JEREMIAH 20 - Ngawm Bible

Jeremiah le Pashhur Thiampi

¹ Jeremiah phuanmi cu Biakinn uktu Immer i capa thiampi Pashhur in, a zak ten,

² keimah vatin, thik taicin tuah a khih ceng ten Biakinn sung humlam Benjamin kongka bulah koih hi.

³ A zingten a thik taicin cu dukin, a hah ceng ten a lakah, Topa in, Pashhur tih minsa ma hi. Na min tuk ngangai cu ‘Khua hempoh ah Launak,’ tihmi saw hi.

⁴ Topa amah loli in, ‘Nang cu nangmah le na ngualcam tei ca lauhuai tukin bawl tung a, a ngal haw ten nam tuah na ngualcamte a thah khawng haw mu tuk ci. Judah mi hempoh cu Babilon kumpipa i khutnuai ah hengtik khawng tung. Amah in, a khenkhat cu a ngamah salin pui tuk, a khenkhat cu that tuk hi.

⁵ Hi khuapi i hauhnakte, a sumpai le a neih le siah hempoh Judah kumpi i van le a lo le lam tian, a ngal haw ten longin, Babilon ah hawhpih khawng haw tuk hi.

⁶ nang, Pashhur, nangmah le na innkuate vang man haw tuk a, Babilon ah pui haw tuk hi. Mahlai ah thi tuk ci, vei tampi na zol lih awngmi na ngualcamte tuah vui haw tuk, tin hilh hi.’ ”

Topa Lakah Jeremiah Phuciak

⁷ Topa, nangmah in zolin, zol co ing! Nang cu keimah sang na ngil saw hangin neh ci. Akua na bangin cekpan bawlnak mangin, sun thalengin nuihsan haw hi.

⁸ Ka ot sial ten au thahin, “Mi vahnak! Siatsuahnak,” tin nging zetin au ing. Topa, nangma thu ka phuannak hangin miten nuihsanin, nehsiah dimdem haw hi.

⁹ Mahnaven, “Topa cu phawkngil tuk toh ing. A minin thuhilhleh tukma toh ing,” ka tih ten, Na thu cu ka sungah mei bangin alhto lelem, daidenno in um tum li naveng, umthong pih thei hihim mang hi.

¹⁰ Mi hempoh ten a kuhno in son haw, “Mun hempoh ah lauthawngnak um hi!” Bawi upa tei lakah hi pa i thuson tung, a tih haw za ing. Ka maizah zetmi ka ngualcamte hei in, ka caksuk tuk cu ngakhelzet haw hi. Zol thei tuk poh hung, a man thei uh tale, phu laleh tuk hung,” tin ti haw hi.

¹¹ Mahnaven Topa, nang cu ka lamah tang ci, mi ngil le thasiahhuai ci. Keimah a bawlsiatute cu sung haw tuk hi. Kumkhua mualpho in um haw tuk; Ituk mah ten lawhting thei haw tukma. A zahcaknak haw cu phawhngilh theih tukma hi.

¹² Cungnungbel Topa, nangin, man zetin mi khingkhai ci. Mitei ngaihsutnak le lungmu sungah, i um hum tih thei khawng ci. Mah hangin ka ngal tei hum a, phu na lak cu mutik zazalin hi. Itahim titale ka thu le la cu na khut sungah pia zo ing.

¹³ Topa i lakah lasa un hi! Topa cu thangphat un. Mipha ngawl tei khutsung pen, mitei zotsak mite pan suak hi.

¹⁴ Ka suah ni cu tamsiat hihen! Ka nu in, kei a hin ni cu phawhngilh hihen.

¹⁵ Ka pa a lungdamtiktu cu tamsiat hihen! Thuthang henpihin, “Pano hi! capa nei ci” a titu pa cu!

¹⁶ Topa in hehpihnak nei ngawlin, a siatsuahmi khuapi bang hen! Zinglamin, nat thuak taunak a zatu, sunlamin, ngaldonak pengkul nging a zatu hihen!

¹⁷ Ka suah laih ngawlin, na thah ngawl hangin, ka nu i pum sung cu ka khan hi lehma toh!

¹⁸ Haksatnak le thinkhamnak thuak tuk poh cu zahcaknak tuah ka nunnak ni a letli tukin itakaw ka nu i pum sung pen ka suahtul lih?