ISAIAH 9 - Ngawm Bible

A Heng Tukmi Kumpi

¹ Zebulun miphun le Naftali miphun tei ngam cu zakca in um zo haw naven mailamah hi ngam cu ngam sunglawi in, suak tuk hi. Mediterranean pen nisuahnak lamah Jordan ngalkhat lam le ngamdangmi tei umnak Galilee tian ngam sunglawi in, suak khawng tuk hi.

² Khuathim lakah a hawhmi ten, a nase zetmi vaknak mu zo haw hi. Khuathim ngamah a ummi tei humah vaknak heng zo hi.

³ Topaaw, lungdamnak ngengpi pia ci; a lung haw noptik zo ci. Na nadehmi humah lungdamzet haw hi. Miten an a cop haw ten a lung a dam haw bangin le ngal tei lak pen lonmi nate a sepdun hun haw bangin hi.

⁴ A vanngit puaknak haw nguingam cu satcat zo ci. A ko hum haw a, kolhak vang ektuah sak zo ci. Maw Topa na mihingte a bawlsiatu le a zawnsaktu cu neh zo ci. Tanglaih pi in, Midian ngalkapte na neh zo hi.

⁵ Na mihing dotu tei kedam le thisan noihmi a puan haw hempoh cu mei tuah haal khawng hi haw tuk hi.

⁶ A lak uhah nauno hing zo hi; Capa piak hi zo hung hi; Amah cu eimuhte uktu hi tuk hi. A min cu, “Thasiahhuai, Lembawltu,” “A cakmi Pathian,” “Kumkhua Pa,” “Lemdaihnak Kumpi,” tin sam hi tuk hi.

⁷ A kumpi uknak le huham cu khangto pepel tuk; A uknak sungah kumkhua in lemdaihnak um tuk hi. David Kumpi ai-in uk tuk hi; Diknak le thuman tuah uk tuk, atu le kumkhua in uk tuk hi. Cungnungbel Topa in, hi thu hempoh hengtik tuk hi.

Topa In Israel Dantat Tuk

⁸ Topa in, Israel uknak le Jakob casuan tei humah thukhennak hengtik zo hi.

⁹ Hithu cu Israel mi hempoh le Samaria khuapi a, ummi hempoh ten thei haw tuk hi. Atu-in ultungzet le pualthau zetin um haw,

¹⁰ A muh ten, “Ukkhe innte cim khawng zo naven suang inn saleh tuk poh ung. Theipi kung tuah bawlmi khante talh khawng haw naven sidar thing phabel tuah inn saleh tuk ung ti haw hi.”

¹¹ Topa in, a ngalkapte cu ngaltho tukin le amuh do tukin sosuah hi.

¹² Nisuahnak lamah Siria le nitumnak lamah Filistin miten Israel thon khawng tukin kamka leng haw hi. Mah hei ten Topa i thinuknak cu pai ma laih, a khut cu mi bawlsia tukin dangto sa in um leng laih hi.

¹³ Israel mite a sual haw sikkik haw ma laih. Cungnungbel Topa in, dantat naven amah zuan nuam cuang haw ma.

¹⁴ Ni, ni khat sungin Topa in Israel hotu le mipite cu bawlsia tukin, a lu le a mei haw sattan tuk hi.

¹⁵ Mi upa le upattakte cu a lupi haw hi; zolthu bebek zilhtu profet cu a mei haw hi.

¹⁶ Hih puitu ten pui sualin, buai khawng zo haw hi.

¹⁷ Mah hangin Topa in, a khangnote cu pa khat hei luattik tukma hi; a meivongte le nu le pa nei ngawlte vang hehpih cuang tukma hi; itahim titale hih mihingte hi Pathian thei ngawl le mipha ngawl ngeh haw, a hilh haw mi thute cu thusia ngeh hi. Mahnung hei ten Topa i thinuknak cu pha cuang ma laih; bawlsia tukin a khut cu dangto sa in um leng laih hi.

¹⁸ Himi tei phatngawlnak cu ling le so a kang khawngtu mei bangin alh li lai hi. Hampa meikang bangin kangin, a khu cu dup ngelngulin, vanah kai hi.

¹⁹ Cungnungbel Topa a thinuk hangin a ngamsung hawah mei bangin kangin, mihingte cu tuahthing bangin cang haw hi. Unau ngaihsaktu pa khat hei um haw ma.

²⁰ Amuh haw babangin an cu dawkin, ei haw naven a ngilkial haw pha cuang ma. A sungsuak canote tian ei haw!

²¹ Manasseh mi le Efraim mite dodun haw, a pa nih haw tang langkhatin, Judah do haw hi. Mahnung hei ten Topa i thinuknak cu pha ma laih; bawlsia tukin a khut cu dangto sa in um leng laih hi.