JEREMIAH 30 - Ngawm Bible

A Mihing Tei Lakah Topa Thutepnak

¹ Topa, Israel i Pathian in,

² ka lakah, “Ka hilhmi thu hempoh cu hi laibu sungah ngan khawngin hi.

³ Itahim titale ka mi Israel le Judah mite ka kiklehtiknak tuk hun heng tuk hi. A pu le pa tei lakah ka piakmi ngamah kiklehtik tung a, amu ta hileh tuk hi. Keimah, Topa in hilh zo ing,” ti hi.

⁴ Topa in, Israel le Judah mitei lakah:

⁵ “Launak aw nging za ing, lemdaihnak hi kha ma.

⁶ Cawl hihin, ngaisung hih hem un! Pano in cano hing thei ni maw? Itakaw numei nauhing kuan bangin, pano ten a pum a dom lih haw? Ita maidal khawng haw kaw?

⁷ Lauhuai le mulling hah ni heng tuk hi. Mahti bang ni cu um awng ma hi. Ka mihing tei ca in lungmu tamnak ni hi. Mahnaven thuak zo haw tuk,” ti hi.

⁸ Cungnungbel Topa in, “Mah ni a hen ten, a ngawng haw a kolhak cu ektuah khawng tung, ngamdangmi tei sila in, umleh haw tukma toh.

⁹ Keimah, Topa a Pathian in kumpi in ka bawl tukmi David casuan tei na dek haw tuk hi.

¹⁰ “Ka mite aw, lau pahsuh un; Israel mite aw lau pahsuh un hi. Ngam khua lapi pepan tung, na saltannak uh ngam pen. Na ngam uhah kikleh tuk uh ci a, lungmuang zetin um tuk uh ci. Him zetin um tuk uh ci a, khuaveng viang tukma uh ci.

¹¹ Nangmu lakah hungin pan tung. Nangmuh ka khenkheknak ngamte cu siatsuah tung hi. Mahnaven nohte cu dantat tuk mang hi. Bawlsia ngawlin um tuk mang hi; Mahnaven ka dantat ten dikcangnak tuah bawl tung. Keimah, Topa in hilh zo toh ing tin,” ti hi.

¹² Topa in, a mihing tei lakah, na meima uh damleh thei tukma toh. Na liamma uh hi nasezet thong hi.

¹³ A cingkemtu kuamah um haw ma. Na meima uh noih tuk si um sih ngawl na damnak tukin muansan tuk imah umma hi.

¹⁴ A ngaitu ten phawkngil khawng zo haw toh hi. Imah kinmawh khaleh haw ma toh. Ngal bangin bawl ing. Bawlsiatnak na thuak uh hi nasezet hi. Itahim titale na sualnak uh tamin, na phat ngawlnak uh nase ngangai hi.

¹⁵ Na liamma thuaknak uh hangin phuciak toh pahsuh un hi. Na damnak tuk uh umma; Hitih bangin bawlsia ing. Itahim titale na sualnak uh tamin, na phat ngawlnak uh nase leita hangin hi.

¹⁶ Mahnaven atu-in nangmuh a thontute khi, thon khawng sak hi haw tuk hi. Na ngal uhte uh cu ngalmatmi in cang haw tuk hi. Nangmuh a zawnsaktute cu zotsakmi hi bok haw tuk hi. Nangmuh a bawlsiatute cu bawlsialeh bok haw tuk hi.

¹⁷ Dam lehtik tung hi. Na meima uhte damtik tung. Na ngal uhten, ‘Zion cu lawlmi hi. Kuamah in imah in sial haw ma a ti haw hei in,’ Keimah, Topa in awn zo toh ing,” ti hi.

¹⁸ Topa in, “Ka mihingte cu a ngam hawah kiklehtik tung a, A innkua haw hempoh ah hehpihnak nei tung. Jerusalem cu dinleh hi tuk a, a kumpi inn cu lemleh hi tuk hi.

¹⁹ Mahlai a ummi ten thangphatnak lasa haw tuk hi. Lungdamin au haw tuk hi. Thupha pia tung a, pungzaizet haw tuk hi. Muicu ka piakmi hangin upatnak ngah haw tuk hi.

²⁰ Ni dang laih a neihmi haw huham cu pialeh tung. Kho zetin dinglehtik tung. Amuh zawnsaktu cu bawlsia tung.

^21-22 Amuh uktu cu amu miphun sung pen piang tuk hi. A kumpipa haw i capa cu amu miphun hi tuk hi. Mahpa in, ka sam ten keimah nek tuk hi. Akua kaw sam ngawlin, a hung ngam tuk hi. Amuh cu ka mi hi haw tuk a, kei cu a Pathian haw hi tung hi. Keimah, Topa in hilh zo ing.”

^23-24 Topa i thinuknak cu huihpi bang hi. A lau lih haw mi huihpi bang a, misual tei lu humah theu tuk hi. Bawl tuk a tupmi a bawl khawng laklawh tian, dai hihim tukma. Hi thu hi a heng tuk laihmi hunah a mihing ten ciang zetin thei haw tuk hi.