ISAIAH 36 - Ngawm Bible

Assiria Ten Jerusalem Sim Tum

¹ Kumpi Hezekiah in, Judah ngam a uknak kum sawm le kum li kumin, Assiria ngam kumpi Sennacherib in ngal kulhtian tuah upmi Judah ngam do in tampi la ngah hi.

² Mahnung ten a khutnuai a bawi upabel cu ngalkap tampi tuah Judah kumpipa Hezekiah cu lemnak bawltik tukin Lakhish pen Jerusalem ah thupia hi. Mah bawi upa cu puantaktu tei nadehnak lampi, humta tuinim pen tui a laknak haw tuikong kuat elah um hi.

³ Judah mi upa pa thum ten tawkin kumpipa i inn nadektu Hilkiah capa Eliakim, zung cazipi Shebna le cazin lentu Asaf capa Joab haw hi.

⁴ Assiria ngalbawipa in, “Itakaw kumpipa Hezekiah hi amah le mah muangdun zetin, a um? tihmi kumpipa in thei nuam hi.

⁵ Ot thawthong hin ngalkap lam ngilnak le thiamnak hi ai-awh thei tuk tin maw na ngaihsut uh? Keimah do tukin akua in bawm thei tuk tin ngaisung nge cim?

⁶ Thei leng ing hi, Izipt ten bawm tuk tin ngaisung uh ci. Mahnaven Izipt muansan cu iti bang hum tih thei uh cim maw? Phaipheng kung khi thiangkhut a man bangin, ekinna, na khut at tuk hi. Izipt kumpi a muan haw cu mahtih bangin hi leleng poh.”

⁷ Mahma tale, “Topa na Pathian uh maw ma muan uh? Hezekiah in biaklandawh pa khat bekah Pathian bia tuk uh ci tin Judah le Jerusalem mite thupia in, adang biakinn le biaklandawh hempoh a siatsuah khawngmi cu na Pathian biakinn uh le biaklandawhte hi haw ven!

⁸ Mah ahi tale ka kumpi uh i minin thutiam tung! Cipuh thawng nih pia tung, a khungtu tukin mihing mah zong mu thei ni cim?

⁹ Keimu Assiria ngalkap bawi lak pen ngalbawi nautabel hei bang ma pah uh ci! Mah humah Izipt ten cipuhleng le cipuh hum khung ngalkapte kuat tuk tin ham ngam lalaih nei pah uh ci!

¹⁰ Na ngam uh do in, ka siatsuah uh hi Topa i bopnak tel ngawlin maw na ngaihsut uh? Topa amah loli in, na ngam uh do tukin le siatsuahtik hi.”

¹¹ Eliakim, Shebna le Joah ten ngalbawipa i lakah, “Kohtei lakah Aramik awn mang pohin, thei leng poh ung hi. Hebru awnin awn pahsun, pang humah a ummi hempoh ten ngai haw hi,” tin ti haw hi.

¹² Assiria ngalkap pa in, “Hi ka thusonmi hempoh hi nangmuh le na kumpipa uh i lak bekah hilh tukin ka kumpipa in hah hi tin maw na ngaihsut uh? Mah kha ma; pang hum a, khungmi tei lak hei ah hi thu hi a hilh tukmi ing hi; itahim titale nangmuh hei in, na bawl tuk uh bangbok lelengin, amuh vangin, a ek ei haw tuk a, a zun vang in haw tuk,” ti hi.

¹³ Mahten ngalbawipa cu dingto in, Hebru awn tuah a aw neih hempoh tuah au in, “Assiria kumpipa i na lak uhah a otmi hi ngai un.

¹⁴ Hezekiah in zol li pahsuh hen, tin ngallinnak pia hi. Hezekiah in pan thei tukma.

¹⁵ Topa muang tukin a sohnak cu sang pahsuh un, Topa in pan tukin a khuapi uh cu Assiria ngalkapte latik tukma, tin um viang pahsuh un!

¹⁶ Hezekiah i thu cu sang pahsuh un. Assiria kumpi in atu-in, na khuapi sung uh pen tulin lemnak bawl tukin thupia hi. Na sabit ngui a sabit cu eitik leng hi tuk uh ci; na theipi kung uh pen theipi cu ei leng tuk uh ci, na tuikhuk uh a tui cu in leng tuk uh ci.

¹⁷ Ka kumpipa uhin nangmu ngam bangkek ngamah umtik tuk a, mahlai ah sabittui na in theihnak tukin sabit ngui vang um bok, cangho bawl tukin cang vang um bok hi.

¹⁸ Topa in pan tuk poh, tin ngaisung tukin Hezekiah in, na lungmu uh amtik li pahsuh hen. Assiria kumpipa in ngam tampi a do ten a ngam haw a, pathian ten a ngam haw patsuahsak tih thei awng uh cim?

¹⁹ Ilai ah haw kaw Hamath le Arpad khuazingte le Sefarvaim khuazingte a um khawng haw? Akua bek pohin Samaria ngam pan haw a maw?

²⁰ Ngam hi zong sungah pathian tei lak pen pathian pa khat beekin Assiria kumpipa i khutsung pepan maw? A pat ngawl hangin nohte aw na Topa uhin Jerusalem nunpan tuk hi tin itin kaw na up theih uh? tin tiliphet hi.”

²¹ Mipite dai khipkhep haw in; Hezekiah kumpipa i a tepsa bangin mengdenin, imah don haw ma.

²² Eliakim, Shebna le Joab ten lungsia in, a puansilh haw botkekin le Assiria ngalbawipa i otmi hempoh cu a kumpi haw i lakah hilh haw hi.