ISAIAH 62 - Ngawm Bible

¹ Jerusalem thatuitik tukin hilh suak tung; Patnak a ngah laklawh le zanlam a detmei al bangin a nehnak a al laklawh daidenno in um tuk mang hi.

² Jerusalem, nehtu na hihnak cu miphun hempoh ten mu haw tuk hi. A kumpi haw ten na sunloih dan zo haw tuk hi. Topa amah loli i piakmi minin min thak tuah sam hi tuk ci.

³ Topa i ca in, a mawi zetmi kumpi lukhu bang tuk ci.

⁴ “Zam sanmi,” tin sammi hileh tukma toh ci. “Maakmi zi,” tih hei in, na ngam cu sam hileh tukma toh ci. Na min thak cu “Pathian a humah a lungdam,” tih hi tuk hi. Na ngam cu “Lungdam zetin huaimi,” tih hi tuk hi. Itahim titale Topa cu na humah a lungdamin hi. Na ngam ca in amah cu pasal bang tuk hi.

⁵ Tangval in khanglai thiang a huai bangin, nangmah vang a bawltu pa in huai tuk hi. Tangval cu a khanglainu i humah a lungdam bangin, Pathian cu na humah a lungdam bok tuk hi.

⁶ Jerusalem, na ngal kulhtian ngalviltu koih ing. A sun le zanin daiden thong haw tukma hi. Topa in, ama thutep a phawhngilh tuk ngawlin, Topa i lakah theihtiknak thu hilh leleng haw tuk hi.

⁷ Topa in, Jerusalem a nun lehtik laklawh le leihum buppi i thangphat tak khuapi a cantik laklawh; Topa cu colhnak hun pia haw tukma hi.

⁸ Topa in, siatcam thutiamin, a ngilnak tuah bawlsuak tuk hi. “Na ancang cu na ngal tei ca hi ngawltohin, na sabit uhte vang ngamdangmi ten insakleh haw tukma toh.

⁹ An a cingtu le a cawmtu in nangmu an cu ei tuk uh ci a, Topa cu thangphat tuk uh ci. Sabit a sialtu le a ngah thawitu ten Topa i biakinn sung pen sabittui cu intuk uh ci,” ti hi.

¹⁰ Jerusalem mite, na khuasung uh pen tul unna, a kiklehmi na mitei ca in lampi cek un hi; Lampi bawl unna, suangte vawk pial un hi.

¹¹ Leihum buppi i theih tukin melciknak takto un hi. Topa in, “Jerusalem mite hilh un hi. Amuh pantu Topa hung li laih; a patsa mi mihingte cu a lakah hunpih hi,” tin, miphun hempoh lakah than hi.

¹² Nangmuhte cu “Pathian Mi thiangtho,” “Topa i patmite,” tin sammi hi tuk uh ci a, Jerusalem cu “Pathian i Khuapi Thiangtho,” “Pathian i zamsan ngawlmi khuapi” tin sam hi tuk hi.