JEREMIAH 1 - Ngawm Bible

Jeremiah

¹ Benjamin ngam Anathoth khua a um thiampi tei lak pen thiampi pa khat Hilkiah i capa Jeremiah i thuhilh mite cu hi tih hin hi.

² Amon capa Josiahin Judah ngam kumpi a dehnak kum sawm le kum thumnakin, Topa in Jeremiah otpih hi.

³ Josiah capa Jehoiakim in kumpi a deh hei ten Topa in Jeremiah otpihleh hi. Mahnung ten Josiah i capa Zedekiah i kumpi a dehnak kum sawm le kum khat tian Topa in Jeremiah cu vei tampi otpih hi. Mah kum, ha nga ha in, Jerusalem mite cu sal tukin pui vawk haw hi.

Jeremiah Samnak

⁴ Topa in, ka lakah,

⁵ “Na nu i pum sung pen ka semtik laih ngawlin thei zo toh ing a, na suah laih ngawlin miphun tampi tei profet hi tukin teng zo toh ing,” ti hi.

⁶ Keimah in, “Cungnungbel Topa, awn thuson thiammi hi mang, khangno leita laih sing,” tin donleh ing.

⁷ Mahnaven Topa in ka lakah, “Khangno leita laih ing ti pahsun; mipi tei lakah ka hah zo bangin hawh inna, hilh tukin thu ka piak bangin hilhin hi.

⁸ Lau pahsun, na lakah um tung a, nangmah humhim tung. Keimah, Topa in hilh zo ing hi!” ti hi.

⁹ Topa in, a khut san tulin, ka muk a zen nungten, “Ngai inna, na ot tukmi na kam sungah koih zo ing.

¹⁰ Tuni in, miphun hempoh le kumpi tei ukmi ngam tampi tei humah bot theihnak, phiat theihnak, siatsuah theihnak, vawk theihnak, tundinleh theihnak le phut theihnak thupia ing,” ti hi.

Muhnak Pa Nih

¹¹ Topa in, “Jeremiah, ikaw na muh?” tin a dot ten, “Khumkhal thingkang mu ing,” tin donleh ing.

¹² Topa in, “Manzet ci, ka ot sate a kimnak tukin zo laih ing,” ti hi.

¹³ Mah nungten Topa in, “Adang i kaw na muhleh?” tin dong leleu a, “Sak lamah a so tawtokmi beel, hi lamah a leiliangdun mi mu ing,” tin donleh bok ing.

¹⁴ Topa in, “Siatsuahnak cu saklam pen tuisa bangin hi ngam sungmi hempoh humah so tuk;

¹⁵ Itahim titale saklam ngamte cu hilai ngamah a heng tukin sam zo toh ing. A kumpi haw ten Jerusalem khuapi kongka, kulhtian elkim le Judah ngam khua dadangah a bawi khunnak koih haw tuk hi.

¹⁶ Ka mihing tei humah siatsuahnak cu hengtik tung; sualin, nung a hek haw hangin le dawih phun dadang lakah biakpiaknak bawlin, milimte amu kut loli tuah bawlin a biak haw hangin cawh tung hi.

¹⁷ Jeremiah, na tuangtim inna, hawhin; hilh tukin ka thupiakmi hempoh hilh khawng limlemin hi. Lau hihim pahsun, mahma tale, a mai haw na hen ten lau sesemtik tung.

^18-19 Jeremiah, ngai hemin! Hi ngamsung a mi hempoh, Judah ngam kumpi, a khutnuai bawite, thiampite le mipi ten nangmah ngal haw tuk hi. Mahnaven amuhte do theihnak tukin thazaang pia tung a, khuapi kulhtian bang tuk ci, thik khuam bang le daal tuah tianmi pang bang tuk ci. Nangma lakah um tung a, nangmah hup tung hi. Mah hangin kuamah in neh haw tukma. Topa keimah in hilh zo ing,” ti hi.