ISAIAH 56 - Ngawm Bible

Mi Hempoh Cu Topa i Mihing Haw

¹ Topa in, a mihing tei lakah, “A ngei ngawlin nohte pan tuk ka hih hangin, a dikmi le a manmi bawl un hi.

² Sabbath cang lelengin, a mang khial ngawltu cu muicu pia tung.”

³ Topa i mihing tei lakah a tangtu ngamdangmi ten, “Topa in, a mihingte tuah Pathian biak langkhat tuk phal tukma,” tin ti haw pahsuh hen. Tilngehmi ten, “Ca nei thei ngawl ka hih uh hangin, Pathian i mihing tei lakah tualtel zo tukma ung, ti haw pahsuh hen.”

⁴ Hitih bang mihing tei lakah Topa in, “Sabbath cangin, le keimah upatin, ka deihmi a bawltu le ka thutepmi a zui lelengtu cu,

⁵ ka Biakinn sung le ka mitei lakah na min uh theih leleng hi tuk a, canu le capa cawi in, na min uh a than tuk sangin, na min uh cu ngeideuhin cin leleng hi tuk hi. Ituk mah ten phawhngilh hi tukma uh ci,” ti hi.

⁶ Topa i mihing tei lakah a telmi ngamdangmi ten, Topa cu it in, a nadektu le sabbath ni cangin, a thukam manno a zui tei lakah Topa in,

⁷ “Ka mual thiangtho Zion ah, henpih tung; ka thungetnak inn pen lungdamnak pia tung a, ka biaklandawhah na piak uhmi biakpiaknak cu sang tung hi. Ka Biakinn cu miphun hempoh tei ca in thungetnak inn ti haw tuk,” ti hi.

⁸ Saltannak pen a mihingte suahtu Topa Pathian in ama mite tuah khawmdun tukin le miphun dang pui tukin thutiam hi.

Israel Hotute Siatson Tawk

⁹ Topa in, miphun dangte cu sahang bangin hungin, a mite botkek khawngtik hi.

¹⁰ Topa in, “Israel hotute aw, ka mihingte ngallinnak a hilhtu tuk tei mit caw khawng hi. Theihmi imah nei haw ma. Inncingtu hi naven mi naakthei ngawlmi uico tuah bangten haw, hihbu in mang nei liphet thong haw hi. Hihbuh a nuam theih haw dan cu son tuk um haw ma!

¹¹ A hampumdan haw cu khamtih nei ngawl uico bang thong haw hi. Theihtupnak nei ngawl hotu hi haw hi. A venghawng haw in amu deihmi bek bawlin, amu metnak tuk bek zei haw hi.

¹² Hung un hi, sabittui in nung. Dut theih zahin dut nung! Zing ten tuni sang hei in, nop saw lalaih tuk: tin, a khamtu ten ti haw hi.”