ISAIAH 49 - Ngawm Bible

Miphun Tampi Tei Lakah Vaknak

¹ Ngam khawlapi ah a ummi ngamte, ngai hem un! Khualzinte vang! Ka pian laih ngawlin Topa in teng zo; Ama nadektu tukin dehvo pia hi.

² Ka awn cu ngalnam bangin hiamtikin, a khut tuah hup hi. A hiamzet mi le man tukin koihsa mi thalcang bangin bawl hi.

³ Amah in ka lakah, “Maw Israel, nang cu ka nadektu ci; Nangmah hangin miten keimah thangphat haw tuk,” ti hi.

⁴ Kei in, “Dekli na vengin thawnthong ngeh hi. Ka zaangtha bo khawngin ka deh suahmi imah umma ti ing.” Mahnaven Topa cu a pha ngawlmi phatiktu le a dik ngawlmi dik zetin, a bawl theitu hi tih cu muang lo poh ing; Ka dehnak hangin amah in thaman pia tuk hi.

⁵ Ka pian laih ngawlin, Topa in dehvo na sem zo; A mihingte puikik tukin le a khen siamsuammi Israel mite kikleh tukin ama nadektu in bawl hi. Topa in minphatnak pia hi. Amah cu ka ngilnak bulpi hi.

⁶ Topa in, “Ka nadektu, na dehvo thu pi sesem um hi; A tang calam Israel tei nelah, ni dang laih bang lengin minthannak na hen lehtik tuk bek hi ngawlin, Lei buppi in luatnak a ngah theihnak tukin, nangmah cu miphun tampi tei lakah vaaknak tukin bawl tung,” ti hi.

⁷ Mitei zotsakmi, miphun tampi tei huatmi, uktu bawi tei umlawh nadektu tei lakah, a thiangtho Pathian Israel pantu in, “Mi luat na hihnak cu kumpi ten mu haw tuk a, upatnak a langtik tukin ding haw tuk hi. Kumpi capate le bawi ten mu haw tuk a, upatnakin, na mai ah kun haw tuk hi.” Topa Israel Pathian thiangtho in, a nadektu in teng zo toh hi. A thutepmi a kimtik leleng hangin a hum a bangin piang ngangai tuk hi.

Jerusalem Dinlehnak

⁸ Topa in, a mitei lakah, nangmuh patnak ni a hen ten bawm tung hi. Bopnak na nget uhmi cu za tung. Cingkhawi tung a, humhim tung hi. Nangmu sung pen mi hempoh lakah thutepnak bawl tung hi. Na zamsa uhmi ngam sungah umlehtik tung.

⁹ Thawngta tei lakah, ‘Tul toh un hi,’ ti tung. Thimnak sung ummi tei lakah, ‘Vaknak sungah hung toh un; ti tung. Mualhum a, an a ei litu cu tuu bangin hi haw tuk hi.

¹⁰ Ngilkial le dangdumin um haw tukma. Nisa le phillawn nisa in siatsuah tukma hi. Itahim titale amuh a deihtu in cingkhawi tuk a, ciktui umnak munah pui tuk hi.

¹¹ “Mual humah lampi ngengpi bawl tung a, Ka mitei hawhnak lampi cu sial tung hi.

¹² Ka mite cu ngam khawlapi pen pin haw tuk; Saklam le nitumnak lam, hanglam Asuan khua hei pen hung haw tuk hi.”

¹³ Maw vante, lasa un hi! Maw leihum, lungdamin au un! Mualte vang lungdamin lasa haw hen! Topa in, a mite hehnemin, a thuakzettu a mitei humah hehpihnak nei tuk hi.

¹⁴ Mahnaven Jerusalem miten, “Topa in nunghek zo, phawkngil zo toh,” tin ti haw hi.

¹⁵ Mah hangin Topa in, numei in, a sungsuak ca cu phawkngil thei a ni maw? A hinmi a ca cu deih ngawlin um thei ni maw? A nu in, a ca cu a phawkngil hei in, Kei in nohte cu phawkngil thei thong tuk mang hi.

¹⁶ Maw! Jerusalem, phawkngil thawthong thei tuk mang hi. Ka khutphalh sungah na min ngan zo ing.

¹⁷ Nangmah a dingto lehtiktu tukte hengpal haw tuk a, a siatsuahtute cu haw tuk hi.

¹⁸ Na elkim a thil a piangte zo hemin! Na mite hung li haw hi. Hung kikleh li haw laih hi. A nungmi Topa keimah in tiam ing: Mo in, a mo vante uangzet a silh bangin, na mite hi na ca in, suan takmi hi haw tuk hi.

¹⁹ Na ngam cu buakvawkmi bang cangin khing diudeu hi. Mahnaven a umtu tei ca in neu leita tuk laih hi. Buakcopmi in, a cangtiktute cu a khawlapi ah koih hi haw tuk hi.

²⁰ Saltannak ngam pen a suahmi na mihing ten “Hi ngam hi neu leita, ngam zal deuh deih hung hi,” tin ni kha khat ten ti haw tuk laih hi.

²¹ Na lungmuno in, “Akua in kaw hi bang canote a hinsak? Ka cate tale thi haw si; micingnu hi zo ing, thawng khiakmi le hawlvawkmi ing. Akua in kaw hi canote hi a cinkhawi sak? Keimah bek zam thongmi hi sing. Ilai pen heng hi cate hi a hun haw? tin tituk ci.”

²² Topa Pathian in, a mihing tei nelah, “Ka khut zak tung a, miphun tei nelah melciknak langtik tung hi. na cate uh cu innah hunpih haw tuk hi.

²³ Kumpipate cu nangmu ca in pa bang hi haw tuk a, Kumpinute cu nangmuh a cingkemtu na nu uh bang hi haw tuk hi. Nangmu mai ah a lu kunin upat haw tuk hi. Na mai uhah upatnak pia haw tuk hi. Keimah cu Topa ka hihlam thei tuk uh ci. Keima bopnak a ngaktute cu a lungbing haw tukma,” ti hi.

²⁴ Ngalkap tei laksa mi na cu longleh kik thei ni uh cim? Hehpihnak nei ngawltu i matsami thawngtate cu pan suahleh thei ni uh cim?

²⁵ Topa in, “Cang thei tukma na tih uhmi cangthei tuk hi; Ngalkap ngilzet i khut sung a, ngal na mat mite cu, patsuah hi haw tuk a, hehpihnak nei ngawltu i laksa mi nate vang lonsakleh hi tuk hi. Nangmuh a dotu hempoh cu do tung a, na ca uhte pan suak tung.

²⁶ A bawlsiatute cu amuh le muh thatduntik tung a, mithah nuamnak le thinuknakin ngui haw tuk hi. Nangmuh a huptu le a suakcatiktu cu Topa keimah ka hihlam miphun hempoh ten thei haw tuk hi. Israel i Pathian ngilzet ka hihlam thei haw tuk,” ti hi.