ISAIAH 37 - Ngawm Bible

Kumpipa In Isaiah Thu Siampih

¹ Kumpipa Hezekiah in, hi thute a zak ten thasia in, a puan botkekin le thangkhau puan silhin Topa i Biakinn ah hawh hi.

² Amoz capa Isaiah lakah kumpipa i inncingtu hotu Eliakim, zung cazipi Shebna le thiampi upate hawhtik hi. Amuh hei cu thasia in thangkhau puan silh bok haw hi.

³ Isaiah lakah hilh tukin hi bangin thucah hi: “Tuni cu ohtei ca in thuaknak ni hi. Bawlsiatnak thuak hung a, zahcaknak tawk hung. Numei pa khat naunei awn naven a nu a tha dawm leita hangin a hing thei ngawl bangkek hung hi.

⁴ Assiria ngam kumpipa in, a nungmi Pathian zawnsak tukin a khutnuai bawi pa khat hah hi. Topa na Pathian in hitih bangin a zotsaknak hawza bokta henna, a awntu cu bawlsia zal hen. Mah hangin a mihing uhte a tang calam tei ca in thu na ngetsak zalin,” ti hi.

⁵ Isaiah in kumpi Hezekiah i thucahmi a zak ten

⁶ hi tin thucah kikleh: “Assiria ten Pathian zotsaknak tuah a ot haw mi hangin na thasia viang pahsun, tin Topa in ti hi.

⁷ Topa in Assiria kumpipa cu thu vakvai zatik tuk a, mah thu i hangin ama ngamah kiklehin, a ngam mihing tei khut sung pen thi tuk,” ti hi.

Assiria Ten Sim Tum Lehleu Haw

⁸ Assiria ngalbawipa cu kiklehin, a kumpipa haw cu Lakhish pen hawhin, a el a ummi Libnah khua do hi tih a zak ten kumpipa tawk tukin hawh hi.

⁹ Mah hunin Ethiopia ngam kumpi Tirhakah i ho in, Izipt ngalkapte cu Assiria ngalkap do tukin hung haw, tih thu thang bengbung hi. Mahmi cu Assiria kumpipa in, a zak ten Judah ngam kumpi Hezekiah lakah laikuatin;

¹⁰ “Na muansan mi na Pathian in ka khutsungah heng tuk ngawlin thu hilh naven mah thu in zol pahsuh hen!

¹¹ Assiria kumpipa in ngam pa kha khat humah siatsuah tung tih a khencat nungten iti bangin bawlmek kaw tih cu na zak meksa poh ven. Luat thei tung, tin ngaisung a cim maw?

¹² Ka pu le pa ten Gozan, Haran le Rezef khua siatsuah haw in, Betheden mi Telassar ah a umte that khawng haw hi. A pathian ten pan thei haw ma.

¹³ Ilai lamah kaw Hamath, Arpad, Sefarvaim, Hena le Ivvah khua uktu kumpite a ngelh haw?” tin ngan hi.

¹⁴ Kumpi Hezekiah in mah laikuat cu a kaitaipa i khut sungta cu la in sial hi. Biakinn ah hawhin Topa i mai ah a lai cu koihin

¹⁵ thungen hi,

¹⁶ “Cungnungbel Topa Israel i Pathian aw, na kumpi khunnak humah a khungtu, nangmah bek Pathian hi ci, leihum ngam hempoh ah uktu hi ci. Nangmah in lei le van semsuah ci.

¹⁷ Maw Topa atu-in zo inna ngai zazalin hi. Sennacherib in, a nungmi Pathian na hum a zotsaknak a otmi hempoh hi za khawngin hi.

¹⁸ Maw Topa Assiria kumpi ten mi tampi siatsuahin, ngam la khawng zo haw tih cu za zo toh ung hi.

¹⁹ A khuazingte Pathian kha ngawlmi pathian, thing le suang tuah bawlcawm milimte vang halkang khawng haw tih thei zo ung.

²⁰ Mah a hih hangin, Topa kohtei Pathian, Assiria mitei khutsung pen humhim zal inna, leihum miphun hempoh ten nangmah bek Pathian na hihnak cu thei haw tuk hi,” tin thungen hi.

Kumpipa Lakah Isaiah Thucahmi

²¹ Kumpi Hezekiah thungetnak Topa i donlehnak cu Isaiah in, a zak ten Isaiah in, Hezekiah lakah thuthan tukin palai hah haw hi. Topa in,

²² Sennacherib, Jerusalem khuapi in nuihsanin nuihsuak cekpan bawlnak men thongin bawl hi.

²³ Na zotsakmi le na tam lihmi pa cu akua hum tin ngaisung kam? Israel i Pathian Thiangtho keimah ing hi!

²⁴ Na sila ka lakah hah ci a, “Ka cipuhleng tuah mual sangbel nehin, Lebanon Mualkul vang la ing,” tin tuangkhawng ci. “A sangbel sidar thing lak a sangbel vang phuk thei ing; a phabel cakthing vang phukin, tupi sung a khawlabel mun hei ah heng thei ung,” tin tuangkhawng ci.

²⁵ Miphun dang tei ngam sungah tuikhuk co ing a tui in thei ing; ka ngalkap ten Nail ngunpi cu a ko veu in sik haw tin tuangkhawng li ci.

²⁶ “Hite hi ngeipi lai cawngin ka ngaihsutsa hi tihmi thei ma ci maw? Ka tupsami cu atu-in deksuak ing. Keimah in ngilnak huham ka piaknak hangin kulhtianin upmi khua cu buakvawknakin suaktik khawng ci.

²⁷ Mahlai ah a ummi cu thil tihtheihnak imah nei haw ma hi. Thinsu le vansangin umthong men haw poh hi. Nisuahnak lam pen huihsia a theu mi in, a muhmi lo sung hampa le inn hum a, a po mi hampa bang thong haw hi.

²⁸ “Mahnaven na thu cu a venghawngin thei ing. Na dehmi le na hawhnak vang thei khawng ing. Ka hum a na thinuk vang thei ing.

²⁹ Na thinuknak thu le la vang thei zo toh ing a, na tuangkhawnnak ka theih khawng zo toh tak atu-in, na naalah sio khaih tung; na kamkalh tung a, na hunnak lampi pen kiktik tung,” tin ti hi.

³⁰ Isaiah in kumpipa Hezekiah lakah, a piang tukmi thil melciknak cu hi tin hi tuk hi. Tu kum le mai kum cu amahno a po mi an ei tuk uh ci; mahnaven a kumleh ten cang cing thei tuk uh ci a, an nei tuk uh ci; sabit ngui phut tuk uh ci a, sabit ngah ei tuk uh ci.

³¹ Judah miphun sung pen a tang calam cu khangtozet tuk uh ci; leisung thukpi tian zung khia in, a ngahmi thingkung bang tuk uh ci.

³² Jerusalem le Zion Mualah a tang calam mi demlaihno um haw tuk, itakaw titale Cungnungbel Topa in mahtih bang hi tukin a tuptah hihim mi hi, tin ti hi.

³³ Assiria kumpipa i cungcangah Topa in hi tin son zo hi. “Hi khuapi sungah tum tukma; hi khuapi sungah thal pa khatno hei kap tukma. ‘Hi khuapi elkimah ngal lumphaw cawi ngalkap pa khatno hei heng haw tukma; mahten hi khuapi donak tuk a kulhtian pualam pen lei sang hei tiang tukma.

³⁴ Hi khuapi sung cu paltum hihim tukma hi; a hunnak lampi lamlengah kikleh tuk hi. Keimah Topa in ti zo ing hi!

³⁵ Hi khuapi cu hum tung a pan tung hi; ka minthannak tuk le ka salpa David humah thutepnak ka bawl zo toh tak hi khuapi cu pan tung,’ ” ti hi.

³⁶ Topa i vancungmi pa khat cu Assiria ngalkap tei ngiahnak munah hawhin ngalkap thawng za khat le thawng sawm liat le thawng nga that hi. A zing khuavak ten ngalkap mah zong cu lum pelpulin; thi khawng pial haw hi.

³⁷ Assiria kumpi Sennacherib cu nunglamah kikin Nineveh khua ah kikleh hi.

³⁸ Ni khat ni-in Sennacherib cu a pathian Nisrok biakinn sungah pathian a biak laihin, a capa pa nih Adrammelek le Sharezer in, a ngalnam haw tuah dawthum haw in, mahceng ten Ararat ngamah tai haw hi. A capa dang pa khat Esarhaddon in, a pa i ai-awhin, kumpi na cu dek hi.