khawng haw tuk hi.

¹³ Israel tei muanzet haw mi a Bethel pathian cu a zahcaktik haw bangin, Moab mite vangin a ngam huai haw Khemosh cu a zakcatik tuk hi.

¹⁴ Moab mite itakaw mi ngalpha ung hi, ngaldo thiammi ung, tin pualthau li uh cim?

¹⁵ Moab le a khua cu siatsuah khawng hi haw hi. A tangval phabelte thah khawng hi haw hi. Keimah hi kumpi ing hi, Cungnungbel Topa ing. Keimah in awn zo toh ing.

¹⁶ Moab ngam i siatnak hun nai zo hi. A siatlal ni heng pal tuk hi.

¹⁷ Hi hinnam tei ca in kap un. A elkim a umtute, a minthannak a theitute vang kap un. A nase zetmi a uknak bo zo. A sunloihnak le a ngilnak umleh ma toh,” ti un.

¹⁸ Noh Dibon khua mite, na sunloihnak mun uh pen tolh unna, leivul lakah khung un. Moab siatsuahtu hung zo hi. A kulhtiante buaksehnakin suak zo hi.

¹⁹ Noh Aroer khua a ummite, lam mawkah dingin ngak un. A tai li mite hu dong un. Iti bang thu piang kaw tih dong un.

²⁰ ‘Moab cu lum zo hi,’ tin hilh tuk ung. ‘A ca in kap un, mualpho in um zo toh hi. Moab cu sia khawng zo, Arnon ngunpi tuanah than un,’ ti haw tuk hi.

²¹ “Mualhum a ummi khua tei humah thukhen ni heng zo hi. Mah khuate cu Holon, Jahzah, Mefath,

²² Dibon, Nebo, Beth, Diblathaim,

²³ Kiriathaim, Bethgamul, Bethmeon,

²⁴ Kerioth le Bozrah khua hi. A khua la hihen, a nai hihen, Moab ngam khua hempoh humah thukhennak heng zo hi.

²⁵ Moab i ngilnak cu sahcat khawng hi zo hi; a huham neihmite cu sialal khawng zo hi. Keimah, Topa in hilh zo ing hi,” ti hi.

Moab Cu Zakca In Um Tuk

²⁶ Topa in, Moab cu zukhamtik un, itahim titale keimah dodaltu hi. Moab cu ama luaksa mi lakah lum kawkawi tuk a, miten nuihsan haw tuk hi.

²⁷ Moab, Israel khi cekpan bawlnakin, na manmi cing laih cim maw? Nguca manin, a bawlsiat haw bangin Israel na bawlsiat bok.

²⁸ Moab ngam a ummite, na khua uhte taisan un! Hawh unna, liangkham lakah ngelh un. Liangkham elkim a, bu a satu khulo bangin um un.

²⁹ Moab cu ultungzet hi. A mihing tei ultung dan, a pualthau dan, a thinlian dan haw le a lungmu ngaihsutnakte thei khawng ing.

³⁰ Topa keimah loli in, a tuangkhawnnak haw cu thei ing. A pualthaunak haw cu phukthong hi; a thil bawlte vang ngei phat tukma hi.

³¹ Mah hangin ka hitui cak tuk hi.

³² Jazer tei ca sangin nase deuhin, Sibmah mitei ca in kap tung. Maw Sibmah khua, Tuipi Thi le Jazer tian a zung a hengmi sabit nguipi bang ci. Mahnaven atu-in, khuakhal hun a, na ngah tukmi hempoh vang siatsuah khawng hi zo hi.

³³ Lungdamnak le thinnopnak cu Moab ngampha sung pen laksak khawng hi zo hi. Sabit ngawinak mun pen sabittui luang ngawltohin, bin khawng ing. Sabit bawltute lungdamin, a autu kuamah umleh ma toh hi.

³⁴ Heshbon le Elealeh khua mite cu kap haw in, a kah aw haw cu Jahaz tian thang hi. Zoar khua miten zain, Horonaim le Eglath Shelishiyah khua le Nimrim ngun tian thang khawng zo hi.

³⁵ Moab mitei pathian biaknak munah halkang biakpiaknak pia thei ngawlin le Pathian tei lakah piaknak bawl thei ngawlin kham tung hi. Keimah, Topa in hilh zo ing.

³⁶ “Mah hangin mithi la tumthahin, mithi vuinak lasatu bangin Moab le Kir Heres mitei ca in ka lungmu hitui cak hi, itahim titale a neih haw hempoh bo khawng zo.

³⁷ A venghawng haw in, a sam haw le a kha multe met haw hi. A venghawng haw in, a baan haw satin thangkhau puan silh haw hi.

³⁸ Moab ngamsung a, inn hum hempoh le khua hempoh a, khuahialah mithi ngaihnak tuah dim hi, itahim titale Moab cu kuamah i deih ngawlmi, beelkeh sesuak bangin sukeh khawng zo ing.

³⁹ Moab ngam cu tamzan khawng zo! Kapin tau un! Moab cu mualpho in um zo hi. Buaksehin suak zo. A elkim hinnam ten cekpan bawlnakin mang haw hi. Keimah, Topa in hilh zo ing,” ti hi.

Moab Ca Luatnak Um Ma

⁴⁰ Topa in, hi bangin hilh ham hi; Minam nam khat ten Moab cu mupi in ak a dawk bangin dawk tuk a,

⁴¹ Khuano hei hihen, khua kulhtiante hei hihen, la khawng tuk hi. Mah ni ten Moab ngalkapte cu numei nauhing kuan bangin thinsu linglawngin um haw tuk hi.

⁴² Ka humah ultung zetin, a um hangin, Moab cu siatsuah khawng hi tuk a, hinnam pa khat suakleh thei haw tukma toh hi.

⁴³ Moab cu mullinghah, khuk thukpi le mi awktu thang ten pang leng haw hi. Topa i awn zo hi.

⁴⁴ Mullinghah pen taitul tuk a tumtu cu khuk sungah cak tuk hi. Khuk thuk sung pen tulin a taite cu thangin, awk tuk hi. Itahim titale Topa in, Moab siatsuah tukin ni ciangtan zo hi.

⁴⁵ Bawmtu nei ngawl ngaltaite cu kumpi Sihon i ukmi Heshbon khua sungah himnak zei haw naven mei in mah khua cu kang khawng. Ngaldo napzet Moab ngam le mual sangpite kang khawng zo hi.

⁴⁶ Moab mite cu hehpih huai haw! Khemosh pathian a biatute cu siatlalnak tawk haw in, a canu le a capate cu ngalmatmi le thawngta mi ah suak khawng zo haw hi.

⁴⁷ Topa in, Moab cu a heng tuk laihmi hunah neinung zetin bawlleh tuk hi. Hihi cu Topa i awnkam hi a, Moab humah kim tuk hi.