ISAIAH 52 - Ngawm Bible

Pathian In Jerusalem Pan Tuk

¹ Jerusalem aw, khanglo in; khanglo inna, tha la lehin! Pathian khuapi thiangtho, a mawi mi in thuam lehin hi. Pathian thei ngawlte cu na kongka sungah tumleh haw tukma toh hi.

² Jerusalem aw, luat tohin hi! Leivui lak pen tho inna na khunnakah khungin hi. Sal matmi Zion mite aw! A kennak haw thik taicinte cu duk tohin hi.

³ Topa in, a mitei lakah, “Nangmuh leinak sum pia haw ma hi, mahnaven salah cang uh ci. Nangmuh patnak tukin imah piak kul ngawlin thawnthongin luat hilhial tuk uh ci.

⁴ Ni dang laihin Izipt ngamah um uh ci a, mikhualin cang uh ci. A nungten imah thu um ngawlin Assiria ten bawlsia haw hi.

⁵ Atu-in, Babilon ah mahti bangkekin piang leleu; imah thu um ngawlin sal matmi in suak uh ci. Nangmuh uktute cu tuangkhawng le pualthau in, keimah zawnsaktu leleng haw hi.

⁶ Mahnaven hun cu heng tuk poh a, keimah hi Pathian ngangai ka hihlam thei tuk uh ci. Nangmu lakah a awntu cu keimah ka hihlam thei tuk ci,” ti hi.

⁷ Mualhum pen hungin, suahcaknak le lemdaihnak thuthangpha a phuangtu i ke cu itih zahin kaw a mawi? Zion lakah nehnak thuthanin, “Na Pathian uh cu kumpipa hi,” tin ti hi.

⁸ Khuapi cingtute cu lungdamin au leilui haw! Zion ah Topa hungleh zo tih cu a mit loli in mu haw hi!

⁹ Jerusalem buakvawkte lungdam thatui in au li poh un! Topa in, a khuapi cu hupin, a mite cu hehnem hi.

¹⁰ Topa in, a huham thiangtho suahin, a mite pan tuk a, lei buppi in mu khawng haw tuk hi.

¹¹ Tul un! Babilon cu taisan un: Biakinn na kemtute! Zehsah mi na zenvaing pahsuh un. Thiangthono in um unna, hi khuapi cu zamsan un.

¹² Tu tumah nawhkhah zetin tai kul tukma uh ci. Ngaltai bangin tai kul tukma uh ci. Topa na Pathian in lamhuai tuk a, na nung le ma uh pen cing tuk hi.

Topa Nadektu i Thuaknak

¹³ Topa in, “Zo hemin, keima nadektu cu a nadehnakah lawhtingin, Mitei upatbelmi hi tuk hi.

¹⁴ Mi tampi ten amuh haw ten mihing mel hei bangleh ngawl toh a hih ten lamdang sazet haw hi.

¹⁵ Miphun tampi ten a zoh haw ten, amthong haw tuk, Kumpi tampi ten lamdang sa in, ot tuk imah thei haw tukma. A zoh haw ten ni dangin, a theih awng haw ngawlmi thei haw tuk,” ti hi.