ISAIAH 8 - Ngawm Bible

Isaiah In Capa Nei

¹ Topa in ka lakah, “Laingatnak tukin suangpek ngengpi pa khat la inna, mipi tei theih kimnak tukin; ‘Manlang-lon-manlang-la,’ tin nganin hi.

² Muantak mihing pa nih thiampi Uriah le Jeberechiah i capa Zekhariah cu theihpihtu in samin hi,” ti hi.

³ Mah nungten ka zi tuah zau ngel ung a, ca pai in, capano hing hi. Topa in, “A min cu, ‘Manlang-lon-manlang-la,’ ti in hi.

⁴ Nauno in, ‘Nu aw, Pa aw,’ tih hei a lawh thiam laih ngawlin Damaskas i hauhnak nate le sum le pai hempoh le Samaria a, ngal lonmi na hempoh cu Assiria kumpi in, la khawng tuk hi.”

Assiria Kumpi Hung Tuk

⁵ Topa cu ka lakah otpih lehin,

⁶ “Hi mihing ten mengdenin, a luangmi Shiloah Ngun tui cu lawlin kumpi Rezin le kumpi Pekah mai ah can tawtok a um haw hangin,

⁷ Topa keimah loli in, Assiria kumpi le a ngalkapte cu Judah do tukin hunpih tung hi. Eufrates ngun tuilunin, a mawkah a let khawng bangin hung luluih haw tuk hi.

⁸ Judah ngam sungah tuihautung bangin hung haw tuk a, mah tui cu ngawng tian bek hi tuk naven ihempoh khuh khawng tuk hi.” Pathian eimu lakah um! A zal zetmi a ha cu phalhin, a ngam uh hum tuk hi.

⁹ Maw ngam hempoh le minam hempoh aw! lungkhamin, munkhatah tawkdun khawm un. Ngai hem un, lam khawlapi a, ummite vang ngaldo tukin tuangtim un; mahnaven lau un! Hi zuh hi, tuangtim khawng un; mahnaven thinsu un!

¹⁰ Tuptahnak cu nei poh un! Mahnaven lawhtinnak imah nei cuang tukma uh ci. Na nuamzah uhin, awn un; thawn thong hi khawng tuk hi, itahim titale Pathian ka lak uhah um hi.

Topa In Profet Ngallinnak Pia

¹¹ Mipi tei zui mi lampi zui tuk ngawlin Topa in, a huham nasezet tuah ngallinnak pia hi.

¹² “A tuptah hawah tel kha pahsuh unna, a lau haw mi cu lau bok pahsuh un.

¹³ Cungnungbel Topa keimah bek hi a thiangthomi ka hihlam phawkngil pahsuh un. Keimah bek hi na lau tukmi ing.

¹⁴ Ka thianthohnak hi a lamdangmi a hih hangin keimah cu a bahnak haw suang bang ing. Keimah cu Judah ngam le Israel ngam a mipite le Jerusalem khuasung mite a awktu tuk, thangsiahmi bang ing.

¹⁵ Mi tampi cu bahin, lum haw tuk a, kehzan khawngin, thangin awk tuk hi.”

Mithi Thusiampih Tuk Ngawl Ngallin Piaknak

¹⁶ Noh ka nungzuitute, Topa in, ka lakah a hilhmi thute a cingkhawitu le a nungtiktu tuk hi uh ci.

¹⁷ Topa cu a mihing tei muh tuk ngawlin ngelh hi; mahnaven kei in, amah cu muang ing, ka muansannak cu ama lakah koih ing.

¹⁸ Hilai ah Topa i piakmi canote tuah um ung. Cungnungbel Topa i khunnak cu Zion Mualah umin, keimuh hi Israel tei lakah a langtiktu tukin a hahmi ung.

¹⁹ Mi tampi ten, mipolte le khutlam zothiamte, phuciakin, a ham li tei lakah leng tukin le thusiampih tukin pha hi ti haw tuk hi.

²⁰ Mahti bangin a tih haw ten noh ten, “Topa i zilhmite hi ngai saw un. Mipol tei thu ngai pahsuh un. A hilh haw mite cu nohtei ca in, haksatnak pen luattik thei tukma hi,” tin ti un hi.

Haksatnak Hun

²¹ Mipi ngilkial le thinukin, a kumpi le a Pathian haw tian tam haw tuk hi. Van cu zo haw tuk,

²² lei vang zo haw tuk naven haksatnak le khuathimnak sial ngawl a dang imah mu haw tukma. A lauhuaimi khuathim sungah tum haw toh hi. Hi haksatnak hun sung pen a luatnak haw tuk lampi um tukma hi.