ISAIAH 42 - Ngawm Bible

Topa i Sila

¹ Topa in, “Ka sila cu hilai ah um hi. Amah cu ka ngiltikmi le ka tenmi hi. A humah ka lungdam ing. Ka hawvang tuah dimtik zo ing hi, Miphun hempoh lakah thudik hengtik tuk hi.

² Au tukma, a aw vang sang tukma; Lampi hei ah nging zetin thuson tukma hi.

³ A awnin, a ek awndiak tohmi phaikung ektuah tukma hi. A mit kuanno mei inn vang cu mittik tukma hi. Mi hempoh tei lakah kumkhua in thudik hengtik tuk hi.

⁴ A thakiam hihim ngawlin a thin hei nau tukma hi. Leihumah thudik lengtik tuk hi. Ngam khawlapi a ngam ten a thuhilhmi cu ngakhelzet haw tuk,” ti hi.

⁵ Pathian in vante piangtikin, semsuahin phalh hi. Leihum le nunnak nei thil hempoh bawlin, Mihing lakah nunnak le haihawh pia.

⁶ Topa keimah in sam ing a, huham pia ing. Leihumah thuman a len theihnak tukin hi. Nangma sung pen mi hempoh tuah thutiamnak bawl tung. Nangma sung pen miphun tampi lakah khuavaknak hengtik tung.

⁷ Mitcaw tei mit cu vaktik tuk ci a, thim lak thawnginn sungah a khungtute cu luattik tuk ci.

⁸ “Keimah bek cu Topa na Pathian ing. Ka huham cu pathian dangte kawm tuk mang. Ka sunloihnak vang milimte hoih tuk mang.

⁹ Heng tuk hi tin, ka hilhsa mi cu heng ngangai zo hi. Atu-in thil thak hilh tung. A hen laih ngawlin hilh ham tung,” ti hi.

Thangphatnak La

¹⁰ Topa lakah la thak sa un. Leihum hempohin amah thangphatnak la sa un. Tuipi thuanthum humah a hawhte amah cu thangphat un. Tuipi thuanthum sung umte hei in thangphat un. Ngam khawlapi ah a um ten thangphat ten un.

¹¹ Phillawn le a khua mite hei in Pathian pahcawi haw hen. Kedar mite hei in pahcawi haw hen! Sela khua a umte mualsang hum pen lungdamin au leilui haw hen.

¹² Lam khawlapi a ummi ten, Topa i lakah thangphatnak le Sunloihnak pia haw hen!

¹³ Topa cu mi ngilbel bangin hawh hi. Ngaldo tukin tuangtimin ngakhelzet hi. Ngaldo tukin au in, neh tukin au leilui hi. A ngal tei lakah a huham lak hi.

Topa In A Mite Bawm Tuk

¹⁴ Pathian in, hun ngeipi sung mengdenin um zo toh ing, ka mite donleh ma sing. Atu pan tuk toh ing; Nau nei tuk numei bangin tau in au li ing.

¹⁵ Mual le mualhumte cu siatsuah tung; Hampa le thingkungte kotik tung. Lui le hawkluamte phillawnin bawl tung a, Tuinakte kangtik khawng tung hi.

¹⁶ “Ka mihing mitcawte pui tung; A hawh awng ngawlnak haw lampi pen a khuathim haw cu, khuavakin thek tung; A mai haw a ngam bingbote cu momtik tung. Hite hi bawl loli tung hi.

¹⁷ Milim a muang mite le Mah milimte ka pathian a titute cu zakca in mualpho haw tuk,” ti hi.

Israel In Thu A Theih Ngawl Zia

¹⁸ Topa in, “Noh bengbul mite, phano ing ngai un! Noh mitcawte naino in zo hem un!

¹⁹ Ka silate sangin mit a caw saw um haw ni maw? Palai ka hahmite sangin bengbul saw um haw nen ti maw?

²⁰ Maw Israel, na muhmi le na tawhmi hi tamzet zo; Mahnaven na ca in imah nemcuam haw ma hi. Zaknak tukin beng nei ci; mahnaven na zak ciang ngangai mi i um kaw?” ti hi.

²¹ Topa cu mi pan tukin a nuam zetmi Pathian hi. Mah hangin a daan le a thuzilhmi sunloihin, A mihingte hei in upat haw hen tih deih hi.

²² Mahnaven a mihingte cu miten suam haw in, lei kua sungah khumin, thawnginn khawlapi ah sel haw hi. Nate lonsakmi le suammi hi haw hi; Amuhte pan tukin kuamah um haw ma.

²³ Hi thu hi a ngaitu kuabek um uh cim? Tu nung siah phano in ngai tuk toh ma uh cim?

²⁴ Israel cu mi simtu tei khutah a piatu khi akua kaw? Topa amah hi. Dodalin, a humah sualnak a bawl uhmi Topa hi. A deihnak bangin nung thei ma hung; a thupiak bangin zui thei sih ma hung hi.

²⁵ Mah hangin a thinuknak thuaktikin, ngaldo haksatnak tawktik hi. A thinuknak cu mei bangin Israel ngam buppi kang; mahnaven i cang hum tih hei thei awng ma hung. Hi hempoh lak pen a cun ngah uhmi imah um cuang ma hi.