ISAIAH 53 - Ngawm Bible

¹ Mipi ten, a thu hilh haw hi, a sangtu um sap haw a ni maw? Hithu ah, Topa i khut a mutu um sap haw a ni maw?

² Topa i deihnak bangin a dektu cu thingkung bangin po hi; lei ko lak a, po thingzung bang hi. Zoh nop tukin a diangnak le mawinak nei ma. A lungmu le a mit uh a latu tukin mawinak imah nei ma.

³ Amah cu a zotsak uhmi le a vawkthong uhmi hi. Natnak le haksatnakte thuak hi. Kuamah in, a zo hei zo nuam haw ma. Phukthong poh tin, a zamthong uhmi hi.

⁴ Mahnaven amah cu eimuh tei siat theihnak a thuaktu hi. A natnak uh puatu hei hi sih. A siat theihnak le a thuaknakte cu Pathian i bawlsiatnak hi tin ngaisung hung.

⁵ Mahnaven eimuh tei sualnak hangin maliam hi. Thilpha ngawl a bawl uh hangin vahnak tawk hi. Bawlsiatnak a thuakmi cu eimuh tei nunpatnak tuk hi.

⁶ A paimi tuu bangin vakvai khawng hung. Eimuh tei nuamnak lam tekah hawh thong hung. Mahnaven Topa i dantatnak cu a hum uhah hengtik hi. A thuak tuk uhmi sualman dantatnak tawk hung.

⁷ “Bawlsiazet haw naven, niamkhiatnak tuah thuak kawko in, kam khatno hei awn ma hi. Ngawh tukin a hawhpih haw mi tuuno bangin le a mulmeh tukmi tuu bangin kam khatno hei awn ma hi.

⁸ Amah cu man haw, thah tukin a thukhen haw hi. A thih tuk hei cu kuamah in poi sa kha haw ma. Eimuh, mihing tei sualnak hangin thihnak tawk hi.

⁹ Thil sual bawl awng ngawl le zolthu son awng ngawlmi hi naven mipha ngawl tei khanah koih langkhat haw hi. Mihau tei lakah vui haw,” tin ti haw hi.

¹⁰ Topa in, “A thuak tuk cu keima deihnak hi. A thihnak cu ngaihdamnak a hengtiktu biakpiaknak hi. Kum ngeipi nungdamin, a casuante mu tuk hi. Ama sung pen ka tuptahmi kim tuk hi.

¹¹ Haksatnak a thuak nungten lungdamnak tawk tuk; A thuaknak cu a thawnthong ma hi tih cu thei tuk hi. Amah cu a dik, a manmi keima nadektu a hih hangin ka lungdam ing. Mi tampi tei ca in dantatnak thuak tuk a, amuhte cu a sualnak haw ngaidam tung.

¹² Mah hangin amah cu upatnak mun pia tung a, mihau le mi ngil tei lakah koih tung hi. Lungkim zetin, a nunnak a piak hangin mipha ngawl tei lakah sialcih hi zo. Misual tei sualman thuakin, a sual haw ngaihdam ngetsak hi,” tin ti hi.