ISAIAH 44 - Ngawm Bible

Topa Bek Pathian Hi

¹ Topa in, maw Israel ka salpa, Ka tenmi Jakob casuante, Ngai hem un!

² Keimah cu nangmuh a semsuahtu Topa ing. Na nunnak a piang bek ten bawm zo toh ing. Imah lau pahsun, ka nadektu ka sila ci. Ka tenmi, ka ihmi ci.

³ Adangdum mi ngamah tui pia tung; ngamkonakah tui luangtik tung; Na ca tei humah ka hawvang buak tung a; Na casuan tei lakah muicu pia tung hi.

⁴ Phano in tui a ngahmi hampa bangin khang haw tuk, Tuimawk paaknem kung bangin hing dimdem tuk hi.

⁵ “Kei hei hi Topa i mi bok ing tin ‘Pa khat nung pa khatin ti haw tuk hi.’ Israel mite khawmdun pepel haw tuk hi. A baan hum hawah Topa i min ngan tek haw tuk a, Pathian i mihingin sialdun haw tuk hi.”

⁶ Israel uktu le a huptu Topa Cungnungbel Topa in, “Keimah cu masabel le nungdawlbel ing hi; Keimah sialngawl Pathian dang umma.

⁷ Ka bawlmi a bawl thei boktu kuabek um haw a maw? Hun a patnak pen a tawpnak tian, thil a piang tukmi a hilhham theitu um haw a maw?

⁸ Ka mihingte, imah lau pahsuh un; Tanglaih pen atu khan tian a piang tukmi hempoh a laih ngawlin hilh ham zo ing; Mah thu na zak uh hangin keima thu theihpihtu uh ci. Pathian dang kuabek um haw maw? A ngilmi Pathian, ka theih awng ngawlmi um haw a maw?” tin ti hi.

Milim Biak Simsial Ngawlnak

⁹ Milim a bawltu mihingte cu imah haw ma; a sunsakzet haw mi le a uangzet haw mi a khuazingte cu nemcuam ngawl ngeh haw hi. Hi pathian a biatu le a upattu cu misil le mitcawte hi haw a, zahcaknak tawk haw tuk hi.

¹⁰ Biak tukin thik tuah bawlmi milim cu nemcuamnak imah umma hi.

¹¹ Mah pathian a biatu hempoh cu zakcaleh haw tuk hi. Milim a bawltute cu mihing thong haw poh, imah haw ma hi. Hungin hi, thukhennak tuk munah ding teh haw hen. Lau in zahcak tawk haw tuk hi.

¹² Pumsu pa in thik tan khat la in, meiling sungah dual hi. A ngilmi a baan tuah sobul la in, pian nei tian sek hi. Mahtin a deh hangin a ngilkial, dangdumin cawlzet hi.

¹³ Lettama pa khatin thing cu khau kai in, a tehnak tuah teh hi. Miphiu tuah zuk pungsan suai in; zibaw tuah nawtin, a hiamnam tuah dek hi. Inn sungah koih tukin mihing pian bangin mawi zetin bawl hi.

¹⁴ Mahmi bawlnak tukin sidar maw, sasua kung maw, cakthing maw tupi pen phukin mang hi. Mahma tale sidar thing phutin nguah in khangtik tukin ngak hi.

¹⁵ Mihingin thingkung khenkhat cu tuahthing tukin mangin, a khenkhat cu milim bawlnakin mang hi. Thing a khenkhatte cu mei ah tuah khualumnak tuk awi in, canghote emin adang khenkhatte tuah milim bawlin bia hi.

¹⁶ Thing khenkhat cu meilamin cikte em le ei in, tai mahtak hi. Mei awi lehleu in, “Lumzet nop em si! ka mei phat dan!” ti hi.

¹⁷ Thing a khenkhat tuah milim bawlin, a mai ah kunin bia hi. A lakah, “Nangmah hi ka pathian hi ci, kei pan zalin hi,” tin thungen lalaih hi.

¹⁸ Mahtibang mihingte cu sil leita haw; i heng ka bawl tih hei thei haw ma. Thutak le thuman lamah a mit haw singin, a lungmu haw bing bikbek.

¹⁹ Milim bawltu in, “Thing khenkhat cu mei ah haal khawng ing. Meiling humah cangho emin ei ing. Adang thing cu milimah bawl ing. Mahmi thingta khat i mai ah atu hi a kun li ing nge! tih ngaihsutnak neuno hei nei kha haw ma hi.”

²⁰ Vut eitute bangin nemcuamnak hei nei ngawl phukthong haw hi. A lungmu silin lampialin, bop theih tukmi hileh haw ma toh. A khut tuah a cawimi milim cu pathian kha ma na hi pah, tih hei theileh haw ma toh hi.

Topa Cu Semsuahtu le Pantu

²¹ Topa in, “Maw Israel, hi thute hi cinglengin, ka nadektu na hihnak hi phawklengin hi. Ka nadektu tukin piangtik ing a, Ituk mahten phawkngil thong tuk mang.

²² Na sualnak cu meingo a tai bangin taitik zo ing. Ka lakah hung lehin hi; A pantu cu keimah ing,” ti hi.

²³ Maw vante, lungdamin au un! Lei thukpite aw, au ten un! Mual le tupi sung a, thing hempoh hei in, lungdam thatui in au ten un! Topa in, a thawm ngengnak langtikin, a mi Israel pan zo toh hi.

²⁴ Topa in, “Keimah cu Topa ing hi, a semsuahtu le pantu ing. Keimah cu Topa ing hi; na hempoh semsuahtu ing. Van khi keimah bekin zalh ing. Lei ka bawl ten a kuamah in bawm haw ma.

²⁵ Khutlam zothiam cu misilah bawl ing. Aksi zothiam tei awnkam cu zolthu ah cangtik ing. Micip tei ot cu khabak don ing. A cihnak haw cu silhah a hihlam langtik khawng ing.

²⁶ Mahnaven ka sila in, a cang tukmi thil cu hilh ham ing. Ka tuptahmi phuang tukin palai ka hah ten, mah a phuanmi le ka tuptahmi cu kimtik loli ing. Jerusalem lakah “Mihing umleh haw tuk hi,” tin ti ing. Judah khuapi lakah, “A thakin sakleh hi tuk uh ci,” tin ti ing. Hi khuapi cu buak seh khawm sung pen dinleh haw tuk hi.

²⁷ Thu pia ing a, tuipi thuanthum kangkotik ing.

²⁸ Sairas lakah, ‘Nangmah cu keimah ai-in uktu tuk ci. Dehtik ka nuammi cu dek tuk ci; Jerusalem cu sakleh tukin thupia ing, Biakinn cu taw panleh tukin thupia tuk ci ti ing! tin hilh hi.’ ”