ISAIAH 40 - Ngawm Bible

Muansannak Awnkam

¹ A Pathian uhin, “Ka mite hehnem un, hehnemta un!

² Jerusalem khua mite hanthawn un. Ngeipi thuak zo haw a, a sualnak haw cu atu-in ngaihdam hi zo hi. A sualnak haw hempoh hangin cangkim zetin dantat zo ing,” ti hi.

³ Aw nging pa khatin, “Topa ca tukin, Ngamkhing lakah lampi bawlham un. A Pathian uh ca tukin phillawnah lampi sial un!

⁴ Luam hempoh dip khawng unna, mualsang hempoh cek kaih khawng un. Mualte cu munlawn bangin cang haw tuk a, lei bingbo hempoh camcawino in lem khawng hi tuk hi.

⁵ Topa i sunloihnak cu lang tuk a, mi hempoh ten mu haw tuk hi. Topa amah loli in thutiam zo toh hi.”

⁶ Aw nging pa khatin, “Tangau in!” ti hi. “Ikaw ka aupih tuk?” tin dong ing. “Mihingte cu hampa bang haw a, ngam lak pak sangin ngei kho cuang haw ma hi.

⁷ Topa in, a hum hawah huih a theutik ten, hampa cu thimin pak cu ziam hi. Mihingte cu hampa bangthong haw poh hi.

⁸ Mahzuh hi, hampa cu thimin pak cu ziam haw; mahnaven a Pathian uh i awnkam cu kho leleng,” ti hi.

⁹ Maw Jerusalem, mualsang humah kai inna, Thuthangpha cu aupihin hi. Maw Zion, nging zetin au inna, thuthangpha cu hilhin hi! Phuang tul inna, lau him pahsun. Judah ngam khuapi tei lakah, na Pathian uh hung li zo tin hilhin ti hi.’

¹⁰ Ihempoh tithei Topa cu, a thawm ngengnak huham tuah mi uk tukin hung li zo, a patsuah mite pui tuk hi.

¹¹ Tuucing bangin a tuute cu cingkhawi tuk hi; tuuhonte cu hulawmin, a angsungah cawi tuk, a pi haw cu demhetno in hawhpih tuk hi.

Tehkip Theih Ngawlmi Pathian

¹² Akua kaw tuipi thuanthum khi a khut tuah suumin, van khi a khap tuah a teh thei? Akua kaw leihum a, leivul khi a khuathai sungah thun khawngin, mualsang le mualniamte cuai tuah a khai thei?

¹³ Akua kaw Topa lakah hi bangin bawlin tin a hilh thei? Akua in kaw Topa cu zilhin, ngaihsutnak a pia thei?

¹⁴ Pathian in: na hempoh itih bangin bawl tuk tihmi a theih zawhnak tuk le a thiam theihnak tukin akua thu kuppih kaw?

¹⁵ Topa mai ah miphun cu imah haw ma; tui cak khat hei kim haw ma hi. Ngam khawlapi a, tuikulh cu, leinoi cang khat bangin zangzet haw hi.

¹⁶ Lebanon tupi sung a, ngamsa hempoh cu, a Pathian uh biakpiaknak tukin tham haw ma, thingkung hempoh cu, meihal biakpiaknak tuahthing tukin dem leita hi.

¹⁷ Leihum a, miphun hempoh cu ama ca in imah ma haw hi.

¹⁸ Pathian cu akua tuah tehkip thei kam nung? Akua tuah bang hum tih cu, itin kaw a sonciang theih tuk uh?

¹⁹ Khutzung thiam tei bawlmi, thik seekthiam tei sui tuah huhmi le ngunkuang sungah a koih haw mi milim bang kha ma hi.

²⁰ Sui le ngun a nei zo ngawltu hei in, a muat thei ngawl thingcang teng haw hi. Khutzung thiam pa khat zei in, atu tuk ngawlmi thing milim suitik hi.

²¹ Thei ma uh cim? ngeipi laih cawngin hilh hamsa hi ma uh cim? Itin leipi piang tih cu za zo toh ma uh cim?

²² Lei humlam le vanmawk deng a, ummi a kumpi khunnakah a khungtu pa in bawl hi. A nuai a, mihingte cu, a mitmuhah miksi tia in neu haw hi. Van khi puanzak bangin, umnak tuk puanbuk bangin zak hi.

²³ Amah in, a ngilzet uktu haw cu khiasukin, imah ngawlin bawl khawng hi.

²⁴ A muh cu zung saih laih ngawl, a tawtsem, thingkungno bang haw hi. Topa in huih a theutik ten, ko khawng haw a, cang kungko bangin; mutvawk hi.

²⁵ A thiangtho Pathian cu kua tuah kaw a tehkip theih tuk uh? amah a bangtu kuabek um haw maw?

²⁶ Van khi zoto hem un! Na muh uhmi aksi a bawltu, akua kaw? aksi ngalkap hon bangin a hotu in, izah kaw tih thei in, a min haw tekin sam hi. A thawmngengmi, a huham hangin, pa khatno hei lalthong haw ma hi.

²⁷ Maw Israel, “Topa in, ka haksatnak uh theihsak ma, thuman ngawlpi in ka thuaknak uhte ngaihsak nuam ma,” tin itakaw na phukciak lih uh?

²⁸ Thei ma uh cim? Za awng ma uh cim? Topa cu a kumkhua kho mi Pathian hi in, leihum hempoh bawltu hi. Amah cu cawlin, cimkhamin um awng ma hi; a ngaihsutnak cu kuamah in thei baan haw ma hi.

²⁹ A cim le a cawlmi cak lehtik hi!

³⁰ Khangnote hei cimin cawl haw tuk a, Tangval hei tha bo haw tuk hi.

³¹ Mahnaven Topa a muangtute cu a tha haw cak lehtikin, Muvanlai bangin ha khengin, lengto haw tuk a, a tai haw hei in cawl haw tukma hi; lam a ciah haw hei in cim haw tukma hi.