ISAIAH 47 - Ngawm Bible

Babilon Humah Thukhennak

¹ Topa in, “Maw Babilon, na kumpi khunnak pen tolh inna, leivul lakah khungin hi. Na hauh laihin khanglai bang ci; kuamah i neh ngawl khuapi! Mahnaven atu-in khanglai dawn le khanglai tisa nem hi lehma toh ci. Sal hi thong toh ci.

² Cangngawinak suang ngengpi hel inna, cang cu ngawi in! Na mai khuhnak puan pano cu lip toh inna, na van mawizet cu duk tohin hi. Tui tan tukin na niik hemto in hi.

³ Nepsukmi le zakca in, pumpi thacang tuah a ummi salnu bang hi ci. Miten mu haw tuk toh. Na humah phu la tung a, kuamah in kham thei haw tukma,” ti hi.

⁴ Israel i Pathian thiangtho in luattik zo hi. Ama min cu Cungnungbel Topa hi!

⁵ Topa in Babilon nelah, daino in khuathim sungah khungden pohin! Mi hempoh ten, “Ngam hempoh tei bawinu,” ti leh haw tukma toh hi.

⁶ Ka mihing tei humah ka thinuk ing; ka mihing ngawl bangin bawl ing. Na ngilnak le na huham sungah khia ing. A hum hawah hehpihnak dem hei nei ma ci; Pitek le putekte hei siatsuah ci.

⁷ Bawinu hi leleng tung, tin ngaisungin, thudang imah ngaisung ma ci. Itin tawpleh tuk hum, tih hei ngaisung ma ci.

⁸ Komzetno in ngai hemin; nang nopnak bek a hazawltu, kho ing, him ing tin, a ngaisung duntu, phano ngaisung hemin; Pathian bang thawmngeng tukin ngaisungdun ci. Kuamah i bat tuk ngawlin ngaisungdun ci. Meivong cang awng tuk mang; ka cate hei in zam awng haw tukma ti ci.

⁹ Mahnaven mitphelep lankal ni, ni khat sungin, hi thil pa nih cu na humah heng tuk hi. Itih zahta kungkhai in, pathian dang na bia li hei in; na ca ten zamsan leng haw tuk a, meivongin cang leng tuk ci.

¹⁰ Na siatvatnak sung pen ultung zetin um ci. ‘Kuamah in mu haw ma poh,’ ti ci. Na cihnak le na theihnakin lampialtik hi; Nangmah le nangmah cu ‘Pathian ing hi, Keimah bang mihing kuamah um haw ma,’ ti ci.

¹¹ Thih le haksatnak na humah heng tuk; Na mitzial thiamte le na khutlam zothiam ten, kham thei haw tukma. Ngaihsut khak ngawlpi in, na humah siatsuahnak heng tuk; Na mang hei in, na mat awng ngawlmi siatnak heng tuk hi.

¹² Na mitzial le na mitzial thiamnakte hah suah pahsun; Na neulaih pepan na manmi haw hi. Nangmah bawmleh hei hi kha thei haw! Na ngal ten a lau haw hei hi kha thei hi.

¹³ Iti bang zahin ngaihsutnak a pia li haw hei in, thil tihtheihnak imah nei lehma toh ci. Na thusiam pihmi ten nangmah pan haw hen. Aksi tei thu a cungtu le vanah lampi a theitute ha khat nung ha khat, i thu piang tuk him tih na humah a son theitute pantikin hi.

¹⁴ “Amuhte cu cangsi bang thong haw hi. Mei tuah haal khawng thong hi haw tuk hi. Amuh le muh vang pandun thei haw tukma. Mei alh cu amu ca sazet tuk hi. A lum awi thong tuk kha ma hi.

¹⁵ Na khan sung hempoh ah na thusiam pihmi, Aksi zothiam tei thu in, hitih bangin bawl haw tuk; Nangmuh zamsan khawngin, amu nuamnak lam tekah zui haw tuk hi. A pantu tukin pa khatno hei tang haw tukma hi.”