JEREMIAH 13 - Ngawm Bible

Bawngbi Comnote Tuah Thuhilhnak

¹ Topa in, “Hawh inna, nim tuah tahmi bawngbi comnote na lei ceng ten cengvawkin hi; mahnaven tui tawngkhatik pahsun,” ti hi.

² Mah hangin bawngbi comno lei ing a, Topa i hilh bangin ceng ing.

³ Topa cu ka lakah awnlehin,

⁴ “Hawh inna, Eufrates ngun tuipi na hen ten suanghol sungah mah bawngbi cu selin,” ti hi.

⁵ A tih bangin hawh ing a, Eufrates ngun elah sel ing.

⁶ A ngei ngawlin Topa in, Eufrates ngunah hawh tukin le bawngbi comnote la lehtik hi.

⁷ Hawh ing a, ka selnak mun ka hen ten, ka co le muat khawngin manphaleh ngawl toh mu ing.

⁸ Topa i awn cu ka lakah henglehin,

⁹ “Hi bawngbi bangin Judah i ultunnak le a nase zetmi Jerusalem i pualthaunak cu siatik tung hi.

¹⁰ Hi mi suaksual ten ka thungai nuam hihim haw ma. Ni dang bang lengin a lung haw khohin, suaksual leleng haw, pathian dadang tei nadekin, bia haw hi. Mah hangin hi bawngbi comnote bangin sia haw tuk a, man tak ngawlin cang haw tuk hi.

¹¹ Bawngbi comnote tai ah khim zetin, a het haw bangin Israel le Judah mite cu ka lakah khim zetin, a belhdunin, a um haw tuk deih bok ing. Amuhte cu ka mi hi haw tuk a, ka minthannak le sunloihnak a piangtiktu tukin deih ing. Mahnaven ka thu zui nuam haw ma,” ti hi.

Sabittui Beel Tuah Thuhilhnak

¹² Topa Pathian in, ka lakah “Jeremiah sabittui koihnakbel hempoh sabittui dimtik khawng tukin Israel mite hilhin hi. Sabittui beel hempoh sabittui in dimtik khawng tuk cu thei khawng ung hi tin don paih haw tuk hi.

¹³ keimah Topa in, hi ngamsung um hempoh David casuan kumpi a dekmi hihen, thiampi le profet hihen, Jerusalem a umte tianin, sabittui tuah dimtik khawng tung a, sabittui kham khawng haw tuk hi. Mah thu cu hilhin hi.

¹⁴ upa naupang ti ngawlin pa khat nung pa khat sabit beel bangin vatkeh khawng tung. Itnak, lainatnak, hehpihnak um ngawlin that tung. Imah in kham zo tukma,” ti hi.

Jeremiah In Tuangkhawngte Ngallinnak Pia

¹⁵ Israel mite, Topa in hilh zo hi; na lungmu uh nemtik unna, a thu ngai un.

¹⁶ Topa na Pathian uh cu upat unna, thimnak hengtik tuk a, mualhumah na bah, na lup uh laih ngawlin le na muansan uhmi khuavaknak cu khuathim sahzetah a cantik laih ngawlin upat un.

¹⁷ Mahmi thu na ngai nuam uh ma tale, na tuangkhawn uh hangin a kuhno kap tung hi. Kap tung a, ka mit hitui nase zetin luang tuk hi. Itahim titale Topa i mihingte cu sal matmi in cang khawng zo haw hi.

¹⁸ Topa in ka lakah, “Kumpipa le a zi cu hilhin; kumpi khunnak pen tolh haw hen, itahim titale a kumpi lukhu mawizet haw cu a lu haw pen kulh zo hi.

¹⁹ Judah ngam hanglam a khuapi cu ngal ten kilcihin, umbing khawng zo haw; nawktul theihmi hi ma toh. Judah mite cu saltannakah pui khawng hi zo haw,” ti hi.

²⁰ Jerusalem zo hemin! Na ngalte saklam pen hung haw hi. Nangmah cingkhawi tukin a piakmi mihingte na uanpih zetmi mihingte cu ilai ah haw kaw?

²¹ Na ngualcamin, na ngaihsutmi ten nehin, a uk haw ten itin kaw na otleh tuk? Numei naukei nat bangin a thuak tuk ci.

²² Itakaw hitih bang thil ka humah a hen? Itakaw ka puante bawhkek sak khawngin, a sualpih haw? na ti tale na sual leita hangin hi!

²³ Mihaang phun Ethiopia mi pa khatin, a vunhaang thek thei ni maw? Tavangin, a can thek thei ni maw? a thek thei haw tale thilpha imah bawl ngawlin sualnak bebek a bawltu nohte hei in thilpha bawl cung thei bok tuk uh ci!

²⁴ Phillawn huihpi in cangphol ko amuh vawk bangin Topa in lengkektik khawng bok tuk hi.

²⁵ Hitih bang thil hi tawk tuk uh ci, tih hilh ham zo ing a, ka leitek sa mi hi. Itahim titale amah phawkngilin imah ahi ngawlmi khawhuai dang muang saw uh ci.

²⁶ Topa amah loli in, na puan uh duhsak khawng tuk a, pumpi thacang, zahcak mualpho in umtik tuk hi.

²⁷ A huatmi na bawl uh mu zo toh. Phul lakah hihen, mualhumah hihen pathian dang zei uh ci; pano pha ngawl ten, a innnel pa i zi ngai in, a otpih kawkawi bangin pathian dang a zui ngut haw mu zo hi. Jerusalem mite, na lampi uh bing thong hei! Ituk ten kaw thiangtho in, na umleh tuk uh?