ISAIAH 39 - Ngawm Bible

Babilon Pen Palai Hung Haw

¹ Mah hunin, Babilon kumpi, Baladan i capa Merodak Baladan in kumpi Hezekiah a tina tih a zak hangin lai pa khat le laksawng pa khat kuat hi.

² Hezekiah in Baladan i palaite cu phano zo in, a hauhnak hempoh lakin zotik khawng hi. A neihmi a sui le a ngunte namtui le zimuite a ngalkap le ngalthuam hempoh vang lak hi. A thil koihnak innsung hihen, a uknak sung hempoh hihen, a neihmi amuh khak haw ngawl pa khatno hei umma.

³ profet Isaiah cu kumpi Hezekiah lakah hawhin, “Hite hi ilai lam pen kaw a hun haw? Na lakah i thute hilh haw kaw,” tin dong hi. Hezekiah in, “Ngam khawlazet, Babilon ngam pen hung haw,” ti hi.

⁴ Isaiah in, “Kumpipa i inn sungah muhmi poh nei haw maw?” tin, a dot ten, Hezekiah in, “Ihempoh mu khawng haw hi. Thil koihnak inn sungah ka zohtik ngawlmi pa khat hei umma,” ti hi.

⁵ Isaiah in, “Cungnungbel Topa in,

⁶ na inn sungah a ummi hempoh tuni tianin, na pu le na pa tei a khawl haw mi na lo le lam cu Babilon ngamah a puak khawng haw hun heng tuk hi. Imah tang tukma toh hi.

⁷ Nangma casuante loli hei Babilon ah pui haw tuk a, Babilon kumpipa i inn nadektu tukin a tilnget haw tuk tin hilh hi.”

⁸ Kumpipa Hezekiah in mah thu a zak ten a nunsungin lemdaihnak le lungmuannak um tuk, tihnak hi tin, a up hangin Hezekiah in, “Topa i lak pen a hengmi thu na hilhmi cu thupha hi,” tin don hi.