JEREMIAH 46 - Ngawm Bible

Karkhemish Ah Izipt Ngal Sung

¹ Topa in, hinnam tei thu le late ka lakah hilhin,

² Izipt thu pepan hi. Jehoiakim in Judah kumpi a deh sawng kum linakin, Babilon kumpi Nebuchadnezzar in Izipt kumpi Neko cu nehin, Izipt ngam cungcangah Topa in hi bangin ti hi.

³ Izipt ngalbawite cu au haw, ‘Na lumphaw uh mansa in um unna, ngaldonak munah hawh un!

⁴ Na cipuh uhte tuangtim unna, a humah khung un! A zawndunin ding unna, na thik lukhu uh khu un! Na ceipi uh hiam zetin tat unna, na thik angki uhte silh un,’ ti haw hi.

⁵ “Mahnaven ka muhmi hi i heng? Thinsu in nunglam a kih haw mu ing. A ngalkapte haw nunglamah a kik haw mu ing, lau leita in, a tai keh khawng haw mu ing. Nunglam hek kikleh haw ma hi.

⁶ Mahnaven taicakte tai suak haw ma hi. Ngalkapte cu luat cuang haw ma hi. Eufrates el Saklamah lum haw hi.

⁷ Nail ngunpi bangin a khangthuah lite hi akua haw him? Tuimawk let tianin, a luangmi ngun bangin!

⁸ Izipt hi, Nail ngunpi bangin a khangtu cu! A mawk tiang a letmi ngunpi bangin hi. Izipt in, ‘khangto tung a, leihum buppi khuh khawng tung; khuapi hempoh cu a sung a um mihingte tuah! siatsuah khawng tung.

⁹ Cipuhte hawh tukin thupia un, cipuhlengte vang tai zuzut tukin! Ngalkapte kuat un, Ethiopia le Libia ngam a, thalkap thiamte,’ ” ti haw hi.

¹⁰ Tuni hi Cungnungbel Topa i ni hi. Tuni in phu la tuk hi. Tuni in, a ngalte bawl sia tuk hi. A ngalnam cu ei tuk a, vonvahzet tuk hi. A thisan intuk a, khamzet tuk hi. Tuni in Cungnungbelin biakpiaknak bawl hi, Saklam ngam Eufrates ngun mawkah!

¹¹ Izipt mite, Gilead ah hawh unna, damnak si zei un hi! Na si uhte mantak ngawlin suak khawng tuk a, damtik thei haw tuk ma hi.

¹² Minam hempohin, na zahcaknak thei zo haw hi. Na kahnak cu leihum buppi ah thang hi. Ngalkap cu a dang ngalkap humah lum hi. A pa nih haw in leihumah lum haw hi.

Nebuchadnezzar Heng

¹³ Babilon kumpi Nebuchadnezzar cu Izipt do tukin a hen ten Topa i awnkam ka lakah heng hi:

¹⁴ Izipt khua tei lakah thanin; Migdol, Memfis le Tahpanhes lakah, ‘Tho unna, tha suah un, Na neihmi uhte cu ngaldonakah, siatsuah khawng hi haw tuk hi!

¹⁵ Ita na pathian uh a maksanmi Apis cu lum kaw? Topa in, a vahvawk hang hi,’ ti in hi.

¹⁶ Na ngalkap uhte cu atu-in, lum haw hi. Pa khat le pa khat otpihdun haw in, ‘Nawhkhah un! a inn uh le a mihing tei lakah kikleh nung, A ngal tei ngalnam lak pen tai nung,’ ti haw hi.

¹⁷ “Izipt kumpi lakah min thak pia un, ‘Hunpha Pialtiktu Pontam Pa,’ ti un hi.

¹⁸ Cungnungbel Topa, Keimah hi kumpi ing. Keimah hi a nungmi Pathian ing. Mual dangte sangin Tabor mual a san bangin, tuipi hum a, Karmel mual a din bangin, Nangmah a dotu i ngilnak cu hi tuk hi.

¹⁹ Izipt mite, sila mat pui vawkmi hi tukin mansa un. Memfis khua cu phillawnin suak tuk hi. Kua ma um nuam ngawlnak phillawn ngam hi tuk hi!

²⁰ Izipt cu khui thauzet bang hi. Mahnaven saklam pen khuai-ngalin dep.

²¹ Ni lawh a piakmi ngalkapte hei in, khuino bangin imah nemcuam haw ma. Thasuahin ngaldo kuamah um haw ma hi. A venghawng haw in nunglamah heklehin taivawk haw hi. A lung-ap ni haw heng zo hi. A siatlalnak hun heng zo.

²² Izipt cu thawmvang nei zetin taivawk hi. Ngul bangin mi phit thahin, ngalte a hen haw ten! Heipi tuah do in, thingkungte phuk khawng haw hi.

²³ Tupi thingte a siatsuah khawng haw bangin, A mihing haw cu sialcelh haw ma. A ngalte cu miksi sangin tam saw haw hi.

²⁴ Izipt mite cu zakca in um haw hi; saklam miten neh haw hi. Keimah, Topa in hilh zo ing.”

²⁵ Cungnungbel Topa Israel i Pathian in, “Thebes khua a pathian Amon cu Izipt le a pathian le a kumpite tuah dantat tung hi. Izipt kumpi le amah a muangtute hempoh la tung a,

²⁶ Amah a that nuamtu Babilon kumpi Nebuchadnezzar le a ngalkap tei khutah pia tung hi. Mahnaven hun dawllam ten Izipt ngam sungah a tanglaihmi a um zo haw bangin umleh haw tuk hi. Keimah, Topa in hilh zo ing hi,” ti hi.

Topa In A Mihingte Pan Tuk

²⁷ “Ka mihingte lau pahsuh un; Israel mite na thinsu pahsuh un, thang na tannak uh ngam khawlapi pepan tung hi. Kikleh tuk uh ci, a lungmuang zetin um tuk uh ci. Himno umin, kuamah in lautik haw tukma hi.

²⁸ Na lak uhah hungin hup tung hi. Ka khenkhekmi ngam le hinnamte cu siatsuah tung. Mahnaven nohte cu siatsuah tuk mang hi. Bawlsia ngawlin hah thong tuk mang. Mahnaven ka bawlsiat ten, dik zetin bawl tung hi. Keimah, Topa in hilh zo ing.”