ISAIAH 38 - Ngawm Bible

Kumpipa Hezekiah Natnak le Damnak

¹ Mah hunin, kumpipa Hezekiah cu a tina in, thi awndiak hi. Amoz capa profet Isaiah in veh a, “Topa in, a sehelhmi hempoh dek khawngin hilh khawng hen, nung tukma a hih hangin a thi tukin tuangtimin,” ti hi.

² Hezekiah cu panglamah hekin thungen hi.

³ “Topa, ka damsung hempoh nangmah muangin muantakzet na nadek zo toh ing a, deh tuk na deihsakmi bek deksuak tuk ka tup lelengmi cu phawkngil viang pahsun,” tin, a tih ceng ten nase zetin kap hi.

⁴ Topa in, Isaiah lakah,

⁵ “Hezekiah lakah hawh inna, Topa keimah, na pu David i Pathian in, na thungetnak cu thei in, na hitui mu zo ing. Mailam kum sawm le kum nga nung hihtik tung hi.

⁶ Nangmah le hi khuapi cu Assiria kumpi khutsung pen luattik tung a, hi khuapi cu hup leleng tung tin hilhin,” ti hi.

⁷ Isaiah in kumpi cu “Theipi ngah ngawivam inna, na uilut meima ah belhin hi; mahten dam tuk ci,” ti hi.

⁸ Kumpi Hezekiah in, “Biakinn ah hawhleh thei tung tih a langnak tukin limlaknak i um kaw?” tin dong hi.

⁹ Isaiah in, “Topa in, a thutiamnak kimtiknak tukin melciknak pia tuk hi.

¹⁰ Kumpi Ahaz i bawlmi ni tehnak khi sun nungten Topa in, a lim cu nunglamah kal sawm kiklehtik tuk,” ti hi. A tih bangin a lim cu nunglamah kal sawm kikleh hi.

¹¹ A natnak pen Hezekiah a damleh hangin lungdam thangphatnak la ngan hi;

¹² Ka khanphat laih takin Mithi khua hengbel tung tin, Tekkun tian nung tuk ngawlin ngaisung ing.

¹³ Topa tawkleh tukma toh ing, Midang a nungmi kua hei hihen, tin ngaisung ing. Mihing umnak hi ngamah in!

¹⁴ Ka nunnak cu a phiah haw mi buak bangin bota. Thiambu pen ahmi puan bangin, Pathian in ka nunnak botik si maw, tin ti ing.

¹⁵ Zankhua pek nat thuakin kapin tau ing; Kiosa in ka nguh ektuah khawng bangin thuak ing. Pathian in ka nunnak botik na hi si, tin ti ing.

¹⁶ Ka aw tham dedeuh a hih ten zakleh theih ma toh; Khulo bangin tau li thong ing. Van lam ka zohnak ka mit kha khawng; Maw Topa hi bang haksatnak pen kei humin hi.

¹⁷ Ka son theihmi i um tuk hum? Topa i bawlmi ngeh hi saw si! Ka thin na leita in hihbu thei mang.

¹⁸ Maw Topa nangma ca in nung tung, Nangma ca bek nung nuam ing. Damtik inna, nungtik zalin hi.

¹⁹ Ka thinnatnak cu lemdaihnakah cang hen; Ka nunnak cu launak sung pepan ci. Ka sualnak hempoh ngaidam khawng ci.

²⁰ Mithi khua pen kuamah in nang thangphat thei haw tukma; Mithi ten muantak na hihnak cu muang thei haw ma.

²¹ A thangphattu cu mihingte hi; Atu a ka thangphat bang hin hi. Muantak na hihnak cu pa ten a cate hilh haw hi.

²² Maw Topa nangmah in damtik zo ci. Tingtang tum tuk ung a, Nangmah pahcoihnak lasa tuk ung. Ka nun damsung hempoh uhah Nangmah pahcoihnak cu Na biakinn sungah sa leleng tuk ung.