ISAIAH 48 - Ngawm Bible

Pathian Cu Mailam Ca Topa Hi

¹ Maw Israel mite aw, hu ngai hem un! Judah casuante aw, phano in ngai un! Topa i min salin thutiam ci, Israel Pathian bia ing ti ci. Mahnaven na otmi cu na kam bek hei. Na lungmu sungah imah umma hi.

² Mah i humah ultung zetin, “Kei cu khua thiangtho sung ummi ing; Israel Pathian muang ing hi; Ama min cu Cungnungbel Topa hi,” ti ci.

³ Topa in Israel lakah, tanglaih cawngin thil a piang tukmi hilh ham zo ing hi, mahten thakhatin kimtik ing.

⁴ Na lungmu cu thik le daal bangin khohzet tuk tihvang thei ham zo ing.

⁵ “Ka pathian tei piantikmi le ka milim tei hilh hamsa mi hi” na tih theihngawlnak tukin a cang laih ngawlin hilh hamsa zo ing. Ni dang laih cawngin hilhhamsa zo toh ing.

⁶ Ka hilhsa hempoh kim khawng zo haw, ka hilhmi cu thudik hi, tin na pom kul. Atu-in, a heng tukmi thil thak hilh tung. Ni dangin ka phuan awng ngawlmi thu hi.

⁷ Atu bekin cangtik tung hi. Hitih bang hi cu ni dang laih cawngin a cang awng ngawlmi thu hi. A heng awng zo tohmi ahi tale ka theihsa poh tituk ci.

⁸ Na hinsuk pepan mi dodaltu hi ci, Muantak viangma ci tih cu ka theihsa hi. Mah hangin hi, hi thu na theih awng ngawlnak le awn kam khatno hei na beng sung a hen awng ngawlnak hi.

⁹ “Miten ka min a thangphatnak haw tukin, ka thinuknak cu sup ing. Ka thin nemtik lehin siatsuah tuk mang hi.

¹⁰ Ngun cu pum mei ah a thiantik haw bangin, thuaknak mei sungah khingkhai ing hi, Mahnaven man nei ngawl na hihnak cu cangcian zetin thei ing.

¹¹ Mah hangin thil ka bawlmi hi ka min ca bekin bawl ing; Ka min cu thangsia in umtik thei mang hi. Sunloihnak vang keimata bek hi in, kuamah in co haw tukma,” ti hi.

Topa i Tenmi Sairas

¹² Topa in Israel lakah, maw Israel ka sam ten ngai hem un; Keimah cu Pathian ing. Masabel le dawltabel vang hi ing. Keimah bek hi Pathian ing.

¹³ Leipi pianpatnak cu ka khut tuah ka bawlmi hi; Van khi ka khut tuah ka zalhmi haw hi. Lei le van ka sam ten, thakhatin ka mai ah hung haw tuk hi.

¹⁴ “Na venghawng un khawmdun unna, ngai hem un. Ka tenmi ten Babilon do tuk hi, tin itih bang pathian ten phuang ham thei haw ma hi. Ka dehtik nuammi cu dek tuk hi.

¹⁵ A lakah a awntu le a samtu cu keimah ing. Pui tul ing a, lawhtinnak pia ing.

¹⁶ Nek unna, ka hilhmi thu hi ngai hem un! A pattungin nangmuh tei nelah, imah im ngawlin hilh ing. Ka hilhmi thu cu kim leleng,” ti hi. (Atu-in Cungnungbel Topa in huham pia in hah hi.)

Topa In A Mitei Ca Tuptahnak

¹⁷ Israel i Pathian thiangtho, nangmuh a pantu Topa in, “Keimah cu Topa na Pathian uh ing. Na phatnak tukin a zilhtu le na hawhnak tuk uh lampi ah a puitu ing.

¹⁸ Ka thupiakmi ngai le uh ci pha taven! na hum uhah muicu thupha cu ituk mahten kang awng ngawlmi luitui bangin luang tuk naven maw! Nangmuh tei nelah nehnak cu tuipi thuanthum mawkah tuicawk cu atu le tu a hen lelem bangin heng tuk naven!

¹⁹ Na casuan uhte cu tuipi mawk a philnel zah haw tuk a, leihumah a pai thongmi hi tukma nave uhcin,” ti hi.

²⁰ Babilon pen tul un hi! Luat zo uh ci hawh un! Mah thu cu lungdamin aupih un! Khua hempoh ah than unna, “Topa in, a sila Israel pan zo toh hi!” tin au het un hi.

²¹ Topa in, a mihingte cu a ko le a sazet mi philnel lak pen a pui ten, dangdumnak imah thuak haw tukma. A mu ca suangpi sung pen tui puttik hi. Suangpi cu kehtikin, luang tul haw hok hi.

²² Mah hangin “Misual tei ca in himnak umma,” Topa in ti hi.