JEREMIAH 15 - Ngawm Bible

Topa Thinuknak Judah Mi Humah

¹ Topa in, ka lakah, “Moses le Samuel hei hilai ah dingin, a ngen li haw hei in, hi mihing tei lakah hehpihnak nei tuk mang hi. Tai haw hen; ka mitmuhnakah um haw ma hen.

² Ilai ah kaw ka hawh tuk uh tin, a dong haw tale, keima hilhnak bangin hilhin hi: Khenkhat cu pulhnatin thi haw tuk hi. Mahlai ah hawh haw tahen. A khen cu ngaldonakah thi haw tuk hi. Mahlai ah hawh haw tahen. A khenkhat cu ngilkial dangdumin thi haw tuk hi. Mahlai ah hawh haw tahen. A khenkhat cu sal matmi hi haw tuk hi. Mahlai ah hawh haw tahen.

³ Keimah, Topa in, a hum hawah a heng tukmi thu pa li khencat zo toh ing. Ngaldonakah thah hi haw tuk, a luang haw cu uico in thiak tuk; vano ten ei in, a eih bang haw cu ngamsa ten ei haw tuk hi.

⁴ Jerusalem ah Hezekiah capa Manasseh in Judah kumpi a deh lai in, thil sual a bawl hangin, hitih bangin bawl tung a, mahmi cu mi hempoh ten amuh haw ten lau le lung-amin um haw tuk tin,” ti hi.

⁵ Topa in, “Maw Jerusalem mite akua in kaw a hehpih tuk? Akua kaw a khawngaih pihtu tuk? Iti bangin um kam uh ci? Tin dong tukin akua kaw ngeipi a ngak tuk?

⁶ Nangmuh saw in, keimah nunghekin zam uh ci. Mah hangin ka khutzakin siatsuah ing. Ka thinsupin daidi nap ma toh ing.

⁷ Ngam sung khua hempoh a, cangphol ko bangin huih lakah vawk ing. Na cate uh tianin that ing. Thil sual na bawl uh tawp nuam cuang ma uh ci.

⁸ Na ngamsung uh a, meivong cu tuipi thuanthum mawk philnel sangin, tam saw haw hi. Na tangval uhte a khanno haw laihin that ing a, a nu haw ten thuak ngangai haw hi. Ngaihsut khak ngawlpi in, lungmu tamnak le launak cu amu lakah hengtik ing.

⁹ A capa salih tei thihsanmi numei nu cu, a lungmitin lum hi, a hai hawh tuk heh tin zei in pel li. Sunlaihtak naven ama ca in khuathim hi. Mualpho in um a, thimnak tuah dim hi. A nung calam nangmuhte hei thah tukin, na ngal tei khutah pia tung. Keimah, Topa in hilh zo ing.”

Topa i Lakah Jeremiah Phuciak

¹⁰ Leihumah ka nu in, a hintul hi itizah takin, mi bawngsia ing kaw! Ngamsung mi hempoh ten keimah hua leita in zuak haw hi. Sum putik awng mang, midang tei sum hei pu awng mang; mahnaven akua na bangin tam haw hi.

¹¹ Topa aw, nangma na phano in dek ngawlin, ka ngal tei haksatnak le vansannak a tawh haw ten a ca haw in, na lakah ka ngetsak ahimata na tamsiatnak cu heng poh hen.

¹² Saklam ngam pen a hengmi thik hihim cu akua hei in ek thei haw ma, itahim titale daal tuah bawlmi hi.

¹³ Topa in ka lakah, “Hi ngamsung a, ka mihingte sualnak a bawl haw hang cawhtu tukin a na neih le siah, a sum le pai longtu tukin ngal hah tung.

¹⁴ Na theih awng ngawl uhmi ngam, a ngal tei ngamah nadeh sak tukin bawl tung hi. Ka thinuknak cu mei bangin a kumkhua in alh leleng tuk,” ti hi.

¹⁵ Keimah in, “Topa aw, nangmah in thei ci. Keimah phawkleng inna, bawmin hi. A bawlsiatu tei humah phulaknak um tahen. A hum haw hei ah na thinsau toh pahsun, that ngangai kha haw tuk hi. Nangmah hangin zotsak ka hihlam phawkleng zalin hi.

¹⁶ Ka lakah awn ci a, na awnkam hei cing khawng lawh ing. Topa Cungnungbel Pathian, na minin sam mi ing hi; nangma mihing hi ing a, na awnkamin ka lungmu cu lungdamnak le thinnopnak tuah dimtik hi.

¹⁷ Midangte tuah cekpan le nuihsuak bawlnakin ka hun mang awng mang. Na thupiakmi ngai in, keimahno in um ing a, thinuknak tuah dim ing.

¹⁸ Itakaw ka thuaknak hi a bo awng ngawl? Itakaw ka mai hi a dam awng ngawl? Dam thei haw tukma maw i kaw? Khal hun a, tuikang bangin ka ngaihsutnak botik tuk ci maw?”

¹⁹ Topa in, “Na kikleh tale laleh tung a, ka nadektu hileh tuk ci. Zolthuson ngawlin thudik le thuman bek na son tale ka profet hileh tuk ci. Mipi lakah na hawh kul tukma, amuhte saw na lakah hung haw tuk hi.

²⁰ A do haw hei in neh haw tukma. Daal tuah bawlmi pang bangin bawl tung a, ti thei haw tukma hi. Nangma lakah um tung, humhim tung a, pan tung hi.

²¹ Misual le mipha ngawl tei kut sung pepan suak tung. Keimah, Topa in hilh zo ing,” ti hi.