JEREMIAH 14 - Ngawm Bible

Nguahzu Ngawlnak Thu

¹ Topa in, nguahzu ngawlnak thu ah hi bangin hilh hi;

² “Judah cu thasia in um. A khua haw tale ko cucung; A mihingte thasia in lei ah bok haw hi. Jerusalem vang bopnak deihin au hi.

³ Mihau ten tuicawi tukin a silate hah haw hi. Tuikhukah hawh haw naven tui umma. A tuibing haw tuah thacangin kikleh haw hi. Thasia amthongin um haw hi.

⁴ Nguahzu ngawlin lei a ko leita hangin, lobung mite amthong haw hi. Thasia in, a mai haw cu puan tuah hup thong haw hi.

⁵ Hamhing a um ngawl hangin hampa lakah sazukin, a cano zamsan.

⁶ Hampalak a laak cu mualkulah a dingmi, cingne bangin a hai hawh tuk zei in hai zawzok hi. An a ngah haw ngawl hangin a mit haw in khua mu thei ma zo.

⁷ Ka mite ka lakah au haw, ka sualzet uh hei in, na thutep bangin, Topa bawm zazalin hi. Na lak pen vei tampi tai zo ung a, na humah sual leita zo ung.

⁸ Nangmah bek hi Israel i muansannak ci. Nangmah bek hi siatlalnak pen huptu ci. Itakaw ka ngamsung uhah ngamdangmi bangin le zan khat bek a cam vutmi mikhual bangin na um?

⁹ Itakaw lau nei pa bangin le imah a bawm thei ngawl ngalkap bangin na um? Maw Topa aw, nang cu keimu lakah um ci a, nangma mihing ung hi; zamsan hihim pahsun, tin ti haw hi.”

¹⁰ Topa in hi tei thu son a, “Hite hi ka lak pen tai nuamzet haw, amuh le muh ukdun zo haw ma. Mah hangin a hum hawah ka lungdam mang. Thilpha ngawl a bawl haw mi thei leng tung a, a, sualnak haw i hangin bawlsia tung,” ti hi.

¹¹ Topa in ka lakah, “Hi mihingte bawm tukin ngen toh pahsun.

¹² An cangin thu a ngen li haw hei in, za kha moh tuk mang. Halkang biakpiaknak pia in le cangho vam biakpiaknak a pia li haw hei in, ka lungdam cuang tuk mang hi. Ngaldonak, pamnak le natnak tuah that leleng tung,” ti hi.

¹³ Mahten keimah in, “Cungnungbel Topa, hi ngamah dodunnak le pamnak cu umleh tukma toh, itahim titale Topa in, lemdaihnak bek um tuk toh hi tin thutiam zo, tih cu profet ten mipi tei lakah a ot haw za zo ci.”

¹⁴ Mahnaven Topa in, “Profet ten ka minin zolthuson haw hi. Ka hahmi kha haw ma hi, thu ka piakmi hei hi kha haw ma, a lakah awn kam khat awn tuk hei ka hahmi kha haw ma. A son leilui lehcet haw mi a muhnak haw cu keima lak pen a hengmi kha ma hi. Mailam thu a sonham haw mite cu imah ngawl, amu lungmu sung ngaihsutnak ngeh thong hi.

¹⁵ Keimah, Topa in ka hah khak ngawl profet, ka min salin hi ngamah ngaldonak le pamnak heng tukma a titu tei humah i kaw ka bawl tuk tih hilh tung: ngaldonak le pamnak tuah siatsuah khawng tung.

¹⁶ A thu a ngaitute hei mah bang lelengin thah hi haw tuk! A luang haw cu Jerusalem khuapi lam lai ah vawk hi haw tuk a, kuamah in vui haw tukma. Amuh bek hi ngawlin a zi haw, a canu, a capate vang mahti bang lelengin bawl hi tuk hi. A sualman haw nase zetin thuak haw tuk tin,” ti hi.

¹⁷ Topa in, ka lungsiatnak hi, mipi tei lakah phuang tukin thupia a, hi bangin hilh ing; “A sun le a zanin, ka mit hitui luang leleng hen. Ka hitui a hul ni umma hen: Ka mihing ten liamma nasezet thuakin, a liamma haw nase lawlawm hi.

¹⁸ Hampa lakah ka hawh ten, ngal tei thahmi miluang mu ing. Khuapi sungah ka hawh ten, an ei ngawlin a thi mi mu ing. Profet le thiampi ten a nadek haw hi. Mahnaven iheng ka deh uh tih thei haw ma,” ti hi.

Mipi Ten Topa Lakah Kun Haw

¹⁹ Topa aw, Judah cu lawl ngah loli cim? Zion mite hi huazet zo cim? Itakaw hi tih bang lawlawm na liamsuah? Ka meima uh damleh thei ma toh. Lemdaihnak ngak ung. Mahnaven phatnak imah heng ma hi. Damnak tuk muansanzet ung, Mahnaven launak ngihngeh heng lamsang hi.

²⁰ Topa aw, na humah sualzet zo ung. Na mai ah ka sualnak uh le, ka pu le pa tei sualnakte phuang ung hi.

²¹ Na thutiammi cu phawkleng zal inna, zawnsak zazal pahsun hi. Na sunloihnak khunnak Jerusalem humah mualphonak hengtik zal pahsun, Keimuh tuah na bawlmi thutiamnak cu siatsuah zal pahsun maw.

²² Ngamdang mitei bawlmi milim ten nguahzutik thei ma hi. Van pen ama thu in nguahtui mal khatno hei caktik thei ma hi. Topa aw, kohtei Pathian, ka muansannak uh cu na lakah koih zo toh ung. Hi thil hempoh a bawltu cu nangmah bek hi ci.