ISAIAH 55 - Ngawm Bible

Pathian i Hehpihnak

¹ Topa in, “Hung un, dangdum hempoh hung un hi, hilai ah tui um! Hung un, sum a nei ngawlte an lei in, ei un hi. Hung unna, sabit le khuinawi lei un; a thawnthongin ngah tuk uh ci.

² Itakaw an a hi ngawlmi ca in sum na manli uh? Itakaw vonvahtik thei ngawl ca in nilawh na piak lih uh?

³ “Ka mihingte, ngai unna, ka lakah hung un; ka lakah hung unna, nunnak ngah tuk uh ci. Nangmuh tuah kumkhua a kho mi thutiam bawl tung a, David lakah ka tepmi thupha cu pia tung.

⁴ David cu hotu le miphun tampi puitu in bawl ing a, amah mangin ka ngilnak langtik zo ing.

⁵ Atu-in, miphun tampi sam tuk uh ci; A thei awng ngawltu ahi hei in, nangmu lamtang tukin zuan dedeuh haw tuk hi. Israel i Pathian thiangtho, Topa na Pathian uh Keimah in hi bangin cangtik tung. Upatnak le sunloihnak pia tung,” ti hi.

⁶ A tawh theih laihin Topa cu zei un hi, a nai laihin amah cu sam un.

⁷ Mipha ngawl ten a ziaza haw zamin, a ngaihsut dan haw khel hen. Topa a Pathian uh i lakah kikleh haw henna, ngaidam paih zen tuk hi. Amah cu mi hehpihtu hi.

⁸ Topa in, “Ka ngaihsutnak,” cu na ngaihsutnak uh bang kha ma. Ka lampi le na lampi uh dangdun haw hi.

⁹ Vante khi leihum sangin a sang saw bangin, ka ngaihsutnak le ka lampi cu na ngaihsutnak uh le na lampi uh sangin sang saw hi.

¹⁰ “Ka awnkam cu van pen lei kawttik tukin a cakmi vuk le nguahtui bang hi. Daita le van nguah ten an kungte khangtik haw hi. Cinmi ancite po totikin, eih tukin a ngui le ngah suaktik hi.”

¹¹ “Ka kam sung pen a tulmi awnkam cu mahti bangin hituk hi. Imah bawlsuakmi nei ngawlin ka lakah kikleh tukma hi. Dek tukin ka tuptahmi hempoh cu dek khawng tuk hi.”

¹² “Lungdam zetin Babilon pen tul kik tuk uh ci, thatui zetin puitulmi hi tuk uh ci. Na mai uhah mualsang hihen, mualniam hihen, lasa in au bengbung haw tuk hi. Thingkungte vang lungdamin, au leilui haw tuk hi.

¹³ Lingkung ponak munah, cak thing po tuk hi. Ling honpi ponak munah lemmui kung po tuk hi. Keimah, Topa i bawlmi theitik lehtu melciknak hi leleng tuk,” ti hi.