ISAIAH 50 - Ngawm Bible

¹ Topa in, “Mi pa khatin, a zi a maak bangin ka mite hi maak bok tukin maw na ngaih sut uh? Mahti bang ahi tale ka maaknak lai ilai ah kaw? Mi pa khatin, a canote salah a zuak bangin, ngal matnakah zuakin maw na ngaihsut uh? Mah kha ma hi. Nangmu sualnak hangin ngalmatmi hi uh ci! Thil sual na bawl uh hangin hawlvawkmi hi uh ci.

² “Itakaw ka mihingte pan tukin ka hawh ten kua mah i otpih tawk mang? Itakaw ka sam ten kuamah in, na don uh ngawl? Amuh hup tukin nemcuam viang ma ing maw ikaw? Ka thu piaknak hangin tuipi thuanthum kang khawng. Luite cu phillawnin cang khawng haw hi. Tui a um ngawl hangin tui sung ngasate thi khawng haw hi.

³ Vante hei thimtik thei ing. Mithi ngai bangin a mitmai ti liamluam khawng,” ti hi.

Topa Nadektu Thu Ngaihnak

⁴ Cungnungbel Topa in son thiamnak lei pia. Thabote ngil lehtik tukin; zingsial ka beng vaktik, a zilhmi thu thei theitu tukin hi.

⁵ Topa in theihtupnak lungmu pia. Amah cu langpang mang, nung hei hek mang hi.

⁶ A vattu tei ca in ka ngumzaang dawh ing; a zawnsaktute kham mang hi. Ka khamul botin, ka mai ah cil a siak haw hei liat mang hi.

⁷ A zotsaknak haw cu kei ca in natik mang. Itakaw titale Topa Pathian in bawm hi. A bawlsiatnak thuak haw thei tukin pasal cuh ing, mualpho in um tuk mang tih thei ing.

⁸ Itahim titale Pathian cu ka elah umin, thiancotik tuk hi. Sual a nawn ngamtu akua um haw kaw? Thukhennak munah hawh pah nung. Sual nawn himpo haw hen!

⁹ Topa amah cu mi pantu hi; Akua in kaw khial ci, a ti ngam tuk? Sual a nawntu hempoh cu pha thong khawng haw tuk hi. Baalbu in, a muatmi van bangin bo haw tuk hi.

¹⁰ Topa kihca in, a sila awnkam a ngaitute, na hawhnak uh lampi cu khua a thim vangin Topa cu muang un. Na Pathian uh cu ngaingam un hi.

¹¹ Midang siatsuah tukin a suamtute, na mi suamnak uhin, nangmuh siatsuah tuk hi! Topa in mah tin cangtik tuk a, lungapnak thuak tuk uh ci.