ISAIAH 63 - Ngawm Bible

Miphun Tei Humah Topa i Nehnak

¹ Edom ngam Bozrah khua pen a hung li laih mipa hi akua kaw? A san zetmi puan tuah thuamin, a nase zetmi a ngilnak tuah a hawhtu hi akua kaw? Topa pah cuh! Mi pan tukin mi ngilzet hi, a mi nehnak thuthan tukin a hung mi hi!

² Itakaw a thuam, puansilhte sabit suuktu tei van bangin a san khawng?

³ Topa in, “Miphunte cu sabit bangin suuk ing a, keimah bawm tukin kuamah tul haw ma, Ka thinukin suuk ing a, thisan haw in, ka puante theh kha khawng.

⁴ Ka mite ka patnak a hun hengin, a ngalte bawlsiatnak hun heng zo, tin khencat zo ing.

⁵ Ka elkim ka zo le a kuamah bawmtu ka neih ngawlam ka muh ten amzet ing. Mahnaven ka thinuknakin ngiltikin, keimahno in nehnak cu ngah suak ing.

⁶ Ka thinukin miphunte cu sikpekin, khenkeh khawng ing. A nunnak haw thisan cu lei ah bua lei khawng ing,” ti hi.

Israel Humah Topa i Phatnak

⁷ A pelh awng ngawlmi Topa i itnak thu son tung hi; Eimu ca a dehnak hangin amah cu thangphat ing. A hehpihnak le a thek awng ngawlmi a itnak i hangin Israel mite cu cangkim zetin thupha pia hi.

⁸ Topa in, “Amuh cu ka mihingte haw hi; Ituk mahten zol thong awng haw tukma,” ti hi. Mah hangin a thuaknak haw pepan hi.

⁹ Amuh pantu cu vancungmite kha ma hi. Topa amah loli hi. A itnak le a lainatnak hangin pan suak hi. A bosa mi hunah amah in cingkhawi leleng naven,

¹⁰ Amah cu dodalin, a hawvang thiangtho cu thasiatnak tuah dimtik haw hi. Mah hangin Topa cu a ngal hawah cangin, amuh do hi.

¹¹ Mahnaven a bosa mi hun, Topa nadektu Moses i hun laih phawk kiklehin, “A mihing hotute tuipi pen a nunpantu Topa cu atu ilai ah kaw? Moses lakah ngilnak huham a dang cuampengin, a piatu Topa cu ilai ah kaw?

¹² Ilai ah kaw kumkhua in, a min a thannak a nase zetmi thil bawlin, a mihing tei mai ah tuipi a khentiktu Topa cu a um?” tin dong haw hi.

¹³ Topa in, tui thukpi sung pen a pui ten, a kete cu cipuh tei ke bangin kho in, bah awng haw ma hi.

¹⁴ Khuihonte hamhing munlawn lamah a pui khawm haw bangin Topa in, a mihingte cu colhnak pia hi. Pui in ama min phatnakin suak hi.

Hehpihnak le Bopnak Ca In Thungetnak

¹⁵ Topa aw, thianthohnak le sunloihnak tuah na umnak vanhum khua pen zosuk zazalin hi. Keimu ca in deihsaknak na neihmi cu ilai ah kaw? Na ngilnak huham cu ilai ah kaw a um? Na itnak le na lainatnak ilai ah haw kaw? Zulzau thong pahsun hi!

¹⁶ Nangmah cu ka Pa uh hi ci. Ka pu uh Abraham le Jakob hei in, bawm thei haw ma; mahnaven Topa, nang cu ka Pa uh hi ci. Nangmah cu kohte a pansuak lelengtu pa ci.

¹⁷ Itakaw na lampi pen na pialtik? Itakaw mi lungliante na lak pen lampial na phal? Na nadektu tei hangin le nata ahi lelengmi na mihing tei hangin hek kikleh zazalin hi.

¹⁸ Ka ngal uhten na mite cu hilvawk khawng awndiak haw toh hi. Biakinn vang nawngkaitik zo haw hi.

¹⁹ Keimuh uk awng ngawl bangin umthong den sisi. Keimuh hi na mihing ahi awng ngawl bangin bawl ve cin hi.