ISAIAH 43 - Ngawm Bible

Pathian In A Mite Pan

¹ Maw Israel, nangmah a bawltu Topa in “Imah lau pahsun. Keima in nunpan tung. Na minin sam zo ing, kata ci.

² A thukmi tui sung na hawh hei in na lakah um tung. Na tawhmi haksatnak ten neh haw tukma. Mei sungah na hawh hei in kang tukma ci. Bawlsiatnak nasezet na tawk hei in neh haw tukma hi.

³ Itahim titale keimah cu Topa na Pathian ing. A pantu Israel i Pathian thiangtho ing. Nangmah luattik nuamin Izipt lawl saw tung. Ethiopia le Seba vang nunghek tung hi.

⁴ Na nunnak pan nuamin miphun tampi lawl saw tung hi. Itahim titale nang cu keima ca in sunglawi ci. Nangmah itzet ing a, upatnak pia ing.

⁵ Imah lau pahsun. Na lakah um ing. Lam khawlapi nisuahnak le nitumnak pen, na mihingte pui tung.

⁶ Amuhte hah tukin saklam cu hilh tung a, amuh man tuk ngawltohin hanglam cu hilh tung hi. Ngam khawlapi pen ka mihingte kikleh haw hen; Leihum khua hempoh pen pinkik haw hen.

⁷ Keima mihingte hi haw in, sunloihnak piatu tukin ka semsuahmi haw,” ti hi.

Israel Cu Topa Thu Theihpihtu Haw

⁸ Pathian in, ka mite cu thukhennak zungah sam un; Mit nei haw naven a mitcaw haw hi. Beng nei haw naven bengbul haw hi.

⁹ Miphun dangte cu thukhennak munah sam un; a pathian haw lak pen mailam thu hilh theitu um haw maw? Atu a piangmi thute hi akua kaw a hilh ham awng? Hi pathian ten ka hilh uhmi cu mangin, ka thu uh cu thudik hi tih langtiknakin thu theihpihtu suahpih haw hen!

¹⁰ “Maw Israel mite, nangmuh hi ka thu theihpihtute uh ci.” Keima nadektu phunin ka ten uhmi ci. Keimah thei in um tuk uh ci; Keimah bek Pathian ka hih cu thei tuk uh ci. Keimah sialngawl Pathian dang umma hi; A um hei um awng haw tukma,

¹¹ “Keimah pa khat bek hi Topa ing. A pan thei tuk cu keimah bek ing.

¹² A piang tukmi hilh ham zo ing a, nangmah bawm tukin hung ing. Mahti bangin a bawltu ngamdang pathian um haw ma, Nangmuhte hi ka thu theihpihtute uh ci.

¹³ Keimah cu Pathian hi ing a, kumkhua in hi leleng tung. Ka huham sung pen kuamah luat haw tukma. Ka bawlmi cu kuamah in thek thei haw tukma hi.”

Babilon Pen Luatnak

¹⁴ Israel i Pathian thiangtho, nangmuh pantu Topa in, “Nangmuh luattik tukin Babilon ah ngalkapte hah tung; A khuapi kongkate siatsuah khawng tung. A mitei awn aunak cu kahnakin cang tuk hi.

¹⁵ Keimah hi Topa na Pathian thiangtho ing. Maw Israel nangmah semsuahtu ing a, Keimah hi na kumpipa ing,” ti hi.

¹⁶ Ni dang laihin Topa in, Tuipi thuanthum sungah lampi bawl. Tuipei lakah lampi umtik hi.

¹⁷ A ngilzet le a maksanmi ngalkapbu cu pha thongtik khawng hi. Cipuhleng le a hum khung ngalkapbute lumin, tholeh haw ma. Mei a muhmit uh bangin mit hawta hi.

¹⁸ Mahnaven Topa in, “Nunglam thu bebek ngaisung pahsuh un; Tanglaih thute bek ngaisung pahsuh un;

¹⁹ Thil thak ka bawl tukmi komno in cuan un. Atu hei um li haw toh mu thei tuk uh ci. Ngamkhing lakah lampi bawl tung, Mahlai ah nangmu ca tui luangtik tung.

²⁰ Ngamsung ngamsate hei in upat haw tuk hi. Cingne le sam ak ten thangphat haw tuk, Ka tenmi ka mitei ca in, phillawnah luite ka luantik ten.

²¹ Keima ca in ka bawlmi ka miphun haw hi; Keimah thangphatnak la in sa haw tuk,” ti hi.

Israel Sualnak

²² Topa in, “Maw Israel na biak uhmi cu kei kha ma sing; Kei cu ciat leita zo si uh si!

²³ Meihal biakpiaknak tukin ka lakah tuu hei hawhpih ma uh ci. Na zehsah biakpiaknak uh tuah na pahcoih uhmi cu kei kha mang hi. Thilpiak tuk ngenin, na bawm uh ngittik mang hi. Namtui ngenin, cim le khamin nangmuh bawl mang.

²⁴ Kei ca in namtui lei ma uh ci; Na nganhing tei thau in taitik ma uh ci. Na sualnak uhin ka bawm ngittik uh ci; Thilpha ngawl na bawlmi uhin ka lungmu cawltik uh ci.

²⁵ Mahnaven na sualnak uh ngaidamtu Pathian cu keimah leleng ing. Keimah ka hih hangin hi bangin bawl ing. Na sualnak uh cu cing leleng tukma toh ing.

²⁶ Thukhennak zungah hawh him po nung, Mi mawhsiatnak na neih uhmi cawi hem un; Na diknak uh langtik tukin hilh hem un;

²⁷ Na pu le pa uhte cu sual haw hi. Na puitu uhte vang ka humah sual zo haw hi.

²⁸ Na ngamuktu ten ka mun thiangtho cu nawngkaitik haw hi; Mah hangin Israel humah siatsuahnak hengtik ing; Midang tei zotsak tukin, ka mihingte a bawltu cu keimah ing,” ti hi.