ISAIAH 45 - Ngawm Bible

Topa In Sairas Nadeh Pia

¹ Sairas cu Topa i tenmi kumpipa hi! Topa in ngam tampi neh tukin dehvo pia hi. Kumpi tampi tei huham sut tukin hah hi. Topa in ama ca in khuapi kongka tampi hon sak tuk hi. Topa in Sairas lakah,

² “Keimah loli in, na hawhnak lampi sial tung. Mualsang le mualniamte zalh lawn tung. Daal tuah bawlmi kongbiangte ek tuah tung a, thikkong kalhnakte cu talhtawng khawng tung.

³ A thimnak le a selnak mun a, sum le paite pia tung hi. Keimah hi Topa ka hihnak thei in, Israel Pathian in teng hi tih thei tuk ci.

⁴ Ka sila Israel bawmtu tukin dehvo pia ing. Ka tenmi mihingte bawmtu tukin, Keimah cu thei ma navecin Upatnak ngengpi pia ing.

⁵ “Keimah cu Topa ing hi, Pathian dang kuamah um haw ma hi. Nang in, keimah thei ma navecin, na kulmi zaangtha pia tung hi.

⁶ Langlam vanmawk pen langlam vanmawk tian, mi hempoh ten keimah hi Topa ka hihnak le Pathian dang imah lai ah umma tih, a theih khawngnak haw tukin hi tih bangin bawl ing.

⁷ Vaknak le thimnak bawltu ing. Thupha le thihnak poimawh piangtiktu hei hi ing. Hi hempoh a bawltu cu Topa keimah ing.

⁸ Nehnak cu van pen nguah bangin zutik tung. Lei in mahmi cu pomin, diknak le luatnak tuah kuhkuumin pak tuk hi. Topa keimah in mahtih bangin cangtik tung hi.”

Semsuahtu le Leihum Tangthu Uktu Topa

⁹ Beel dang bangleng ahi mi leibeel pa khatin, Beel bawlpa cu a thu el ngam ni maw? Tungmanin beel bawltu khi, “Ibawl li nge cim?” ti awng a maw? Beel in beel bawltu khi khutletmi nei ma ci tin sawi ngam awng maw?

¹⁰ Kua bekin a nu le pa lakah, “ita hitih bangin na bawl uh?” ti ngam awng maw?

¹¹ Israel Pathian thiangtho, mailam a thil um tukdan a semtiktu Topa in, “Keima cano tei thu le la ah sonsiatnak thunei ma ci; ka khut bawlnak hei ah thupia thei tukma ci.

¹² Leihum buppi a bawltu cu keimah ing. A humah um tukin mihing piangtik ing. Ka ngilnak tuah van khi zalh ing, ni, hade le aksite uk ing.

¹³ Sairas a sosuahtu cu keimah ing. A pha ngawlmi lem tukin le ka tuptahmi dek suaktu tukin, A hawhnak lampi cu camtik tung. Ka khuapi Jerusalem cu dingto lehtik tuk hi. Sal tangmi ka mite luattik tuk hi. Hi tih bang bawl tukin kuamah in, thaman pia ngawlin nawhthuh vang pia haw ma,” ti hi. Cungnungbel Topa in hilh zo hi.

¹⁴ Topa in Israel nelah, Izipt le Ethiopia hauhnak cu nata hi tuk hi. Seba mi dingsaute cu na sal hi haw tuk a, thik taicin tuah zui haw tuk hi. Na mai ah a lu kun haw tuk a, ‘Pathian in nangmah umpih hi. Amah bek cu Pathian hi.

¹⁵ Israel i Pathian, a mihingte a pantu cu a seldunmi Pathian hi,” tin phuang haw tuk hi.

¹⁶ Milim a bawltu hempoh zakcazet haw tuk hi. A venghawng haw in mualphozet haw tuk hi.

¹⁷ Mahnaven Israel cu Pathian in hup zo hi, A mi nehnak cu kumkhua phat hi. A mihingte cu mualpho awng haw tukma hi.

¹⁸ Topa in vante bawl hi. Amah cu Pathian hi. Amah in leipi piangtikin, a bawltu vang hi. Ngeizet phatin le khoh zetin bawl hi. A lawngpi in bawl ngawlin, mihing umnak tuk takin bawl hi. Amah in, “Keimah cu Topa ing hi; Pathian dang imah lai ah umma hi.’ ”

¹⁹ A kuhno in hilh mang, ka tuptahmi vang muhtheih ngawlnakah sel mang hi. Israel mi nelah a lawngpi munah keimah zei un ti awng mang hi. Keimah cu Topa ing. Thutak hilhin, Thuman phuang ing.

Leihum Topa le Babilon Milimte

²⁰ Topa in, hung hem un, leihum miphunte, ngam uknak a bo khawng ceng ten a tang calam hempoh, munkhatah hung hem un. Nangmuh thukhennak tuk munah hung ten hem un. Thing tuah bawlmi milim a vahpih litu, amuh pan thei ngawltu khawhuai lakah thungentute, hi ten theihnak imah nei haw ma hi.

²¹ Na thu uh khentute cu pa khat le pa khat thuvaikum haw tahen. Thuneitute cu pa khat le pa khat thuvaikum haw tahen! Tanglaih cawngin hi thilte cang tuk laih hi, tin, a sontu cu akua kaw? A mihingte a pantu Pathian, Topa keimah hi ma ing maw? Pathian dang kuamah umma hi.

²² Leihum mihing hempoh, Keima lamah hekkik unna, nunpatnak ngah tuk uh ci. Keimah bek Pathian um ing.

²³ Ka hilhmi thuman a hih hangin, thekdun awng tukma hi. Ka min salin thutiam ing. Mi hempoh hung haw tuk a, ka mai ah khukdinin, thutiamdun haw tuk hi.

²⁴ Keima nel bekah, nehnak le ngilnak um, tih phuang tek haw tuk hi. Mahnaven keimah a huatu cu zahcaknak tawk haw tuk hi.

²⁵ Topa keimah in, Jakob casuante cu pan tung a, thangphatnak pia haw tuk hi.