JAMES 1 - Ngawm Bible

¹ Pathian le Topa Jesuh Khrih i sila keimah James in leihum khua hempoh ah a lengkekmi Pathian mihing nangmuh tei lakah laikuatin nuksat ing.

Upnak le Cihnak

² U le naute nangmu lakah haksatnak a phunkim a hen ten mi bawngpha hung tin ngaisung un.

³ Itahim titale na upnak uh tuah mahtibang khingkhainak le haksatnak na neh uh ten thuakzawhnak heng hi tih cu thei un hi.

⁴ Tingsapnak um ngawlin a cangkim le a pitungmi na hih theihnak tukin a dawltawpnak tian a thuak theitu hi tukin zuam un:

⁵ Nangmu lakah cih le thiamnak a tingsammi na um uh tale Pathian nelah ngen henna, Pathian in pia tuk hi. Itahim titale akua i lakah hei hihen Pathian in phal zetin le hehpihnak tuah pia hi.

⁶ Mahnaven mahtin a nget ten lungmu aicannak um ngawlin, ngah loli tung tin upnak tuah ngen hen. Lungmu aicannak a neitu cu huih i mun hempoh amuh vawkmi tuicawk bang hi.

^7-8 Mahtibang mihing cu lungmu phun nih a ho mi le a dehnak hempoh ah ciangkai ngawl a hih hangin Topa i lak pen na pa kha khat ngah tukin muang pahsuh hen.

Zawn le Hauhnakte

⁹ A tingsammi Khristian unau pa kha khat cu Pathian i bopnak hang neinungin, a um ten a lungdam tahen.

¹⁰ Mahten a hausa zo Khristian unau khi mi ca-ngahin, a umleh tale a lungdam leleng hen. Itahim titale mihaute cu hampa lak a, pak bangin thiim haw tuk hi.

¹¹ Nisuak sa ten pak kung cu thiimin, a mawinak bo hi. Mahti bang bokin mihaute cu nanok zetin, a um haw laih takin thamthong haw tuk hi.

Thiatha Zohnak le Sualsohnak

¹² Thiathazohnak a tawh hun ten khim zetin a ding theitu cu mi lungdammi hi. Itahim titale mahtibang haksatnak a neh theih hangin Pathian in amah a ittu tei ca in, a tepsami nunnak cu laksawngin co tuk hi.

¹³ Mahtibang thiatha zohnak a tawktu ten, “Pathian in thiatha zo hi,” tin ti pahsuh hen. Itahim titale Pathian cu sualnak tuah thiathazoh theih ma hi. Amah vangin kuamah i thiatha zo ma hi.

¹⁴ Mahnaven mihingin sualsohnak a tawh ten ama tisa deihnakin leem cihin, lampialah hawhpih hi. Mi pa kha khatin ama deihnak bangin a ngamtat ten sualnak piangtik hi.

¹⁵ Tisa deihnakin nau bang pai in, a hintulmi cu sualnak hi: mahten sualnak cu khangin, ngah a ngah ten thihnakah heng hi.

¹⁶ Ka ihmi u le naute aw, zol sang pahsuh un.

¹⁷ A phami le a cangkimmi laksawng hempoh cu vancung pen a hung mite hi. Vancung a, vaknak bawltu Pathian lak pen hung haw hi. A bawlmi nate kheel naven Pathian cu kheel awng ma hi. Hun le cante a hel li vangin Pathian lak pen khuathim tih um awng ma hi.

¹⁸ Ama lungkimnakin, a bawlmi hi hung a, eimuh a semsuahnakah thutak awnkam mang hi. Mah hangin a semsuahmi na hempoh lak pen ohte cu a ngah masabelmi hung hi.

Zaknak le Bawlnak

¹⁹ Ka ihmi u le naute aw, hi thu hi cing leleng un. A kuakua hei hihen, thu theih nuamnak lamah a zuan ngangmi hi unna, ot tuk le thinuknak lamah zuancum mi hi un.

²⁰ Mihing tei thinuknakin Pathian i tumtahmi diknak suaktik thei ma hi.

²¹ Mah hangin a nawngkai le a ninmi ngamtat pha ngawl hempoh cu vawk khawng un. Pathian nelah ap unna, nangmuh nunpan theitu thudik cu nangmu lungmu sungah khumin pom un.

²² A thu ka theih nungsang tawk tih thongin nangmuh le nangmuh zoldun ngawlin dek suak tukin ngaisung un.

²³ A ngaitabek zamin a deksuak ngawltu cu thalang sungah mel a zoduntu bang hi. Mahpa cu thalangah a mel zodunin, a hihnak bangkekin mu hi.

²⁴ Cel zetin, a zohdun ceng ten hawhin, ka mel iti bangta him tih thei lehma toh hi.

²⁵ Mahnaven mi a luattiktu a cangkimmi daan khi tihtak zetin, a ngaisung lelengtu cu a ngai thawthongtu le a phawkngiltu hi ngawlin a bawl suaktu hi. Mahtin a bawlsuak hangin Pathian in thupha pia tuk hi.

²⁶ Biaknak lamah hantiam ing tin, a titu um uh cim? Mi pa kha khatin Khristian ing, ti thah lengin, a awnkam a sup zo ngawltu cu amah le mah zolduncopin, a biaknak cu thawnthong hi.

²⁷ Pathian mai pen a thiangthomi biaknak cu, nu le pa nei ngawl ca-ngah le meivong haksate cawm le vaktu, a cingkhawitu le hi leihumpi i siatsuah ngawlte khi hi.