JEREMIAH 32 - Ngawm Bible

Jeremiah In Lo Ngam Pa Khat Lei

¹ Topa in, Jedekiah in Judah kumpi a deh kum sawmnakin ka lakah thuhilh hi. Mah kum cu Nebuchadnezzar Babilon kumpi a dehnak kum sawm le kum liatnak bok hi.

² Mah kumin, Babilon kumpi i ngalkap ten Jerusalem do haw a, kei cu kumpipa i inncingtu tei khan pa khat sungah khahkhum haw hi.

³ Kumpi Jedekiah in mahlai ah thawngkhia in, a khiaknak thu cu, “Topa i awnkam na phuannak hangin hi ti hi. Topa in hi tin hilh hi, “Babilon kumpipa cu hi khuapi latik tung a,

⁴ Kumpi Jedekiah vang luat tukma hi. Babilon kumpipa i khut sungah piak hi tuk hi. Maitonin mudun haw tuk a, bulpakin otpihdun haw tuk hi.

⁵ Jedekiah cu Babilon ah pui hi tuk a, a thu ka sonsak laklawh, mahlai ah um tuk hi. Babilon mite cu a do vangin lawhting tukma hi. Keimah, Topa in hilh zo toh ing,” tin ti hi.

⁶ Topa in thuhilh a,

⁷ ka pasal Shallum i capa Hanamel cu ka lakah hung tuk hi. Benjamin ngamsung Anathoth khua a, a lo cu keima lei tukin keimah tawk tuk; itakaw titale a unaupih lak pen a naibel ka hih hangin keima ca in, a lei theitu tukmi ing.

⁸ Topa in, a hilh ceng bek ten Hanamel cu ka umnak khansungah hungin lo leitik hi. Mah hangin Topa in ka lakah a otmi hi man hi tih thei ing.

⁹ Hanamel lak pen lo cu lei ing a, sum cu cuaikhai in teh ung. Aman cu ngun tangka sawm le salih man hi.

¹⁰ Lungkimnak thukam bawl ung a, ka min ngan ing. Thu theihpihtu samin, sum cu cuai tuah khai ung hi.

¹¹ Lo leinak thukam cu pa nih bawl ung. Pa khat cu tacik khet ngawlmi hi. Keima ca in, a pa nihin la ing.

¹² Mahseiah i casuan Neriah capa Baruch lakah pia ing. Hanamel mitmuh le lo leinak min khentu, thu theihpihtute le mah khansungah a khungtu tei mitmuhin Baruch lakah pia ing.

¹³ A venghawng haw i mai pen, Baruch lakah,

¹⁴ “Cungnungbel Topa, Israel i Pathian in hi lo leinak thukam hi kum ngeipi tian pai ngawlin a umnak tuk tacik khetmi hihen, khet ngawlmi hei hihen, kum ngeipi a sia tuk ngawlin leibeel sungah phano koih tuk tin thupia hi.

¹⁵ Cungnungbel Topa, Israel i Pathian in, inn le lo le sabit huante cu hi ngam sungah leidunleh hi tuk hi,” tin ti hi.

Jeremiah i Thungetnak

¹⁶ Lo leinak lai cu Baruch lakah ka piak nungten thungen ing.

¹⁷ A haubel Topa, lei le van hi na ngilnak le na huhamin bawl ci. Na ca in, a haksa tuk imah umma hi.

¹⁸ Mihing sialcelh ngawl tei humah na itnak langtik zo ci. Nang cu a maksanmi le a nase zetmi Pathian ci.

¹⁹ Nang cu thu ngaisung thiamtu, thasiahhuai nalamdang bawltu ci. Mihing tei bawlmi hempoh mu khawng ci a, a nadehman haw laksawng pia ci.

²⁰ Kum ngeipi laihin, Izipt ngamah thasiahhuai le nalamdang bawlin tuni tian Israel tei lakah hihen, miphun dadang lakah hihen, bawl nawm hih laih ci. Mah hangin vanhaang nuai ah na minthang hi.

²¹ Thasiahhuai le nalamdang na bawlmi in ka ngal uhte lautikin, na huham le na ngilnakin Israel mite cu Izipt ngam pen suahtul ci.

²² Hi ngam, ngampha le ngam mawi hi a pu le pa tei lakah na tepsa bangin amu lakah pia ci.

²³ Mahnaven hi ngam sungah hengin, a luahtum haw ten na thukham zui ngawlin le na thuzilh bangin nungsih haw ma. A bawl haw tukin na thupiak hempoh imah bawl haw ma hi, mah hangin hitih bang siatsuahnak cu a hum hawah hengtik ci.

²⁴ “Babilon ten a khuapi haw a latum tukin a pua lam pen lei tiangin, do tawtok haw hi. Ngaldonak, pamnak le natnakin hi khuapi cu a khutsung hawah hengtik tuk hi. Na otmi hempoh kim khawng hi, tih cu mu khawng zo ci.

²⁵ Mahnaven Cungnungbel Topa, Babilon mihing ten hi khuapi la awn haw toh naven thu theihpihtu tei muh loli in, lo lei tukin thupia sih ci,” tin ti ing.

²⁶ Topa in ka lakah,

²⁷ “Keimah cu Topa ing. Kei ca in, a haksami imah umma hi.

²⁸ Hi khuapi cu Babilon kumpi Nebuchadnezzar le a ngalkap tei khutah pia tung; la haw tuk a,

²⁹ Mei tuah haal haw tuk hi. Himi ten a inn hum haw a, Baal pathian lakah namtuite halin pathian a dadang tei lakah sabittui pia in, a leih haw hangin ka thinuktik haw hi. Hi mite cu a innte tuah tum bilhbelhin halkang khawng haw tuk hi.

³⁰ A tangthu haw a pattungno in Israel le Judah ten ka thinuktik haw in, a thil bawl haw mi hempohin ka thinuktik zo hi.

³¹ Hih khuapi sungmi ten khuapi cu din pan haw ni pepan ka thinuktik haw hi. Siatsuah tukin khencat zo ing.

³² Itahim titale Judah mi le Jerusalem miten a kumpi le a hotute, a thiampi le a profet tuah thil siasuak bawl haw hi.

³³ Nunghek haw a, hilh li naveng ngai kha haw ma, a cun hei cung nuam haw ma hi.

³⁴ Ningdelhhuai a milimte hei cu keimah biaknak tukin sakmi Biakinn sungah koihin, nawngkaitik zo haw toh hi.

³⁵ A capa le a canute Molek lakah biakpiaknakin piak tuk Baal pathian lakah Hinnom munlawnah biaklan dawh haw hi. Mahti bang bawl tukin thupia mang, mahtih bangin bawl haw tuk a, Judah mite sualtik haw tuk tih cu ka ngaihsut khak ngawlmi,” ti hi.

Muansannak Thutiam

³⁶ Topa Israel i Pathian in, ka lakah, Jeremiah, ngaldonak, pamnak le natnakin hi khuapi cu Babilon kumpipa i khutah hengtik tuk tin, himi ten ti haw hi. Atu ka ot tukmi hi ngai hih hemin!

³⁷ Ka thinuknak hangin ngam tampi ah ka khen kehnak pen cawm khawm tung. Hi ngamah kiklehtik tung a, lungmuang zetin um haw tuk hi.

³⁸ Amuhte cu ka mihing hi haw tuk a, kei cu a Pathian haw hi tung.

³⁹ A nunnak haw a, a tuptah haw mi ah kumkhua in keimah cu upatnak pia haw tuk hi.

⁴⁰ Amuh tuah kumkhua ca in thutepnak bawl tung. Amu ca thilpha bawl cu cawl thong tuk mang. A lungmu hempoh haw tuah keimah a kihcaknak haw tukin, bawl tung, mahten ka nel pen pialleh haw tukma toh.

⁴¹ Amu ca in thilpha bawl cu noptik tung a, hi ngamah a kumkhua in khotik tung hi.

⁴² “A hum hawah thil poimawh ka hentik zo toh bangin, amu lakah thilpha ka tepsate cu hengtik ngut tung hi.

⁴³ Miten hi ngam cu phillawn ngam bangin mihing le ngamsa tei um ngawlnak ngamah cang tuk a, Babilon mitei khutah piak hi tuk, tin ti haw hi. Mahnaven hi ngamah lo le lei ngamte leileh haw tuk hi.

⁴⁴ Miten lo lei haw tuk, a leidun lungkimnak lai bawl haw tuk, khutpi nem haw tuk a, thu theihpihtu vang um haw tuk hi. Hitih bang hi cu Benjamin ngamsung le Jerusalem khua el khuanote, mual bul ngam le Judah ngam hanglam ngamsung hei ah bawl haw tuk hi. Amu ngam sungah umlehtik tung. Keimah, Topa in hilh zo ing,” ti hi.