ISAIAH 34 - Ngawm Bible

Pathian In A Ngalte Dantat Tuk

¹ Maw miphun hempoh, hung un! Tawkdun khawng unna, ngai hem un! Leihum buppi le a hum a ummi hempoh hung unna, ngai un!

² Topa cu miphun hempoh tei humah le a ngalkap tei humah a thinukin, siatsuahnakah hengtik tukin ngaisung hi.

³ A luangte cu vui hi haw tukma; a pualamah uihin, muat haw tuk hi; mualte cu thisan tuah san khawng tuk hi.

⁴ Ni, hade le aksite cak haw tuk a, leivulin suak khawng haw tuk hi. Van cu lawhdei zial bang zialdunin, thamthong tuk hi, aksite cu sabit kung le theipi kung a ceh a zuk haw bangin zuk haw tuk hi.

⁵ Topa in vanah a ngalnam tathiamin, Edom ngam le ngamsung mihing siatsuah khawng tukin a ngaihsutsa mitei humah mah ngalnam cu heng tuk hi.

⁶ Biakpiaknakah piakmi tuu le keel a ngawh haw mi thisan le a thau bangin thisan le a thau in, a ngalnam cu tuam khawng tuk hi. Topa in hi biakpiaknak cu Bozrah khuapi ah pia tuk hi. Edom ngam pen nase zetin that tuk hi.

⁷ Mah ngam mite cu hampa lak khuicang le khuicangnote bangin bah haw tuk a, leipi cu thisan bang sanin, a thau in khuh tuk hi.

⁸ Mah hun cu Topa in Zion a pat hun hi tuk a, Zion ngal tei humah phu alak hun hi tuk hi.

⁹ Edom ngam lui tuite cu kattaza tui in cang khawng tuk, leipi cu kaat lei in cang khawng tuk hi.

¹⁰ A sun le zanin kang tuk a, meikhu cu catngawlin tul tuk hi. Khang khat nung khang khatin, a ngam haw cu buak vawknak ngamkhingah suakin, kuamah in, a ngamsung haw pen khualzinleh haw tukma toh hi.

¹¹ Simbu le va-ak umnak mun le ngamah cang tuk hi. Topa in, lei le van a bawl lai ngawl bangin a ngam haw cu a thacang le a khing diudeumi in cangtik tuk hi.

¹² Ngam uktu kumpi um ngawlin a hotu hempoh cu phathong khawng haw tuk hi.

¹³ Ling le sote cu kumpi tei inn hempoh ah le ngal kulhtian hempoh ah po in, cingne le simbu umnak munin cang tuk hi.

¹⁴ Mahlai ah ngamsate vakin khawhuai pa khat le pa khat otpihdun haw tuk hi. Zanah a vakmi khawhuai ngulpite cu umnak tuk zei in mah lui ah heng tuk hi.

¹⁵ Simbu ten bu bawlin, tui haw tuk a; cano keuhin khanpih haw tuk hi. Mulukolhte vang mahlai ah pa khat nung pa khat khawm haw tuk hi.

¹⁶ Topa i laibu sungah a nungmi ngamsa thu zei unna, sial un! Mah ngamsa cu hih ngam sungah a um ngawlmi um haw tukma; ngualcam nei ngawl hei um haw tukma hi. Mahti bang cang tukin Topa i thupiak sa hi; amah loli in munkhatah khawm khawng tuk hi.

¹⁷ Topa amah in ngam cu sem sakin amu covote cu pia tuk hi. Khang khat nung khang khat mahlai ah um haw tuk, a kumkhua in amuta hi tuk hi.