ISAIAH 60 - Ngawm Bible

Mailam Ca Jerusalem Sunloihnak Tuk

¹ Jerusalem, tho inna, ni bangin alin hi; Topa i sunloihnak cu na humah vak hi.

² Miphun dang hempoh cu thimnakin khuh tuk hi. Mahnaven Topa i vaknak cu na humah vak tuk hi. Ama sunloihnak cu na humah um tuk hi.

³ Miphun hempoh ten na vaknak cu zuanin, Kumpi ten na nisuak thak cu zuan haw tuk hi.

⁴ Na elkim cuan inna, zo in! Na mite a pin tukin tawkdun khawm li haw hi. Na capate ngam khua lapi pen pinin, Na canute cu nauno bangin pua haw tuk hi.

⁵ Mah na muh ten na lungdam leita in can tawtok lamsang tuk ci. Tuipi ngalkhat lam pen a hauhnakte hentum pihin, Miphun tampi tei neih le siah cu na lakah hentum pih haw tuk hi.

⁶ Midian ngam le Efah ngam pen kalauk honpi in hung haw tuk hi. Sheba ngam pen hung haw tuk a, sui le pak namtui puatum haw tuk hi. Pathian i thil bawlmi thuthangpha cu miten phuang haw tuk hi.

⁷ Kedar le Nebioth miten tuu hempoh cu, Na lakah biakpiaknakin pia tum haw tuk hi. Topa i lungdamnak tukin biaklandawh humah Biakpiaknak bawl haw tuk hi. Topa in, a Biakinn cu nase dedeuhin bawl tuk hi.

⁸ A innlam zuanin, a lengmi khulo bangin le meingo bangin a zawkin, a hungmi tinbawte cu kuate haw kaw?

⁹ Ngam khawlapi pen hungin Pathian i mihingte a puatu timbaw hi haw hi. Israel i Pathian thiangtho, Ama mihingte upatnak piatu tukin Miphun hempoh a bawltu Pathian i min thangphatnak le upatnak piatu tukin Sui le ngun pua haw hi.

¹⁰ Topa in Jerusalem i lakah, ngamdangmi ten na ngal kulhtian tiang haw tuk; a bawi haw ten na nadek haw tuk hi. Ka thinukin bawlsia zo toh ing; mahnaven tu pepan ka mitmai pha mu tuk ci a, na humah hehpihnak nei tung hi.

¹¹ A sun a zanin, na kongka cu hon hi tuk a, hinnam hempoh tei kumpi ten a hauhnak haw hen tum haw tuk hi.

¹² Mahnaven nangma na dek ngawltu miphun cu bo khawng haw tuk hi.

¹³ “Lebanon tupi sung a thing phabelte cakthing, hual thing le caksan thingte cu Jerusalem nangmah sak thak lehnak tuk, ka Biakinn mawitiknak tukin le ka khuapi sunloihnak tukin puatum haw tuk hi.

¹⁴ Nangmah a bawlsiatu tei capa ten na mai ah upatnak pia in kun haw tuk hi. A zawnsaktute cu nangma ke bulah bok haw tuk a, Topa i khuapi! Israel i Pathian thiangtho i khuapi Zion,” tin sam haw tuk hi.

¹⁵ Hawlvawkmi le huatmi hileh tukma toh ci. Zamsanmi le a dai khipkhep khuapi hileh tukma toh ci. A nase mi le a mawimi in bawl tung a, kumkhua nunnopnak khuapi in cang tuk ci.

¹⁶ Miphun tampi le kumpi ten cingkhawi haw tuk, nu in, a cano a cinkhawi bangin hi. Topa keimah in pan zo toh ing, Israel i Pathian Cungnungbelin ka luattiknak hi thei tuk ci.

¹⁷ Daal ai-in sui puak tung. Thik ai-in ngun puak tung. Thing ai-in daal puak tung. Suang ai-in thik puak tung. Nangmah uktu ten bawlsialeh haw tukma toh. Diknak le lemdaihnak tuah uktik tuk toh ing.

¹⁸ Thahdunnak thawmnging theileh tukma toh ci. Siatsuahnak cu na ngam sungah hengleh tukma toh. Ngal kulhtian bangin keimah loli in cingkhawi in pan tung hi. Ka pat zo toh hangin keimah cawimawi leleng tuk ci.

¹⁹ “Sunlamin ni cu na vaaknak hileh tukma toh. Zanlamin hade cu na vaaknak hileh tukma toh. Topa keimah cu a kumkhua in, na vaknak hi tuk toh ing. Ka sunloihnak huham vaknak cu na humah suak tuk hi.

²⁰ Na lungsiatnak hun can uh bo tuk toh. Topa keimah cu a kumkhua in, na vaknak hi tung. Ni le hade sangin ngeiphat saw tuk hi.

²¹ Na miten a manmi bawl haw tuk a, hi ngam cu a kumkhua in luah haw tuk hi. A venghawng haw humah ka thawm ngengnak langtik tukin ka phutmi le ka bawlmi hi haw hi.

²² Na mi lak pen a neubel le a nautabel innkuate hei cu leihum pen a ngilmi miphunte bangin nasezet haw tuk hi. A hun a kim ten, manlang zetin hengtik tung. Keimah hi Topa ing,” ti hi.