JEREMIAH 31 - Ngawm Bible

Israel Kihlehnak Tuk

¹ Topa in, “Israel miphun hempoh tei Pathian ka hih tuk hun heng tuk a, a muhte cu ka mihing hi haw tuk hi.

² Phillawnah thihnak pen a luatmi tei lakah hehpihnak langtik ing. Israel miten colhdamnak a zei haw laih takin,

³ lam khawla pi pen amu lakah lang ing. Israel mite, ka ihzet sa mi hi uh ci, na hum uhah itnak cu a tawp ngawlin nei tung.

⁴ Tungdingleh tung a, na khuangnote tuah lungdamin lam zezeuh leh tuk uh ci.

⁵ Samaria mualah sabit huan bawlleh tuk uh ci. Huan sung pen a suakmi an ei tuk uh ci.

⁶ Mahzuh hi, ngalcingtu ten Efraim mualhum pen, ‘Zion ah hawh nung, Topa a Pathian uh i lakah, tin, a aunak haw tuk hun heng tuk,’ ” tin ti hi.

⁷ Topa in, “Israel i ca lungdamnak tuah au un, miphun lak pen miphun ngengbel i canu tei ca in, Topa in, a mihingte pan zo toh, a tang calamnote vang hup zo hi, tin lungdamnak la sa un.

⁸ Saklam pen pui khawm tung. Vanmawk deng pen cawm khawm tung. Mitcaw le kebai thahin hung haw tuk hi. Numei naupai le, nauhing kuante tuah a kihleh haw ten miphun ngengpi hi haw tuk hi.

⁹ Ka mihingte cu a kapthahin kikleh haw tuk hi. Pui kikleh tung thungen thahin hi. Tui luannak munah khol tung. A bah haw ngawlnak tukin lampi tuang pen, Israel ca in, a pa haw bang tung a, Efraim cu ka capa upabel,” ti hi.

¹⁰ Topa in, “Miphun hempoh, ngai unna, ka thu cu tuipi mawk khawlanak ah phuang un. A mite khenkeh khawng ing. Mahnaven cawmleh khawng tung. Tuucing ten tuu a khol bangin, kholleh tung hi.

¹¹ Israel mite cu luattik zo ing. A ngilzet mi miphun tei khut sung pen luan zo ing.

¹² Zion mualah lungdam zetin lasa thahin hung haw tuk a, an, sabit, olif situi ka laksawng hangin le tuu le khui ka laksawng hangin thatui haw tuk hi. Tui tamzet leihmi huan bang haw tuk a, a kulmi haw hempoh nei haw tuk hi.

¹³ Khanglaite lamin, lungdamzet haw tuk hi. Tangvalte le khangno, upa ti ngawlin lungdamzet haw tuk hi. Hehnem tung a, a mithi ngaihnak haw cu lungdamnakin thek tung hi. A thasiatnak haw cu a thatuinakin bawl tung.

¹⁴ Thiampi tei pum cu an ukbel tuah vonvahtik tung. Ka mihing tei deihmi kimtik khawng tung. Keimah, Topa in, hilh zo ing.”

Israel Humah Topa Hehpihnak

¹⁵ Topa in, Ramah khua ah aw nging za haw, taunak le kahnak aw hi. Rachel cu a cate ngai in kap hi. A hawhsan khawng haw hangin, a lemin, ngimtik theih ma.

¹⁶ Kap ngawltohin, suup inna, na hitui hu tohin hi. Na ca tei ca na bawlmite cu dehman laksawng ngah ngawlin um tukma ci. Ngal tei ngam pen kikleh haw tuk hi.

¹⁷ Na mailam ca in muansan tuk um hi. Na cate cu kikleh haw tuk hi. Keimah, Topa in hilh zo ing.

¹⁸ “Israel mite thasia zetin, a kah haw za ing. ‘Topa, khem laih ngawlmi nganhing bang kek ung. Mahnaven nangmah in, na thu zui dan tuk hilh ci. Kiklehtik zazalin hi, na lakah kikleh tukin mansa hial ung. Kohtei Topa le Pathian!

¹⁹ Nangma lak pen mundangah pial ung. Mahnaven ngei can um ngawlin kikleh nuam ung. Na bawlsiat nungsang cu thasia in lu kun thong ung hi. Zakca le mualpho in umthong ung hi. Ka khanno uh laihin ka sual uh hangin,’ ti haw hi.”

²⁰ “Israel, nang cu ka capa deihbelmi ci. Ka ihbelmi ka capa ci. Na min ka lawh sial ten itnak tuah ngaisung leleng ing. Ka lungmu hi nangmah ngawlin um thei ma hi. Hehpihnak na lakah nei leleng tung.

²¹ Lampi humah melciknak le sialsiahnak bawl inna, na hawhnak sa lampi lun khi zei kiklehin hi. Israel mite kikleh unna, na zamsa uhmi khuate ah zuanleh un hi.

²² Muantak ngawl mihingte, Ituk tuk tian kaw lungmu aicangin, na um hih tuk uh? Thil a thak le phundangin piangtik zo toh sing. Thil a thak le phundang a hihdan cu, Numei in pano humhim tuk tih bang miau in dangsazet hi.”

Pathian Mihing Tei Mailam Ca Tuk

²³ Cungnungbel Topa, Israel i Pathian in, sal a tannak pen a ngam hawah ka pui kikleh ten Judah ngam le a khua hawah; ‘Topa in, Jerusalem mual thiang cu, muicu pia zal tahen, A ma umnak mun thiangtho hi, tin tileh haw tuk hi.’

²⁴ Judah khua le ngamah, mi um haw tuk a, lobungte le tuucingte vang a tuu a honte tuah um haw tuk hi.

²⁵ Tamsawl mite a tha haw henglehtik tung a, an ngawlin a tamsawl mite an khamtik tung.

²⁶ Mah hangin mipi ten, ‘Hihbu ing a, lungvak seuhin tho ing,’ tin ti haw tuk hi.

²⁷ “Keimah, Topa in, ti ing. Hun heng tuk a, Israel le Judah ngam cu mihing le nganhing tuah dim lehtik khawng tung.’

²⁸ Botvawk ing a, bal khawng ing, vawk mangin, siatsuah ing a, ka paih mangtik bangin atu hei in ngalling zetin phut tung a, dinglehtik tung hi.

²⁹ Mah hunin mipi ten; ‘A nu le pa ten sabit thuk ei haw, Mahnaven a ca tei ha di,’ ti haw tukma toh.

³⁰ Akua hei hihen sabit thuk a eitu cu ama ha di tuk hi. Akua hei hihen ama sualnak hangin thihnak tawk tuk,” ti hi.

³¹ Topa in, “Israel le Judah mite tuah thutepnak a thak ka bawlnak tuk hun heng tuk hi.

³² A pu le pate Izipt ngam pen a khut haw pen ka puitul laihin, amuh tuah thutiamnak ka bawlmi, thutepnak a lun bang kha tukma hi. A pa haw bang naveng amuh ten mah ka thutepnak cu zui haw ma.

³³ Israel tuah thutepnak ka bawlleh tukmi cu hitih bangin hituk hi. Ka daan cu a sungmu ngil hawah koih tung a, a lungmu sungah ngan tung. Kei hi, a Pathian haw hi tung a, amuhte cu ka mihing hi haw tuk hi.

³⁴ Kua ma mah Topa thei tukin zilhdun kulleh haw tukma toh. Itakaw titale a ngeng le neu tih um ngawl, a venghawng haw in thei khawng haw tuk hi. A sualnak haw ngaidam tung, a mawhnak haw cing leng tuk mang. Keimah, Topa in hilh zo ing,” tin ti.

³⁵ Topa in, sun khuavaktiktu tukin ni bawl, zanlam vaktiktu tukin Hade le aksite bawl hi. Tuipi cawktikin thum dudumtik hi. A min cu Cungnungbel Topa hi.

³⁶ Lei le van, ni le ha a um sungin, Israel miphun vang um bok tuk tin Topa in t hutiam zo hi.

³⁷ Ni kha khat ten humlam van khi, suum teh theih bang a hin, leipi i bul khi kan theih ahi bang ahin, Mah bek ten Israel miphun hi lawl tuk laih, A thil tih sualnak haw i hangin, Topa in hilh zo tin ti hi.

³⁸ Topa in, “Jerusalem cu a pumpi in keima khuapi in tundinleh a hihnak hun heng tuk hi. Hananel inn dot sang pen a upnak ni tumnak lam kongbiang kil tian lemleh khawng tuk hi.

³⁹ Khuapi ngam ngi cu mahlai pen ni tumnak lamah Gareb mual tian, mahten a kimsuakin Goab tian hi tuk hi.

⁴⁰ Mithi vuinak le buak a vawknak haw munlawn buppi le Kidron luimawk kuam hum a, ngam hempoh, nisuahnak lam pen cipuh kongka tian, a venghawngin keima ca in mun thiangtho hi tuk hi. Khuapi cu ituk mahten phiat le siatsuah hileh tukma toh,” tin ti hi.