ISAIAH 65 - Ngawm Bible

Ngalthotute Topa In Bawlsia

¹ Topa in, “Ka mitei thungetnak a don tukin ngalling zo naveng, thungen haw ma. Amuh tei tawh tukin, mansa naveng, tawk tuk hei tum haw ma! Ka lakah thu a ngen ngawl miphun tei lakah; ‘Hilai ah um ing, bawm tung hi’ tin, a don tukin a mansa naveng, ka lakah thungen viang haw ma!

² Thilpha ngawl bebek lungmu ngeng zetin, a bawltu le amu deihnak bek a zuitu tei lakah a catngawlin ka khutsan ing.

³ Zahcak hei thei tum ngawlin ka thinuktik leleng haw hi. Huan sungah dawih biakpiaknak bawl haw in, lawki tei biaklandawh humah namtui halte pia haw hi.

⁴ Zanngil ten mithi hawvang tawk tukin suangkua le khante ah hawh haw hi. Mahmi ten vokcik ei in, dawih bia tei dawi biaknak tuihang hawp haw hi.

⁵ Mahnaven midang tei lakah, ‘tawngkha pahsuh un, mi thiangtho ve ung,’ tin ti haw hi. Hiti bang mihingte cu a thuak hei thuak thei ma toh ing, a hum haw a, ka thinuknak cu a mit awng ngawlmi mei bang hi.

⁶ “Amuh bawlsiat tuk cu ngaisung cat zo toh ing a, ka thukhennak cu ngatsa hilhial zo hi. A thil bawlmi haw cu pa khatno hei pelh ngawlin mu khawng tung.

⁷ Amu sualman le a pi le pu tei sualman thuak haw tuk hi. Lawki miten mualhumah a tian haw mi biakpiaknak humah namtui halin, nautat haw hi. Mah hangin amuhte cu ni dang laihin, a bawl haw bangkekin bawlsia tung,” ti hi.

⁸ Topa in, “A kuamah in sabit ngah pha cu siatsuah awng haw ma; mah sangin buulah bilh saw haw hi. Mahti bang lengin ka mihingte vang siatsuah tuk mang hi. Keimah nadek tukin pan saw tung hi.

⁹ Judah hinnam ka mi Israel mite cu thupha pia tung a, a casuan ten mualhum ngam cu luahtum haw tuk hi. Ka tenmi ka miphunte cu ka nadek tukin mahlaiah um haw tuk hi.

¹⁰ Keimah bia in, a tuu le keel honte cu hamhing umnak mun Sharon munlawn i ni tumnak lam le Cimkhamnak Munlawn i nisuahnak lamah tatik haw tuk hi.

¹¹ “Mahnaven keimah a nunghektu, ka mual thiangtho Zion zamsanin, bawngphatnak Gad le bawngsiatnak dawi Meni a tih haw a biatu nohtei ca in mahtih bang cu hi kha tukma.

¹² Ka sam ten don ngawlin, na lak uhah ka ot ten na ngaih uh ngawl hangin sak thih ngehin thi tuk uh ci. Ka thu elin, a pha ngawlmi bawl cu nangmu tenmi hi.

¹³ Mah hangin hilh ing. Keimah a biatu le ka thu a zuitute cu eih le baak tuk tampi nei leleng haw tuk; mahnaven nohte cu na ngil uh kialin, dangdum tuk uh ci. Amuhte cu a lungdam haw tuk a, nohte cu zakca le mualpho in um tuk uh ci.

¹⁴ Amuhte cu thatui in lasa haw tuk a, nohte cu thasia zetin kap tuk uh ci.

¹⁵ Ka tenmi ka mihing ten na min uh cu awn sia hahnakin mang haw tuk hi. Topa keimah loli in thitik tung. Mahnaven ka thu a zuitute cu min thak pia tung hi.

¹⁶ Hi ngam sungah a ummi ten Pathian i thupha cu ngen haw tuk hi. Thutiam a bawltu hempoh ten muanhuai a himi Pathian minin bawl haw tuk hi. A bosa mi hun a haksatnakte cu bo tuk a, phawhngilh khawng hi tuk toh,” ti hi.

Lei Thak le Van Thak

¹⁷ Topa in, “Zo hemin, lei thak le van thak bawl li laih ing. A bosa mi cu phawhngilh khawng hi tuk hi.

¹⁸ Ka bawl thakmi i humah lungdam le thatui lelengin um un. Ka bawlmi Jerusalem thak cu lungdamnak tuah dim tuk a, khuasung mite cu a lungnopzet haw tuk hi.

¹⁹ Jerusalem khua le a mitei hangin keimah vang ka lungdam tung hi. Mahlai ah kahnak um tukma; bopnak nget vang kul tukma.

²⁰ Nau momno thih tih hei um tukma, mi hempoh a khankimin, nung haw tuk hi. Kum za khat a ting mite cu khangno tih hi haw tuk, mah laih ngawlin a thi haw tale keima dantat hi tih melciknak langtiktu tuk hi.

^21-22 Innsa haw tuk a, hut haw tuk hi. A innsak haw mi cu kuamah in huhsak haw tukma hi. Sabit cingin, sabittui in haw tuk, a kuamah in, insak haw tukma. Thingkung bangin ka mite a khan haw sau tuk hi.

²³ A nadehnak hawah lawhtingin, a casuante cu siatsuahnak tawk haw tukma hi. Amuh le a casuante cu kumkhua in muicu pia tung hi.

²⁴ Ka lakah thu a nget celh haw laih ngawlin donleh tung.

²⁵ Cingne le tuunote cu munkhatah an ei langkhat ten haw tuk a, khui bangin kiosa ten cangphol ei haw tuk hi. Ngul hei lauhuaileh tukma toh. Maw nang, Zion, ka mual thiangtho ah lauhuai le thilpha ngawl imah umleh tukma toh,” ti hi.