JEREMIAH 22 - Ngawm Bible

Judah Kumpipa Inn Ca Thucah

^1-2 Topa in, David casuan Judah kumpipa i innah hawhin, kumpipa le a khutnuai bawite cu Jerusalem tei lakah a thuhilhmi ngai tukin hilhin tin ti hi. Topa in,

³ keimah Topa in, thupia ing; dikcangnak le thudik tuah bawl un. A zol lih haw mi cu a zoltu i khut pen hup un hi. Ngamdangmi hihen, nu le pa nei ngawl le meivongte hei hihen, bawlsia pahsuh un hi. Hi mun thiangtho ah mawh nei ngawlmi that pahsuh un hi.

⁴ Ka thu piak bangin na bawl ngangai uh tale David casuante kumpi hi leleng haw tuk hi. Amuhte cu a khutnuai bawite le a mihingte tuah kumpi inn a kongka sung pen cipuhleng tuah tumin tul haw tuk hi.

⁵ Mahnaven ka thupiakmi na zui uh ma tale hi kumpi inn cu buakseh khawmnakin cang tuk hi, tin tiam ing hi. Keimah, Topa in hilh zo toh ing.

⁶ Keima ca in kumpi inn cu Gilead ngam le Lebanon mual bangin mawi hi. Mahnaven kua mah i um nuam ngawlnak mun khingin bawl tung hi.

⁷ A siatsuahtu tukin mi hah ing. A heipi haw cawi in, sidar khuam mawizette cu phukin, mei sungah haal haw tuk hi.

⁸ “A nungten ngamdangmi tampi hi lamah a hun haw ten itakaw Topa in, hi khuapi humah hitih bangin, a bawl? tin dong haw tuk hi.

⁹ a Pathian haw tuah thutepnak a bawl haw cu nunghekin, pathian dadang tei na a deh haw hangin, ti haw tuk,” ti hi.

Joahaz Thu Jeremiah Hilhmi

¹⁰ Judah mite, Josiah kumpipa cu kah pahsuh un. A thih hangin khawngai pahsuh un. Mahnaven a capa Joahaz ca in kap li un hi. Amah cu hawhpih haw tuk a, kikleh tukma toh hi. A suahnak ngam muleh tukma toh hi.

¹¹ Topa in, Judah kumpi a dektu, a pa Josiah ai-awhtu Joahaz thu cu hitin hilh hi, “Amah cu hilai pen tul zo, kikleh tukma toh.

¹² A puinak ngam hawah thi tuk a hih hangin hi ngam hi muleh tukma toh hi,” tin ti hi.

Jehoiakim Thula Jeremiah Sonmi

¹³ Dikcang ngawlnak tuah a inn a satu le, nawhthuh eihnak tuah a inn a kauhtu, Thaman piak ngawlin a ngam mihing na a dektiktu le thaman a pia ngawltu cu a lampi bing hi.

¹⁴ “Inn phazet sa tung a, a khan humta cu a zal zetin bawl tung,” a ti tu cu a lampi bing hi. Mahti hangin kongka neu bawlin a sunglam pen sidar thing tuah thuahin bawl a, si san noih hi.

¹⁵ Sidar thing tuah inn na sak hangin kumpi dang sang hei in pha saw deuh tin ngaisungdun cim maw? Na pa cu mi khan phazet hi. Mi man le midik hi in, a dehmi hempoh ah l awhting hi.

¹⁶ Mi ca-ngah tei thu vang man zetin, a khensak hangin, a lamtuang hi. Topa theitu tei mizia cu mahtih bang hi.

¹⁷ Mahnaven nangin, nangma metnak bek ngaisung ci. Mawh nei ngawlte thatin, na mihingte bawlsiazet ci tin, Topa in hilh zo hi.

¹⁸ Mah hangin Topa in, Judah kumpi Josiah i capa Jehoiakim i thu cu hi bangin ti hi; “A thih ten kuamah hei kap haw tukma, ‘ka u aw, ka nau aw,’ tih hei in kuamah in hitui luangin kap li haw tukma.

¹⁹ Laak a thih ten a vui haw bangfang tuk hi. A luang cu kai haw tuk a, Jerusalem kongbiang pua lamah a vawkin, zam haw tuk,” tin ti hi.

²⁰ Jerusalem mite aw, Lebanon ngamah hawh unna, au un. Bashan ngamah hawh unna, tau li un. Moab ngam mualhum pen sam li un, Itahim titale nangmuh a panpihtu hempoh ten ngal sung khawng zo haw hi.

²¹ Mi neinung na hih uh laihin, Topa i thu nangmuh hilh ih; Mahnaven ngai nuam ma uh ci. Na nunsung uh cu mahtih bang leleng thong uh ci. Topa in, a thu cu zui nuam viang ma uh ci.

²² Na hotu uhte cu huihpi in mutvawk tuk hi. Nangmuh bawmtute cu ngal i matmi ngeh tuk toh. Thil sual na bawl uhmi hangin hi. Na khuapi uh cu zakca le mualpho in um tuk hi.

²³ Lebanon ngam pen a suakmi sidar thing lakah, ngimta zetin cawl ci. Mahnaven numei naukei nat thuak bangin, na ca in nasezet tuk hi. Natnakin, a delhsuk ngangai ten hehpihhuaizet tuk ci.

Jehoiakhin Humah Pathian Thukhennak

²⁴ Topa in, Judah kumpipa Jehoiakim i capa kumpi Jehoiakhin i lakah, “A nungmi Pathian ka hih bangin, ka taklam a, minkhetnak zungbut na hi hei in, duk tung a,

²⁵ nangmah a that nuamtu, na lau zetmi tei lamah pia tung. Babilon kumpi Nebuchadnezzar le a ngalkap tei lakah pia tung.

²⁶ Saltannak ngamah nangmah cu na nu tuah hawlvawk tung. Na suahnak uh ngam ahi ngawlmi ngamdangah hawlvawk tung a, mahlai ah thi tuk uh ci.

²⁷ Hih ngam hi ngaizet tuk nave uhcin, kikleh tukma uh ci,” tin ti.

²⁸ Kei in, “Kumpipa Jehoiakhin cu a kehmi beel, kuamah i deihleh ngawl tohmi beel bangin maw na can? Mah hangin aw amah le a cate cu a theih awng haw ngawlmi saltannak ngamah a pui thong haw?” tin ti ing.

²⁹ Aw, ka ngam, Topa i otmi hi ngai in!

³⁰ “Hi pa hi a cate pha thong tukin ngaihsutsa hi. Ituk mahten a lawhting tuk ngawlmi hi. A casuan sung pen David ai-awhtu le Judah ngamuktu tuk kua mah um haw ma. Keimah, Topa in hilh zo toh ing,” ti hi.