ISAIAH 33 - Ngawm Bible

Bopnak Ca Thungetnak

¹ A ngal uhte cu bo haw hi! Nguca in mi sonsia haw naven amuhte cu kuamah in sim ngawlin, sonsia vang tawk haw ma! Mahnaven a ngukcaknak haw le mi a sonsiatnak haw hun cu bo pal tuk hi. Ngukcaknak le sonsiatnak a thuaktubelin cang haw tuk toh hi.

² Maw, Topa hehpih zal pohin hi. Nangma lak bekah muansannak nei ung hi. Kohte cu Ni khat nung ni khat humhim inna, haksatnak sung pepanin hi.

³ Keimu ca in, na do ten miphun dangte cu ngaldonak mun pen taivai haw hi.

⁴ A na haw lonsakin, ngalthuam lonsakmi ah cang kikleh haw hi.

⁵ Topa i thawmngeng dan cu ihempoh i humah uktu hi. Jerusalem cu thumannak le dikcangnak tuah dimtik tuk a,

⁶ ngam pumpi cu lungnopzet le khoh zetin umtik tuk hi. A mite cu pan lelengin cihnak le thiamnakte vang pia hi. A lo phabel haw cu Topa a kihcaknak haw khi na hi.

⁷ Ngalpha ten bopnak ngen haw tuk hi. Lemdaihnak um hen tin khua a zuam litu ngam palaite cu nasezet kap haw tuk hi.

⁸ Ngamsung lam ngengpi cu lauhuainak a tam hangin kuamah khualzin ngam haw tukma. Lungkim dunnakte cu phiat khawngin, thutiamnak a bawlte cu siatsuah khawng haw zo hi. Kuamah upatmi hei nei haw ma toh.

⁹ A ngam haw cu kua ma bun ngawl thacangin, khing diudeu thong hi. Lebanon ngam a tupite cu thim khawngin Sharon munlawn ngamphazet cu phillawn ngam bangin cang thong hi. Bashan ngam le Karmel mual a thingkungte cu a ceh lei ah zuk khawng hi.

Topa In Ngallinnak Pia

¹⁰ Topa in miphun tei lakah, “Atu-in pan tuk toh ing. Ka ngil dan le ka huham neihzia langtik tung a, mu tuk uh ci.

¹¹ Na ngaihsut uhte cu nemcuamnak imah nei ngawlin, na bawl uhmi hempoh cu a thawnthong ngeh hi. Nangmuh le muh siatsuahdun uh ci!

¹² Thung bawlnakah a haal haw mi suang bangin vutah cang khawng tuk uh ci, ling a haal haw cu vutin a can khawng bangin ziam khawng tuk uh ci.

¹³ A khawla ummi hihen, a nai a ummi hihen, akua hei in, ka thil bawlte thei in, huham ka neihzia hi thei haw toh tahen,” ti hi.

¹⁴ Zion um misualte cu thinsu in can tawtok haw “Pathian i thukhennak cu kumkhua alh lengmi mei bang hi. Ohtei lakah mahtih bang mei alh sung pen a luat theitu um nung maw?” tin ti haw hi.

¹⁵ Thudik bek sonin, na bawl uh ahi tale luat thei tuk uh ci. Na thuneihnak uh cu mi ca-ngah zoldunnakah mang pahsuh un! Nawhthuh hei ei pahsuh un. Laithat tumtu tei lak hei ah tel pahsuh un hi.

¹⁶ Mahti bangin na um uh tale lawhtingin, a khoh zetmi ngal kulhtian bangin him tuk uh ci, eih tuk an le intuk tui ngah tuk uh ci.

Mailam Ca Muansannak

¹⁷ Ngam ngengpi a uktu kumpipa i sunloihnak cu na mit loli in muleh tuk uh ci.

¹⁸ Ngamdangmi siahkhontu le vilvengtu na lauzet uhte ngaisung khaleh tukma toh uh ci.

¹⁹ Mi ultungzet ngamdangmi, a ot haw hei a sullam na theih uh ngawlte cu muleh tukma toh uh ci.

²⁰ Zion hi zo hem un, biaknak lam puai a bawlnak uh khuapi hi! Jerusalem hi zo hem un! Izahta umnak pha le himnak khua hum! Puanbuk khuam a duh awng ngawlmi le a khau cat awng ngawlmi bang tuk hi.

²¹ Topa in, a sunloihnak huham cu lak tuk hi. Lui zalzet le luino tei elah um tuk hung; mahnaven a ngal tei tinbaw cu mahlai hawh kha haw tukma hi.

^22-23 Tinbaw hum a tinbaw hawhtiktu na hempoh cu imah nemcuam haw ma, tinbaw puan hei phalh thei haw ma. A ngalkap tei van hempoh cu lonsak khawng hi tuk hi. Mah van cu tam zetin, kebaite hei in co ngah thei haw tuk hi. Topa amah cu eimu kumpi hi tuk hi. Amah in uk tuk a, humhim tuk hi.

²⁴ Eimu ngamsung a ummi hempoh ten, “Ka ti na ing,” tin tileh haw tukma toh, a sualnak hempoh cu ngaihdam hi tuk hi.