JEREMIAH 40 - Ngawm Bible

Gedaliah Lakah Jeremiah Um

¹ Babilon ngalkap hotu ngalbawi Nebuzaradan in Ramah pen a luattik nungten Topa i awn cu ka lakah heng hi. Judah mi le Jerusalem mite cu sal matmi hi haw naven Babilon ngam lamah a hawhpih haw laihin, kei vang cu matmi ka hih bok hangin thik taicin tuah Ramah khua ah ka hen loknak hi.

² Ngalbawipa in mundangno ah pui in, “Topa na Pathian in hi ngam humah siatsuahnak hengtik tung, tin, a tihmi cu,

³ atu-in, a hilh hamsa bangin heng ngangai hi. Na mihingte sualin, Topa i thu a ngaih nuam haw ngawl hangin, hitih bangin, a piannak hi.

⁴ Tuni pepan na khut a thik taicin cu duk tung a, hah tung hi. Keimah tuah Babilon ah na hawh nuam tale hawh thei ci; phano in cingkhawi tung. Na hawh nuam ma tale nangma thu hi. Hi ngam pumpi sungah na dedeih teng inna, nangmah in, a lem le a pha na tihnak hempoh ah hawhin,” ti hi.

⁵ Awn viang ngawlin ka um ten Nebuzaradan in, “Judah ngamuktu tukin Babilon kumpi i bawlmi Shafan i tupa Ahikam capa Gedaliah lakah kiklehin hi. Amah tuah mipi lakah umin; mahma tale na hawh nuamnakah hawh kawi pohin tin,” ti hi. Laksawng pia in, lam an a ket ceng ten hah hi.

⁶ Ahikam capa le Gedaliah lakah hawh ing a, Mizpah a, amu lakah um ing. Ngamsung a tangmi ka mi pih tei lakah um ing.

Judah Ngam Uktu Gedaliah

⁷ Judah ngalbawi khenkhat ten lemnak bawl haw ma. Judah ngam sungah zamta mi, ngalmat sungah a tel kha ngawl mi ca-ngahbelte zotu in le hotu tukin Babilon kumpi in Gedaliah koih hi tih thu a zak ten haw hi.

⁸ Nethaniah i capa Ishmael, Kariah i capa Johanan, Tanhumeth i capa Seraiah, Netofah pen Efai capate le Maakah pen Jezamiahte cu Gedaliah lak Mizpah ah hawh haw hi.

⁹ Gedaliah in, “Amu nelah Babilon ngalkap tei lak a, lemnak bawl tukmi cu noh tei ca lau tuk imah umma hi, tih ciang zetin hilh ing. Hi ngam sungah umin, Babilon kumpipa i na cu dek poh unna, nangmu ca in ihempoh lemcang khawng tuk poh hi.

¹⁰ Keimah vang Mizpah ah um tuk poh ing, Babilon mi a hun ten nangmu palai hi tuk poh ing. Sabitte, thingngahte, olif situite cawm unna, phano koih un; mahten na lak uhmi khua sungah mengdenin um poh un,” ti hi.

¹¹ Babilon kumpipa in Israel mi khenkhatte cu Judah ngam sungah umtikin, amuhte cingkhawitu tukin Gedaliah cu koih hi tih cu Moab ngam, Ammon ngam, Edom ngam le ngam dadangah a umtu Israel ten za haw hi.

¹² Mah hangin a tainak ngam tek haw pen Judah ngamah pinkik khawng haw hi. Mizpah khua Gedaliah lakah hung haw a, mahlai ah sabit le thingngah tampi cawm haw hi.

Gedaliah That Haw

¹³ Mah nungten Johanan le lemnak a bawl nuam ngawltu ngalkap hotute cu Gedaliah umnak Mizpah ah hungin,

¹⁴ A lakah “Ammon kumpi Baalis in nangmah that tukin Ishmael hah hi, tih thei ma cim maw,” tin ti haw hi. Mahnaven Gedaliah in sang ma hi.

¹⁵ Johanan in Gedaliah cu a kuhno in, “Ishmael cu keimah in that nangin, na a thattu akua him tih kuamah in thei haw tukma hi. Nangmah thah tuk cu iti bang zo thong thei tuk ung kaw? A that ngangai bang ahin, nangmah a zuantu Judah mite mun tihkimah lengkek leleu haw tuk a, Judah ngamah a tangmi mipi vang bo lawh tuk ung tin,” ti hi.

¹⁶ Mahnaven Gedaliah in, “Imah tang ti tukma hi; Ishmael i thu na hilhmi hi thuman kha ma tin,” ti hi.