JEREMIAH 12 - Ngawm Bible

Jeremiah In Topa Thudong

¹ “Topa, nang cu a dikmi le a manmi ci. Ka thu la na lakah ka hengtik hei in, dik leleng tuk ci. Ka dot nuammi thu umin, mah thu cu itakaw mipha ngawlte a khantoh dedeuh haw? Itakaw mi awklawlte le mi depdete a lawhtin lih haw?

² Nangmah in phut ci a, zungsa haw, khangto in, ngah pha ngah haw hi. A awnkam haw tuah pakdiak hem haw tuk naven, a lungmu haw tuah khawla dunzet tuk hi.

³ Mahnaven, Topa nangin thei ci; ka thil bawlmi mu ci a, nangmah ka itnak vang thei ci. Hi mipha ngawlte hi thah tukmi tuu bangin kai in hi. A thih ni haw a kim laklawh tai thongleh tuk ngawlin cingin hi.

⁴ Ituk tian kaw ka ngam uh hi a ko tuk? Ituk tian kaw ka ngam buppi uhin hampate a thim tuk? Ngamsa le vanote vang a thih li haw tuk? ‘Pathian in, a bawl uhmi mu li sapma! A titu mihing tei sualnak hangin,’ ” ti hi.

⁵ Topa in, “Maw Jeremiah, mihing hei tai na zuam thei ma tale, itin kaw cipuh cu tai na zuam theih tuk? Lenkolh hei ah na ding thei ma tale, Itin kaw Jordan tuimawk hampa cam lakah na din theih tuk?

⁶ Na unaupih le na unau hei innkua pihte nangawn hei in suamin, a dotu ah tel haw si. Amuhte cu sang pahsun, a awnkam haw a pha hei in,” tin ti hi.

A Miphunte Hangin Topa A Thasia

⁷ Topa in, “Israel nunghek zo ing, ka tensa ka miphunte cu zam zo ing. Ka deih zetmi ka mihingte cu, A ngal tei khut sungah san zo ing.

⁸ Ka tensa mihing ten keimah langpang zo haw hi. Tupi sung a, kiosa bangin ka humah hawk khu khumin, a um haw hangin hua ing.

⁹ Ka tensa ka mite cu, mun tihkimah mupi i hilmi vano bang haw hi. A cik eihnak puai ah, ngamsate vang sawm un.

¹⁰ Ngamdang uktu ten ka sabit huan siatsuah khawng haw hi. Ka lo ngam cilpek khawngin, a deih awh zetmi ka ngam cu, phillawnin suaktik haw hi.

¹¹ Taisan mi ngamah cangtikin, ka mitmuhah ngamkhingin suak hi. A ngam buppi in phillawn suakin, kuamah in kinmawh kha haw ma hi.

¹² Phillawn ngam a, mualsang hum khua hempoh ah, mi suam tuk le lonsak tukin hung haw hi. Ngan buppi khatlam deng pen khatlam deng tian siatsuahtu cu Topa i ngalnam hi. Lemdaihnak tuah kua mah um thei haw ma.

¹³ Ka mihing ten sangvut cing haw, mahnaven a cop haw mi cu ling le so bek hi. Haksa zetin nadek haw, mahnaven imah ngah haw ma. Ka thinuk leita hangin, a an kung ten ngah hei nei haw ma,” ti hi.

Topa i Thutiamnak

¹⁴ Topa in, “Ka mihing Israel tei ngam a siatsuahtu Israel ngam el a ummi ngam tei lakah hilh tuk, nei ing. Mah mipha ngawlte cu bawhmi thingkung bangin a ngam haw pen bot vawk tung a, amu lak pen Judah mite cu pan tung hi.

¹⁵ Mahnaven mahtih bangin ka bawhsuak nungten, a hum hawah hehpihnak neileh tung a, a khua le ngam tenah pui kikleh haw tuk hi.

¹⁶ Baal khawhuai minin, ka mihingte siatcamnak hilh haw naven atu-in, ka minin siatcamnak cung haw a, ‘Topa a nun bangin,’ ti haw in, a lungmu ngai haw in ka mihing tei biaknak a pom haw tale ka miphunin cang bok haw tuk a, khangto bok haw tuk hi.

¹⁷ Mahnaven miphun pa kha khatin, a zui nuam ma tale mah miphun cu botvawk tung a, siatsuah tung. Keimah, Topa in hilh zo toh ing tin,” ti hi.