ISAIAH 46 - Ngawm Bible

¹ Babilon a milimte cu bo zo haw! Tanglaihin Bel le Nebo cu a biak haw mi hi; mahnaven atu cu laakhumah suanin, ngan cawltiktu vanngit pi in cang zo hi.

² Mahti bangin a milim hawte cu tham khawng haw hi. Milimte cu amuh le muh pandun thei haw ma. Manin pinpih hawta hi.

³ Maw Jakob casuante, ngai hem un; Ka mihing lak pen a tang calamte, na hinsuk bek uhten ka cannkhawimi hi uh ci.

⁴ Na Pathian uh ka hih hangin cingkhawi leleng tung. Na puakpakin, na tekkun tian cangcawi tung hi. Ka bawl bangin, cingkhawi leleng tung hi. Bopnak pia tung a, nangmuh hup tung.

⁵ “Akua tuah kaw na tehkip tuk uh?” Keimah bangtu um haw a maw?

⁶ Miten a sumbawm hongin, a sui bung haw, A ngun cu a cuai in teh haw hi. Sui sektute sapin, milim bawltik haw; Mah milim mai ah kunin bia haw!

⁷ A ko hawah khaihin, pua haw; Mun pa khatah koihin mahlai ah ding leleng hi. A umnak pen mundangah thawn thei ma. A lakah thu a nget haw ten don thei ma hi. Haksatnak sung hei pen hup thei ma hi.

⁸ Maw misualte phano in ngai hem un! Ka thil bawlsa mi hi ngaisung pha hem un!

⁹ Thil a piangsa mite phawkleh hem un; Keimah bek Pathian ka hihlam thei un; Keimah bang kuamah um haw ma.

¹⁰ A pattungin i piang tuk hum tih hilh ham zo ing; Tanglaih pepan a cang tukte hilh ham khawng zo ing. Ka tuptahmi cu pelh awng tukma, ti ing. Bawl ka tummi hempoh cu bawl tung hi.

¹¹ Nisuahnak lam pen mi pa khat sam li laih ing; Muno bangin leng tuk a, Ka khua khan sa hempoh cu bawlsuak khawngin, ka hilhsa bangin deh suak hi tuk hi.

¹² “Ngai hem un, noh mi lungliante, nehnak cu khawlazet laih tin, a ngaisungtute,

¹³ nehnak ni cu cawi ing a, heng awndiak toh; Khawlalehma toh hi. Ka mi nehnak cu kuamah in cumtik thei haw tukma. Jerusalem cu pan tung a, Israel tei nelah minthannak pia tung,” ti hi.