ISAIAH 61 - Ngawm Bible

Luatnak Thuthang Pha

¹ Topa i hawvang cu ka lakah umin, a ngilnak tuah dimtik hi. Topa in keimah tengin, mi ca-ngah tei lakah thuthang pha hilh tukin, lungmu tamzante damtik tukin, ngalmatmi tei lakah luatnak thuthantu tukin, thawngta mitei lakah luatnak thu hilhtu tukin hah zo hi.

² Topa in, a mihingte nunpan tukin, A ngalte a nehnak hun heng zo, tih thuthantu tukin keimah hah hi. A khawngai mite nemtu tukin le

³ Zion pen a tauli tei lakah thasiatnak ai-in, lungdam thatuinak Khaw-ngaihnak ai-in, thangphatnak la hentu tukin keimah hah zo hi. Topa ama phutmi thingkung bang hi haw tuk hi. A venghawng haw in, a manmi bawl haw tuk a Pathian cu a thil bawlmi hangin thangphat hi tuk hi.

⁴ Kum ngeipi buakvawknak a hi zo mi, khuapi cu sakleh kik hi haw tuk hi.

⁵ Ka mihingte cu ngamdangmi ten a nadeh sak haw tuk hi. Na tuuhon uhte cingkhawi haw tuk; Na lo uhte bung haw tuk a, na sabit huan uhte sial haw tuk hi.

⁶ Nohte cu Topa i thiampi tihmi hi tuk uh ci. Miphun dang tei hauhnak cu ei tuk uh ci a, mite ultunnakin mang tuk uh ci.

⁷ Na zahcaknak uh le na mualphonak uh cu bo thal hi. Nangmu ngam sungah um tuk uh ci a, Na hauhnak uh cu a let nihin pung tuk hi. Kumkhua in lungdam tuk uh ci.

⁸ Topa in, “Diknak cu deih ing. Mahnaven pualthaunak le thisan luannak cu hua ing. Ka mite cu a dehman haw manzetno in pia tung a, amuhte tuah kumkhua in, a kho mi thutiamnak bawl tung.

⁹ Miphun hempoh lakah a min haw thang tuk; a mutu hempoh ten keima muicu piakmi miphun tih thei haw tuk,” ti hi.

¹⁰ Topa i thil bawlnak hangin Jerusalem cu a lungdam tuk hi. Huaidunnak tukin van a thuamdunmi monu bang haw hi. Pathian in patnak le nehnak tuah thuamtik zo hi.

¹¹ A thammi um ngawlin a poto mi le a khangto mi anci bangin Topa in, a mite cu pan tuk hi. Topa cu miphun hempohin thangphat haw tuk hi.