ISAIAH 51 - Ngawm Bible

Jerusalem Hehnemnak Thu

¹ Topa in, nunpatnak a deihmite, ngai hem un! Keima bopnak deihin, a hung mite, na tulnak uh suangpi khi ngaisung un, a cawhsuaknak haw suang khi!

² Na pu uh Abraham le a hing suaktu Sarah khi ngaisung hem un. Ka sam laihin Abraham cu ca nei ma hi. Mahnaven thupha pia ing a, cano vang pia ing. A casuante cu tampi pungtik ing.

³ Jerusalem humah lainatnak nei tung, siatsuah khawng sa mi, a khua le ngam a ummi tei humah a ngam cu phillawnin cang naven huandumin cang lehtik tung. Eden a ka koihmi huandum bang tuk a, lungdam thinnopnak um tuk hi. Keima lakah lungdamnak le thangphatnak tuah dim tuk hi.

⁴ “Maw ka mihingte ngai hem un, hinnam hempoh tei lakah ka thuhilhnak hengtik tung. Ka daante cu amu ca vaaknak hi tuk hi.

⁵ Manlang zetin hung tung a, pan tung hi. Mi ka nehnak naino zo. Miphun hempoh cu keimah loli in uk tung hi. Ngam khawlapi ten ka hun tuk ngakhelzet haw, ka pat tuk cu muansanin ngakhel haw hi.

⁶ Vante cuan teh hem un. Leipi khi cuan hem un! Van khi meikhu bangin pai haw tuk a, Leipi hi, puan lun bangin balkek tuk hi. Mi hempoh cu tho bangin thi khawng haw tuk naven ka mipatnak cu kumkhua phat tuk hi. Ka minehnak cu kum zangza in kho tuk hi.

⁷ Diknak a theitu nohte, ngai un. Ka zilhnak lungmu sungah a koihtu! Midang ten thumin, a zawnsak haw hei in imah lau pahsuh un!

⁸ Mahti bang mihingte cu puansia bangin bo thong haw poh hi. Mahnaven ka mipatnak cu kumkhua phat tuk a, Ka minehnak cu kum zangza in kho tuk hi.”

⁹ Topa aw, tho inna, bawmin hi! Na ngilnak suah inna, panin! Tanglaihin, na suah awng bang bokin suah lehin hi. Tuipi thuanthum a ngulpi Rahab a thattu le a satzantu cu nangmah ci.

¹⁰ Tuipi a kangtiktu le na patmite a hawh suak theih hawnak tukin, tui lak a lampi a bawltu cu nangmah ci.

¹¹ Na patsuah mite cu Jerusalem ah, lungdam thatuino lasa thahin le au thahin heng haw tuk hi. Kumkhua lungdam haw tuk a, lungsiatnak le khaw-ngaihnak pen kumkhua in luat haw tuk hi.

¹² Topa in, a ngiltiktu cu keimah ing. Ita nge hampa bangin a khan commi le a thi thei mi, mihing cu na lau lih uh?

¹³ Nangmah a bawltu Topa, vante zalhin le leipi piannak bul a koihtu Pathian cu phawk ngil thong zo uh cim maw: Itakaw nangmuh a bawlsiatu tei thinuknak le nangmuh siatsuah tuk a tumtute cu cantawtokin, na lau lih uh? A thinuknak haw in tawngkha baan moh haw tukma;

¹⁴ Atu thawngta mite cu a ngei ngawlin, luat haw tuk hi. A nun haw sau in, a deihzah haw in eih tuk an mu haw tuk hi.

¹⁵ “Keimah hi Topa na Pathian uh ing hi. Tuipite cu keimah in phong ing a, tuicawkpite cu thum bengbungtik ing. Ka min cu Cungnungbel Topa ing.

¹⁶ Vante zalhin, leipi i khunnak vang keimah in phut ing. Jerusalem lakah, ‘Nangmah cu ka mihing hi ci. “Ka thuzilhmi pia zo toh ing a, ka khut tuah hup ing,” ti hi.

Jerusalem Thuaknak Bo zo

¹⁷ Jerusalem aw, khanglo tohin! Khang inna tho in hi! Topa in, a thinukin, a intikmi bawlsiatnak khuat cu in zo toh ci. A nin nawn tian in ci a, lumpektik zo toh hi.

¹⁸ A phongtu kuamah hei um haw ma. Na ngualcam lak pen a khut haw sanin, a phongtotu kuamah um haw ma hi.

¹⁹ Bawngsiatnak nam nih tawk ci. Ngaldonak hangin na ngam cu sia khawngin, na mite cu tui le an ngawlin ko khawng haw hi. A hehpihtu kuamah um haw ma hi.

²⁰ Lam kawinak tihkimah na mite cu tamsawlin lum peelpuul haw hi. Thangsiahtu pa i awhmi sazuk bangin, Pathian thinuknak thuak haw hi.

²¹ Haksatnak a thuaktu Jerusalem mite le zukham misil bangin a lumlitute;

²² Topa na Pathian uhin panin, nangmu lakah, “Ka thinukin ka piakmi khuat cu na khutsung uh pen laleh li laih ing. A lumbahtiktu zu cu in kulleh tukma toh ci.

²³ Nangmuh a bawlsiatute, lampi pen a lumtiktu, buak sihpek bangin a sikpektu tei lakah mah khuat cu pia tung,” ti hi.