ISAIAH 54 - Ngawm Bible

Topa i Israel A Ihnak

¹ Jerusalem aw, ca nei ngawl, micingnu bang ci. Mahnaven atu-in, na lungdamin lasa in hi. Atu-in, a pasal i zamthong awng ngawlmi numei sangin cano tam saw nei tuk ci.

² Na puanbuk ngeng deuhtikin hi! Puan kennak a khau sautik deuh inna, na ngolh khet khim zetin bawlin hi.

³ Na ngamngi cu na ngam elkimah kauh deuh in hi. Miphun dang tei luahtummi na ngam cu na hinnam ten coleh haw tuk hi. Atu-in khing diudeu mi khua cu mihing dimleh khawng haw tuk hi.

⁴ Imah lau pahsun. Zahcak tawkleh tukma toh ci. Mualpho in umleh tukma toh ci. Zi dawnno na hih laih a, na tangzangnak le meivong na hih laih a, khawngai lunglengin, na umnakte cu phawkleh kha tukma toh ci.

⁵ Nangmah a piangtiktu, Cungnungbel Topa cu na pasal bang hi tuk a, A thiangtho Pathian, Israel i Pathian in pan tuk hi. Amah cu leihum buppi uktu hi.

⁶ Israel aw, Zi dawnno bang hi ci. A pasal i maakmi le lungleng khawngai in, a ummi numei bang ci. Mahnaven Topa in, ama lakah samlehin:

⁷ “Hun dawmno sung khen hih ing. Nangmah ka ihnak a thuk leita hangin sam kikleh tung.

⁸ Hun comno sung ka thinukin, langlam hek san ing hi; mahnaven a kumkhua in, a kho mi ka ihnak cu lak tung,” ti hi. Nangmah a pantu Topa in ti hi.

⁹ “Leihumah tuihau tungtik tuk ngawltohin, Noah lakah thutiam zo ing. Atu-in, na humah thinukleh tukma toh ing, tin thutiam ing. Bawlsialeh hihim tukma toh ing. A liat hei liatleh hihim tukma toh ing.

¹⁰ Mual sangpi le mualniamte a cim khawng hei in, nang ka ihnak cu ituk mahten bo thong tukma hi. Pia tung hi tin, ka tepmi lemdaihnak kimtik leleng tung hi,” tin nang a ittu, Topa in ti hi.

Jerusalem Thak

¹¹ Topa in, “Maw Jerusalem, bawmtu nei ngawl, siat theih thuaktu khuapi, nemtu kuamah nei ma ci. Na inn mun cu suang manpha tuah dinsakleh tung.

¹² Na ngalvilnak innkuate cu rubi suang manpha le na kongkate cu mei bang a lingmi suang manpha tuah na elkim pangte cu suangvalin sahsakleh tung hi.

¹³ “Na mite cu keimah loli in zilh tung a, lemdaihnak le khantohnak pia tung hi.

¹⁴ Diknak le phatnakin ngiltik tung. Bawlsiatnak le launak pen luat tuk ci.

¹⁵ Midang ten a do haw tale keima thu ngawlin do na hi haw tuk hi. A dotu pawpoh cu sung haw tuk hi.

¹⁶ “Mei zapin, hiamnam a bawltu pumsupa cu keima bawl hi. Mi thahnak tukin mah hiamnam a mangtu ngalkap a bawltu hei cu keimah ing.

¹⁷ Mahnaven iti bang zahin, bawlmi hiamnam hei in hihen, tong kha baan tukma hi. Sual a nawntu awnkam hempoh cu donleh cikcek thei khawng tuk ci. Keima nadektute cu pan tung a, nehnak pia tung tin, Topa in ti zo toh hi.”