JEREMIAH 10 - Ngawm Bible

Milim Biaknak le Biakpiaknak Dik

¹ Israel mite, nangmu ca Topa i hilhmi thu hi ngai hem un.

² Topa in, “Miphun dang tei bawldan cung kha pahsuh un hi. Vanah nalamdang na muh uhten hei hihen, thinsu pahsuh un. Miphun dang ten lau in, a can haw hei in lau pahsuh un.

³ Himi tei biaknak cu phukthong poh hi. Tupi sungah thingkung pa khat phuk haw a, khutzung thiam nei ten a hiamnam haw tuah sui in,

⁴ sui le ngun tuah mawitik haw hi. A tuk ngawlnak tukin thik tuah khencih haw hi.

⁵ Mahti bang milim cu cangmai huan sung a, kimuzak khaihmi bang hi. Awn thei haw ma, thiak kul haw, hawh cawm thei ma, Mahti bangte cu lau pahsuh un, imah tithei haw ma hi. Na phatnak uh hei bawl thei ma, na siatnak tuk uh hei bawl thei sih ma hi.”

⁶ Topa, nangmah bang kuamah um haw ma, na min cu thawmngengbel, huham nei sih hi.

⁷ Miphun hempoh tei kumpipa cu, akua kaw upat ngawlin a um thei tuk? Upat le kihcak takmi hi ci, miphun tampi tei micip lakah le a kumpi tei lak hei ah, nangmah bang kuamah umma.

⁸ Amuh ten a venghawng haw in misil le hawmthawh ummi haw hi. Thing a bawlmi milim lak pen, i cung thei haw tuk kaw?

⁹ A milimte cu Spain ngam a ngun le Ufaz ngam a sui tuah tuamin, khutzung thiam ten sek haw in, Sandup le mepian puanin thuamtik haw hi. Thiamtak tei tahmi puan tuah thuam bok haw hi.

¹⁰ Mahnaven Topa, nang cu a dikmi Pathian hi ci. A nungmi Pathian hi ci. Kumkhua in kumpipa hei hi ci. Na thin a uk ten lei buppi hi hing khawng. Na thinuknak cu miphun ten thuak thei haw ma.

¹¹ (Noh ten, “Lei le van a bawl thei ngawltu pathian cu siatsuah khawng hi tuk,” tin hilh un. Leihum ilai banglai ah umleh haw tukma toh.)

Pathian Thangphatnak La

¹² Topa in leipi hi a ngilnak tuah bawl hi. Leipi hi a cihnak tuah piangtikin, van vang phalh hi.

¹³ Ama thupiaknak bangin vanhum a, tuite thum, vanmawk deng pen meinim cawi hi. Nguah lakah khuaphelep zawzoktik, a thil koihnak mun pen huih tultikin piangtik hi.

¹⁴ Hi na hempoh a zoh uhten mihing hi misil le ngaihsutnak nei ngawlmi hung hi. Milim bawltute vang mi zoltu haw hi. Itakaw titale a sek haw mi milim cu mizolnak thong, nunnak hei nei haw ma.

¹⁵ Zolthu vocang, phukthongin, a nuihsuak hah thong haw hi. Topa a hun ten bo khawng haw tuk hi.

¹⁶ Jakob i Pathian cu mahtih bang thong kha ma. Amah cu ihempoh bawltu hi. Ama mihing tatak hi tukin Israel mite teng; Ama min cu Cungnungbel Topa hi.

Saltannak Hun Heng

¹⁷ Jerusalem mite, ngal tei kil khawngmi hi uh ci. Na thil uhte cu khawm khawng un.

¹⁸ Topa in, hi ngam pen vawk tuk hi. Mi pa khatno hei tang ngawl tianin cil tuk hi. Topa in hilh zo hi.

¹⁹ Jerusalem mite hitin au haw, “Nase zetin liamsuahmi hung hi. A meima uh dam thei ma. A tawh uhmi bawlsiatnak hi a, thuak bok kul hihim tin ngaisung ung.

²⁰ A puan inn uhte siat khawng. A kennak khau vang cat khawng zo. A cate uhten taisan khawngin, a puanbuk uh tungding lehtu tuk hei umleh haw ma toh. Puanzak khaihtu hei kuamah umleh haw ma toh tin,” ti hi.

²¹ Donleh ing a, eimuh hotute sil leita haw, Topa i lakah thusiampih tuk na thiam haw ma. Mah hangin lawhtinnak imah nei haw ma. A mihing uhte khenkhek khawng hi zo.

²² Ngai hem un; “Thuthang heng! Saklam ngamah buainak nasezet piang. A ngalkap ten Judah ngam a, khua hempoh phillawnin bawl haw tuk hi. Cingne tei umnak tuk ti ing.”

²³ Topa, mihing tei umdan hi amuhno ukdun theitu tuk um haw ma. Mah i nunnak lampi humah thuneitu kuamah um haw ma tih thei ing.

²⁴ Topa aw, na mite nun hilhin hi. Mahnaven haksa leita in bawl pahsun. Na thinuk ten dantat zal pahsun hi. Mah ma tale bolal khawng thong tuk ung hi.

²⁵ Na thinuknak cu nangmah a bia ngawltu miphun le nangmah a vawktu ngam tei humah hengtik saw in hi. Amuhte ten na mite cu that haw hi; ka ngam uh siatsuah khawngin, buaksehnakah a cangtiktu haw hi.