ISAIAH 41 - Ngawm Bible

Pathian In Israel Thutiam

¹ Pathian in, khawlapi a ummi ngamte, Daidenno in um unna, ka sonmi hi ngai hem un! Thukhennak mai ah na thu uh hunpih hem un. Na thu uh sonnak hun ngah tuk uh ci. Hung unna akua kaw, a dik tih ngaisung khawm ten nung.

² Mi hempoh nehin nisuahnak lam pen a puitultu akua kaw? A hawhnak hempoh ah akua in kaw nehnak a pia? Miphun tampi le kumpi tampi humah akua in kaw nehtu a hitik? A nehmite cu leivul bangin a ngalnam tuah satvawk! Cang kungko cu huihin, a muhvawk bangin, A thalcangin khen khektik khawng!

³ A nung haw pen hilin, himdamno in hawh ngut haw! Lei hei tawng kha man ngawl tihthamin manlang hi.

⁴ Hi bangin a ngaisungtu cu akua hum? Leihum tangthu ah cang tukin a tumtu cu akua hum? Topa keimah cu a pattungin um zo toh ing. Topa Pathian keimah cu a tawpnakah hei in um tung hi.

⁵ Lam khawlapi ngam ten, ka thil bawlmi cu mu zo haw hi; Lau mahtakin thinsu in can haw hi. Mah hangin munkhatah tawkdun khawm haw hi.

⁶ Khutzung thiamte cu bawmdunin, pa khat le pa khat thapiadun haw hi.

⁷ Lettama in sui sek thiam lakah, ‘Sui bawl thiamzet ci,’ tin ti. Milim mam zetin, a zuttu in thikpim tuah a kaikhawmtu cu pak hi. Mi pa khatin, “Na belhmi cu pha em,” tin ti a, khim zetin milim cu a koihnak haw munah thikpim khen haw hi.

⁸ Mahnaven nang Israel ka sila, nang cu ka ten zo tohmi hi ci. Ka ngual Abraham i casuante hi uh ci.

⁹ Leihum tawpnak pen pui ing; Vanmawk deng pen sam ing a, ‘Nang cu ka sila ci,’ tin ti ing. Nang lawl mang, a teng saw ing.

¹⁰ Imah lau pahsun, na lakah um ing. Keimah cu na Pathian ing hi, imah in lautik pahsuh hen. Nangmah bawm tung a, ngiltik tung; Hup tung a, pan tung hi.

¹¹ “Na hum a thinuktute cu mualpho in, zahcak tawk haw tuk hi. Nangmah a dotute cu thi haw tuk hi.

¹² Catngawlin nangmah a dotute cu leihum pen phathong khawng ta haw tuk hi.

¹³ Keimah cu Topa na Pathian ing hi; Na tha ngiltik ing a, ‘Imah lau pahsun hi; bawm tung hi.’ ”

¹⁴ Topa in, Israel nang cu miphun neuno le thanem em hi ci. Mahnaven imah lau pahsun, keimah in bawm tung. Israel i Pathian thiangtho keimah cu nangmah pantu pa ing.

¹⁵ Nangmah cu cang vahnak ngolh, a thak, a hiammi ha nei bangin bawl tung hi. Mualsangte cilpek tuk ci a, sia haw tuk; Mualte vang leivulin cang khawng haw tuk hi.

¹⁶ Vanah pikto tuk a, huihin mutvawk tuk; Huihsia in mun tihkimah thehkeh khawng tuk hi. Mahnaven keimah cu na Pathian ka hih tak, nang cu na lungdam tuk: Israel i Pathian thiangtho cu thangphat tuk ci.

¹⁷ “Ka mite lungbingin amthong haw tuk, Dangko in, a dangdum haw ten, Topa keimah in, a thungetnak haw za tung; Israel i Pathian keimah in nunghek hihim tuk mang hi.

¹⁸ Mualkolh lak pen luituite put haw tuk, Munlawn pen ciktui thiangno luang tuk hi. Phillawn cu ciktui in dimtik tung. Ngamko cu ciktui luannakin cangtik tung hi.

¹⁹ Phillawnah sidar thingkung potik tung, Thingha, Lemmui le olif thingte potik tung. Lenkolhah tupi umtik tung a, mah tupi ah cakthing, hual thing le caksan thing po tuk hi.

²⁰ Mahmi cu mi in amuh haw ten, Topa keima bawlmi a hihlam thei haw tuk hi. Israel i Pathian thiangtho in, hi hempoh cu cangtik hi tih thei haw tuk toh,” ti hi.

Topa In Khuazingte Zuam

²¹ Israel kumpi Topa Pathian in; miphun hempoh tei khuazingte, Na thu la uhte cu son himpo teh hem un! Na thiam zah uhin son hem un!

²² Hilai ah hung unna, thil a piang tukmi hilh ham hem un; Thil a piang zo tohmi tei tihnuammi hilhciang hem un! Mailam a, thil a piangmi a um ten a tihnuammi a theih theihnak tukin Itih zawngin kim tuk hum tih hilhciang hem un!

²³ Mailam a heng tukmi thu la hilh hem un; pathian ngangai na hih uh theiciang tuk ung hi. Thilpha pa khat nih bek bawl un, Mahma tale thihnak thu poimawh hengtik hem un. Launak le mulling hahin dimtik hem un.

²⁴ Nangmuh hihen, na thil bawl uhmi hihen, zolthu ngeh uh ci! Nangmuh a biatute tale ningdelhhuai ngeh haw sih hi.

²⁵ “Nisuahnak lam a ummi pa khat teng zo ing; Saklam pen do tukin pui tung. Mi uktute cu cinciak bangin sikpek haw hi. Beel bawltu pa i tungman a sihpek bangin, sum sungah huah niknek hi.

²⁶ Hi thil piang tuk hi, tin, a hilh ham theitu kua beek um uh cim maw? Dik ngai uh ci tih tukin a kua beek um uh ci maw? Mahti bang a awntu kuamah umma si uh si; kam khatno hei awn ma si uh si, Na awn uh a zatu pa khat hei um haw ma si!

²⁷ Keimah Topa cu Zion lakah hi thuthang a phuang masabeltu ing. Jerusalem ah palai hah ing a, ‘Na mihingte hung li haw! Innah pinleh haw tuk hi,’ tin ti ing.

²⁸ Na pathian uhte ka zoh ten pa khat hei in, awn haw ma si. Ka thudotmi a don theitu pa khat hei um haw ma si.

²⁹ Hi khuazingte hi phukthong ngeh haw hi. A bawl theih haw mi imah umma. A milimte hi thanem leita haw. Huham nei ngawl phukthong ngeh haw hi.”